16
A wasiso elelar una tene tamtamabat ra i mananos
1 O Iesu i watung meleti tan anun a taro na ususer lena, “Ara tene gongon anun ara tultul i tamtamabat anun a kum utna, ra di takuni lena i papam oros kut una kum utna anun a tene gongon ra.
2 I kabo pasi, ma i tingi lena, ‘Asau ra a longoro i un ui? Un tumus a wasiso talapor una num a pinapam na tamtamabat ma un pitari tang, uni kon tene tamtamabat melet mo anungi.’
3 Ra a tene tamtamabat ra i nuki lena, ‘Asau mo ra an pami uniri, ra anung a mugumugu in rakon ru iau gusun a pinapam ri? Kalako dekdeking sur an kikil, ma an maimai kut kai ra an saring utna.
4 O! A sa nuk pas ara utna ra an pami, sur a taro det in gas pas iau una nundet a kum rumu, ra di sa lu ru tar iau gusun a pinapam ri.’
5 “Ra i itula sur det rop taktakai ra det sa dinau pas tan anun a mugumugu. Ra i ting a mugano musano lena, ‘A iso ra u dinau pasi tan anung a mugumugu?’
6 Ra i balu i lena, ‘Ara mar na lamlabino koto na wel na oliw.’ Ma a tultul i watungi lena, ‘Un los anum a buk na dinau urin. Un kis ma un tumus lakit tar a limo na noino mukut uni.’
7 Ra i tingi bulung ara, ‘A iso ra u dinau pasi?’ Ra i balu i lena, ‘Ara mar na bek na wit.’ Ra i watungi tano lena, ‘Un los anum a buk na dinau urin. Un tumus tari mukut a tiwal na noino uni.’
8 “Anun a labino i tasmani lena a tultul ri ke lingmulus una nun a pinapam, ikut i watung ulabo pasi kibino una nun a mananos ra i pam a torotoro ri nami. Uni a taro tagun a rakrakon bual, det mananos doko sur anundet a pinapam tomo nama taro tagun a rakrakon bual, ikut a taro tagun a talapor ka det mananos.
9 A watungi tamot, mot in umarom pas lako taro nama kum ululeng taginin upiso. Numur ra a kum ululeng ken gas mo sur tu utna, din gas pas mot sur mot in kis una kum rumu ra det in tur tukum.
10 “Osi ra i lingmulus una nat na utna kut, in lingmulus kai una kum lamlabino utna, ma osi ra ke lingmulus una nat na utna, ken lingmulus utkai una kum lamlabino utna.
11 Ra ka mot lingmulus sur mot in papam wakak nama kum utna taginin upiso, osi kai in nurnur un mot sur mot in papam wakak nama kum utna tagisapat netes?
12 Ra ka mot tamtama wakak taru un tu utna anun taio, osi kai in pitar tar anumot tu utna torom mot?
13 Katu tultul in pet lar pasi sur in papam torom lako ru mugumugu. In nget ara pasander, ma in nem ara pasander, in nem doko ara ma in rosumur gusun ara. Ka mot in papam lar pas torom o God ma torom a mani kai.”
A kum Warkurai anun o God ken rop
(Mt 5:31-32; 19:9; Mk 10:11-12)
14 A kum Parisi det longoro a kum wasiso ri, ra det urongon laulau kut un o Iesu, uni det nem doko a mani.
15 Ra o Iesu i watungi tandet lena, “Mot, mot ukodos pas mot kut umatan a taro. Ikut o God i tasman a balamot. Uni a utna ra i labo doko umatan a taro i laulau doko umatan o God.
16 “A kum Warkurai ma a kum etowo anun a kum poropet i tuk taru ut un o Jon. Turpasi una kilalo ra, di warawai nama Wakak na Wasiso una matanitu anun o God ma a taro rop det raras sur det in ruk uni.
17 Ke ngangitin sur a bakut ma a rakrakon bual der in rop, ikut i ngangitin doko sur tu nat na tumtumus lik in rop gusun a kum Warkurai anun o God.
18 “Osi ra in lu ru anun a ino ma in nolin melet nam tu ino, a musano ra i pam a sakino torom anun a ino, uni i nolin melet nama se ino. Ma osi ra in nolin nam tu ino ra anun a musano i lu ru i, i kai i pam a sakino, uni awu sur a ino anunu.
O Lasarus ma a tene gongon
19 “Ara tene gongon, i ser emar nama kum wakak na malu, ma i ser wangon wakak una kum bung rop.
20 Di inep tar ara musano, a nat na soi, a tene sasaring, tiro umatansako tano, a risano o Lasarus, a pinpinino i wangangon.
21 I nemi sur in nan a kum mumumut na utna ra det puku taru gusun a kabulu na inangon anun a tene gongon. Ma a kum pap det ser dami kai a kum inangon una pinpinino.
22 “Numur a nat na soi ra i mat, ra a kum ensel det los pasi ma det ukis tari upaporin o Abaram. Ra a tene gongon bulung i mat, ma di por ru i.
23 I kis una labino sungun, i taramo a labino ngunungut. I tatado usapat netes, ra i tama o Abaram i bakbak doko, ma o Lasarus kai kura una paporino.
24 Ra i kakabo lena, ‘Tita Abaram, un maris iau, un tulu ru o Lasarus sur in puk pas in kaskas na lamano una danim sur in ukotokoto tar in karmeng nami, uni a taramo a labino ngunungut nin una sungun.’
25 “O Abaram i balu i lena, ‘Nutunglik, un nuk pasi, ra u laun utmakai, u pam ukai anum a kum wakak na utna, lenkutkai ra torom o Lasarus, i pam ukai a kum laulau na utna. Ikut uniri i utur ukai a gasgas nin, ma ui, u taramo a labino ngunungut.
26 Ma ara utna kai, in tarai nin nala kuri epotor tamot ma met. Katutaio taginin in pet lar pasi sur in nan utiro torom mot, ma katutaio kai in nan tagitiro gusun mot urin torom met.’
27 “Ra a tene gongon i watungi lena, ‘Tita, a saring ui sur un tulu ru o Lasarus sur a rumu anun o tamang.
28 Uni a limo na tistising a kum musano kura det uni, ma in utumarong tar det, sako det bulung det in nan urin una nubual na ngunungut ri.’
29 Ra o Abaram i balu i lena, ‘A wasiso anun o Moses ma a kum poropet kura i kis torom det. I wakak sur det in longoro i.’
30 A tene gongon i watungi lena, ‘Awu, Tita Abaram, ra ut ra taio tagun a kum minat in nanpat torom det, det in nukpukus.’
31 Ra o Abaram i balu meleti lena, ‘Ra ka det longoro o Moses ma a kum poropet, ra taio kai in katutur melet gusun a minat, ken ukatutur pas anundet a nurnur.’ ”