4
A mangana nilaun aina God i gugu tana
1 Ma go bula, ave tingting pa avat, a tara na turagu, ma ave vargat avat ure ra Luluai Iesu, pi avat a manga tavua vanavana ta ra mangamangana ave ga tovo avat i tana, ma upi avat a vagugu pa God, ma ra dovotina ava tar pait ia.
2 Tago ava tar nunure ra vartuluai ave ga ve avat i tana ta ra Luluai.
3 Tago ra mamainga kai God go, ba na gomgom ra tulungea i vavat upi avat a vatabue ra nipo;
4 upi na tale avat par tikatikai, ba avat a vatur vake kavava taulai ma ra mangamangana gomgom vurakit ma ra variru,
5 ma koko ma ra mamainga upi ra kaina mangamangana varogop ra umana Tematana, nam diat pa dia nunure God;
6 ma upi koko ta tikai na vagu pa turana tai ta mangana magit, ba na long pa ta magit tana; tago ra Luluai ia ra tena varobo ure ra lavur magit par damana, varogop ave ga vaale value avat i tana, ma ave ga varvai dovot i tana.
7 God pa i oro pa dat tadav ra dur na mangamangana, i oro ko dat ma ra mangamangana i gomgom.
8 Ma ba tikai i varpiam, pa i piam ra tarai, i piam God kaka iat, nina i ga tul tar ra Takodo na Tulungen ta dat.
9 Ma pa ina tutumu tadav avat ure ra varmari na barturana; tago God iat i ga tovo avat, ba avat a varmari vargil;
10 ma a dovotina, ava pait ia damana pire diat ra umana bartura i dat par aro Makedonia. Ma ave vargat pa avat, a tara na turagu, ba avat a vapealane vanavana ra varmari;
11 ma avat a ongor upi ra kini vovovon, ma avat a balaguan tikatikai ure kana varvakai iat, ma avat a papalum ma ra lima i vavat, da ave ga vartuluai tadav avat;
12 upi avat a vanavana takodo ta ra luaina mata i diat ra tarai vakuku, ma upi koko avat a iba upi ta magit.
A pinot mulai kai ra Luluai
13 Ma pa ave mainge ba avat a tuptup, a tara na turagu, ure diat dia va mat, upi koko avat a lingligur tana, varogop diat ta ra na, pa kadiat ta kini nunur.
14 Ona da tar kapupi ia ba Iesu i ga mat ma i laun mulai, io, damana bula God na agure vaarike varurungane diat me dia tar va mat tai Iesu.
15 Ma go ave ve avat i tana ma ra tinata kai ra Luluai, ba dat, da laun tuk ta ra vinavana mulai uti kai ra Luluai, pa dat a lua ta diat dia tar va mat.
16 Tago ra Luluai iat na vana ba marama ma ra ngala na nioro, ma ra nilai ra luluai na angelo, ma ma ra tavur kai God; ma diat, dia mat tai Kristo, diat a tut lua;
17 namur dat ra ibaiba ta ra minat da laun ma da ki ati, da ga puak vatutua varurungane dat ma diat urama ta ra bakut, upi dat a varkuvo ma ra Luluai ta ra lao; ma dat a ki varurung ma ra Luluai vatikai.
18 Io, avat a vamaram vargiliane avat ma go ra lavur tinata.