3
Dat ra dat nurnur un o Karisito dat a kum tene tokodos mulus
1 A kum tistising, a ururop na wasiso ri, a tumusi torom mot: Mot in gas uni mot anun a Labino. A gas sur an tumus melet a kum utna ra a sa tumus tari munung torom mot, sur in warut mot.
2 Mot in tumarong mot gusun a kum ngalngalia na pap, a taro ra det ser pam a sakino, ma det tok laulau a pinpinin a taro, ma det ususer det lena, ra ka di tok talilis a pinindet, ka din ulaun det.
3 Dat ra dat lotu torom o God nama dekdekin a Niono, dat kut ra, a taro mulus anun o God, i elar nami ra di sa tok talilis tar a pinindat. Ka dat nurnur una pinapam ra a taro det pami, awu. Dat gas kut una pinapam ra o Karisito Iesu i sa pam tari un dat.
4 Ra gunuk a pinapam anun a taro i ulaun dat, iau ut an pet lar pasi sur an nurnur uni. A kum pinapam ra det nurnur uni, iau a wakak doko taun det.
5 Iau a te Israel, tagun a kabotaro Benjamin, a te Ibru ma a mur anundet a kum petutna. Ra i sa tiwal na bung bat anung a usus, di tok talilis a pining. Iau a Parisi ma a ser mur wakak a kum Warkurai anun o Moses.
6 A dekdek doko sur an mur kodos pas a pinapam anun o God, ma una nung a pinapam ra, a ban laulau a kum tene lotu anun o Karisito. Ra gunuk taio in tokodos uni i mur rop a kum Warkurai, katu etakun in los iau.
7 Ikut a kum utna rop ri, ra numugu i labo torom iau, uniri i utna oros mukut torom iau, kibino un o Karisito.
8 I lingmulus, a kum utna rop ri, det a kum utna oros mukut torom iau. Ara utna kut ra i labo sakit, a tasman o Karisito Iesu anung a Labino. A sa ubek ru a kum utna rop ri, kibino un o Karisito. Det elar mukut nama beren umatang, sur an los pasi mukut o Karisito una nung a nilaun,
9 ma an patop tomo nami. Ma awu sur iau a tene tokodos uni a mur a kum Warkurai, awu, kibino kut uni a nurnur un o Karisito. O God i watung dat a kum tene tokodos uni dat nurnur un o Karisito.
10 A nemi sur an tasman o Karisito ma a dekdekin anun a katkatutur melet gusun a minat, ra a nemi sur an tur tomo nami una nun a kum ngunungut, ma an elar ut nami una nun a minat.
11 I lenkutra, a nurnur lena, iau kai an katutur melet gusun a minat.
A kinalabor sur a ikul
12 Awu sur a nuki lena, a sa utur ukai a kum utna rop ra, ma ka tokodos mulus utmakai. Ikut a dekdek utmakai sur an utur ukai a utna ra o Karisito Iesu i kabo pas iau suri.
13 A kum tistising, ka nuki lena, a sa utur ukai i. Ikut ara utna ra a pami, ka nuknuk melet sur asau ra tagun numugu, a dekdek mukut sur asau ra kuri numugu tang.
14 A kalabor usa numugu sur a ururopino sur an los pas anung a ikul. A ikul, i a kakabo anun o God torom iau sur a nilaun sapat una langit, kibino un o Karisito Iesu.
15 I wakak sur dat, ra dat tur dekdek, a nuknukin dat in lenra. Ikut ra a nuknuki mot in senene un tu utna, o God ut in utalapori torom mot.
16 Ikut dat in mur a wakak na nilaun ra dat sa utur ukai pasi.
17 A kum tistising, mot in mur anung a kum ngas na petutna, ra a sa pam ususer tar mot nami, ra i wakak sur mot in tamtama murmur det ra det muri.
18 Uni a susut na dino a sa inanos tar mot lena, a susut, det laun elar nama kum ebar anun in nanai kutus anun o Karisito. Ra uniri a inanos melet mot, ma a lurlur na matang i puku.
19 Det wan mukut sur a iniru, a nemnem na pinindet i anundet a god. Det uman nama kum petutna ra din maimai nami. A nuknukin det i kis kut una kum utna taginin upiso.
20 Ikut dat, a taro tagisapat una langit. Ra dat kis langlang nama labino nemnem sur a Tene Ulaun, ra in nan pirso tagisapat netes, a Labino o Iesu Karisito.
21 In pukus pas a pinindat ra ke dekdek, sur in elar nama pinino ra i bukus nama minamar. In pukusi nama dekdekino. A dekdekino ra i papam nami sur in ubek tar a kum utna rop utuntudu in anun a warkurai.