6
O Iesu i a Labino tagun a Bung na Sabat
(Mt 12:1-8; Mk 2:23-28)
1 Un ara Bung na Sabat, o Iesu i wan nanan epotor una kum kinobot na wit. Anun a kum nat na ususer det kumut pas a ramano kum turunu wit, det gisgis pasi ma det wani.
2 A ramano kum Parisi det iting lena, “Ilai sur mot pam a utna ri, ra ke tokodos elar nama warkurai tagun a Bung na Sabat?”
3 O Iesu i balu det lena, “Pepetlai, ka mot luki utmakai asau ra o Dewid i pami? Det nama taro ra det wan tomo det murak,
4 ra i ruk una rumu anun o God, i los pas a beret ra di sa pitar tari torom o God, i wani, ra i tabor det kai ra det wan tomo nami. A beret ra, a warkurai taguni, i lenri, a kum tene etabor kut torom o God det in nangon taguni, ma a taro oros awu.”
5 Ma o Iesu i watungi tandet lena, “A Nutun a Musano i a Labino tagun a Bung na Sabat.”
O Iesu i ulangolango pas a musano ra a lamano i kong
(Mt 12:9-14; Mk 3:1-6)
6 Un ara Bung na Sabat bulung, o Iesu i ruk una rumu na lotu, ma i ususer a taro. Ara musano kura iai, a sot na lamano i kong.
7 A kum Parisi ma a kum tene ususer tagun a Warkurai det sisio sur tu utna det in takun o Iesu nami. Det tamtama wakak taru ut uni, ra in ulangolango pas a musano ra una Bung na Sabat, o awu.
8 Ma o Iesu i tasman a nuknukin det ra i watungi tan a musano ra a lamano i kong lena, “Un tur! Ra un nan usa numugu tan a taro rop.” I katutur, ra i tur taru sa numugu tandet.
9 Ra o Iesu i watungi tandet lena, “An ting mot: Asau i tokodos sur din pami una Bung na Sabat? Din pam a wakakino o a laulau ino? Din ulaun taio, o din ban laulau taio?”
10 Ma i nas pukpukus det rop, ra i inanos a musano lena, “Kodos a lamam.” I kodosi, ra a lamano i tokodos melet.
11 Ikut in balandet i sungun, ma det wasiso tomo sur tu ngas na utna det in pami un o Iesu.
O Iesu i pilok pas a noino ma aru aposel
(Mt 10:1-4; Mk 3:13-19)
12 Ara bung, o Iesu i wan usapat una tangai sur in wararing. A bung na mirum rop ra, i wararing torom o God.
13 Ra i sa waspi, i kabo pas anun a taro na ususer toromi, ma i pilok pasi kut a noino ma aru tagun det, ra i urising det a kum aposel.
14 Iri a kum risandet: O Saimon, i ra o Iesu i urisingi nam o Pita, dersino nam o Endru, o Jems, o Jon, o Pilip, o Batolomiu,
15 o Matiu, o Tomas, o Jems a nutun o Alpius, o Saimon ara tagun a kum Silot,
16 o Judas a nutun o Jems, ma o Judas Iskariot i ra i usobor tar o Iesu.
O Iesu i ususer a taro ma i ulangolango det
(Mt 4:23-25)
17 Ra o Iesu tomo nama nun a taro na ususer det wan pirso tagisapat una tangai, i tur una elaro na nubual, tomo nam anun a kunur na taro na ususer. Ma a labino kunur na taro tagitong una papor Judia ma tagisapat o Jerusalem ma tagun a kum tamon nago korot utasi milau o Tair ma o Saidon kai,
18 det wanpat sur det in longoro i, ma sur in ulangolango pas det gusun anundet a kum misait. Ma i lakro ru a kum laulau na nion gusun det rop ra a kum laulau na nion det ban laulau det.
19 Ra a taro rop, det nemi sur det in pam a pinin o Iesu, uni a dekdek i pirso gusuni, ma i ulangolango pas det rop.
A gasgas ma a tupunuk
(Mt 5:1-12)
20 O Iesu i tama anun a taro na ususer ra i watungi lena,
“Mot ra mot sibo, mot dan,
uni a matanitu anun o God, anumot!
21 Mot ra uniri mot murak, mot dan,
uni numur mot in masur.
Mot ra uniri mot tangis, mot dan,
uni numur mot in nongon.
22 Mot dan ra a taro det nget mot,
o det pilok ru mot
ma det watung laulau mot,
ma det ban laulau a risamot,
uni mot tagun a Nutun a Musano.
23 “Una bung ra din pam a kum utna ri torom mot, mot in gas, mot in sirsirok nama gasgas, uni i labo sakit anumot a ikul sapat una langit. Uni a kum utna ri, a kum tumtubun det tagun numugu det sa pam tari torom a kum poropet.
24 “Ikut in laulau torom mot a kum tene gongon,
uni mot sa rakon pas anumot a wakakino.
25 In laulau torom mot ra uniri mot masur,
uni numur mot in murak.
In laulau torom mot ra uniri mot nongon,
uni numur mot in tupunuk ma mot in tangis.
26 In laulau torom mot ra a taro rop det watung ulabo pas mot,
uni a kum tumtubun det tagun numugu, det pami lenri torom a kum torotoro na poropet.
A petutna na marmaris torom a kum ebar
(Mt 5:38-48)
27 “An watungi tamot ra mot longoro iau, mot in nem anumot a kum ebar, ma mot in pam a wakakino torom det ra det nget mot.
28 Mot in watung udan det ra det saring o God sur in ban laulau mot, ma mot in wararing un det ra det ban laulau mot.
29 Ra taio in pasor tar a papor wam, un pukus ara papor bulung toromi. Ra taio in ras pas anum a saket, un madek tari kai anum a siot tano.
30 Un tabor det rop ra det saring ui. Ra taio in los pas tu utna anum, gong u saring meleti suri.
31 Asau ra mot nemi sur a taro det in pami torom mot, mot kai, mot in ser pami torom det.
32 “Ra mot nem det kut ra det nem mot, din watung ulabo pas mot pepetlai? Uni a kum tene sakino kai det nem etetalai det ut.
33 Ra mot in pam a wakakino torom det ra det pam a wakakino torom mot, din watung ulabo pas mot pepetlai? Uni a kum tene sakino kai det ser pami lenra.
34 Ra a taro det saring mot sur tu utna, ma mot pitari kut torom det, ra mot tasmani lena, det in balu i ut torom mot, din watung ulabo pas mot pepetlai? Uni a kum tene sakino kai det pitar tar a utna tan a kum tene sakino, ma det nuki lena det in balu i.
35 Ikut mot in nem anumot a kum ebar, ra mot in pam a wakakino torom det. Ra a taro det nemi sur det in los pas tu utna munung gusun mot, mot in pitari kut, ma gong mot nemi sur det in balu i. Ra mot in pami lenra, anumot a ikul in labo sakit, ma mot a kum nutnutun o God a Labino Sakit, ra i ser maris det ra ka det ser watung wakak toromi, ma a kum tene sakino kai.
36 Mot in lason una marmaris, elar nama Tamamot a tene marmaris.
Gong mot kuro tar taio
(Mt 7:1-5)
37 “Gong mot takun tar taio, sako o God in takun mot. Gong mot kuro tar taio sur in los a warkurai na minabalu, sako o God in kuro mot ra mot in los a warkurai na minabalu. Mot in dumano ru a kum sakino petutna ra a taro det pami un mot, ma o God in unus ru anumot a kum sakino petutna.
38 Mot in etabor, ma o God in tabor mot. Ikut a etabor anun o God torom mot in labo doko, ma din sogori, ma in bukus melet, ma in tilingis. Uni asi na ngas na etabor ra mot pitari, i labo o i natino, i kut kai ra o God in pitar meleti torom mot.”
39 O Iesu i watungi kai a wasiso elelar torom det lenri, “Tu pulu in ben lan taio kai ra i pulu? Pepetlai, der rop ka der in puku dorong un tin nutung?
40 A nat na ususer ke labo taun anun a tene ususer. Ikut o naro ra i sa urop pas anun a etowo, in elar kut nam anun a tene ususer.
41 “Ilai ra u tama pasi kut a burbururup kura unin matan o tisim, ikut ko nuk pas a nuduwai pi kura ut unin matam?
42 Ra ko tama pas a nuduwai pi kura kut unin matam, un watung petlani torom o tisim lena, ‘Tising, an rakon ru a burbururup gusun in matam’? Ui a tene torotoro, un los mugu ru a nuduwai pi gusun in matam, ra un tamtama wakak, sur un rakon ru a burbururup gusun in matan o tisim.
A wasiso elelar una arin ngas na wino duwai
(Mt 7:16-20; 12:33-35)
43 “In wakak na duwai ken wu lako laulau na wino, ma in laulau na duwai kai ken wu lako wakak na wino.
44 Din tama lele a kum duwai tagun a windet. Ka din git pas tin niwino fig tagun in kadas, ma in niwino wain tagun in suksuk.
45 A wakak na musano i pam pat anun a wakak na petutna tagun a wakakino ra i kis una nun a nilaun, ma a laulau na musano kai, i pam pat anun a sakino petutna tagun a sakino ra i kis una nun a nilaun. Uni a wan a taro i watung puaso a petutna ra i bukus una nundet a nilaun.
A wasiso elelar una aru ngas na tene pam rumu
(Mt 7:24-27)
46 “Ilai ra mot watung iau ‘Labino, Labino,’ ma ka mot pam asau ra a watungi tamot?
47 Osi ra i wan torom iau ma i longoro anung a kum wasiso, ma i muri, i elar nama musano ra an inanos mot nami.
48 I elar nama musano ra i pam tar a rumu. I kil dordorong a kum tung, ma i utur tar a kum pos ina rumu netes una wat. A lomom i wanpat, ma i sal tiro na rumu, ikut ke gunu lar pasi, uni di sa pam wakak tari.
49 Ikut osi ra in longoro anung a kum wasiso ma ke muri, i elar nama musano ra i utur tar anun a rumu netes kut una piso, ma ke pam mugu tar a kibin a rumu. A lomom i sal taru uni, i toropo, ma i terege mut!”