22
A uguugu na vartabar ta ra papar a Iordan
1 Ma Iosua i ga oro pa ra tarai Ruben, ma ra tarai Gad, ma ra ngungu vuna tarai Manase,
2 ma i ga biti ta diat dari: Ava tar mur ra lavur magit Moses ra tultul kai ra Luluai i ga vartuluai tana pire vavat, ma ava tar torom ta ra nilaigu ta ra lavur magit iau ga vartuluai tana pire vavat;
3 pa ava ga vana balakane ra umana tura i vavat ta go ra lavur bungbung tuk tar ta ra bung gori, ma ava tar pait ra vartuluai kai ra Luluai kavava God.
4 Ma go ra Luluai kavava God i tar vango ra umana tura i vavat da i ga biti ta diat; io, avat a lilikun go, ma avat a vana ta ra kuba i vavat ma ta ra gunan ba kavava tiniba, nina Moses ra tultul kai ra Luluai i ga tul tar ia ta vavat ta ra papar a Iordan maro.
5 Ma avat a varbalaurai bulu upi avat a torom ta ra vartuluai ma ra varkurai, nina Moses ra tultul kai ra Luluai i ga tul tar ia ta vavat, upi avat a mari ra Luluai kavava God, ma avat a mur kana lavur nga, ma avat a torom ta kana lavur vartuluai, ma avat a ki petep pirana, ma avat a kudakudar tana ma ra bala i vavat par ma ra nuknuk i vavat par.
6 Damana Iosua i ga tata vadoane diat, ma i ga tul vue diat, ma dia ga vana ta ra kubakuba i diat.
7 Io, Moses i ga tul tar ra tiniba ta ra ngungu vuna tarai Manase ta ra gunan Basan; ma Iosua i ga tul tar ra tiniba tai ta ra ngungu livuan ta ra tara na tura i diat ta ra papar a Iordan maro, a papar a taoai. Ma ba Iosua i ga tul vue diat upi diat a vana ta ra kubakuba i diat, i ga tata vadoane diat
8 ma i ga biti: Avat a lilikun tadav ra umana kuba i vavat ma ra ngala na tabarikik, ma mangoro na vavaguai, ma ra silva, ma ra goled, ma ra palariam gobol, ma ra palariam tuna, ma mangoro na mal; avat a tibe ra umana tura i vavat ma ra tabarikik ava ga ra pa ia ta kavava lavur ebar.
9 Ma ra tarai Ruben, ma ra tarai Gad, ma ra ngungu vuna tarai Manase, dia ga lilikun ma dia ga vana kan ra tarai Israel aro Silo, nina ta ra gunan Kanaan, upi diat a vana ta ra gunan Gilead, a gunan ba kadia tiniba iat nina dia ga vatur vake varogop ma ra vartuluai kai ra Luluai tai Moses.
10 Ma ba dia ga tadav ra pakana maravai ta ra Iordan ta ra gunan Kanaan, ra tarai Ruben ma ra tarai Gad ma ra ngungu vuna tarai Manase dia ga pait tika na uguugu na vartabar ie ta ra Iordan, a kaliana.
11 Ma ra tarai Israel dia ga valongore ra tinata dari: Gire, ra tarai Ruben ma ra tarai Gad ma ra ngungu vuna tarai Manase dia ga pait ra uguugu na vartabar ta ra langun i ra gunan Kanaan, maravai ta ra Iordan, ta ra papar kai ra tarai Israel.
12 Ma ba ra tarai Israel dia ga valongore, a kor na tarai Israel par dia ga vana varurung aro Silo, upi diat a vana ma diat a varubu ma diat.
13 Ma ra tarai Israel dia ga tulue Pinekas natu i Eleasar ra tena tinabar tadav ra tarai Ruben, ma tadav ra tarai Gad, ma tadav ra ngungu vuna tarai Manase, ta ra gunan Gilead;
14 ma a vinun na luluai dia ga varagur me, tikatika na lualua na apik na tarai ure tikatika na vuna tarai Israel; ma diat par dia ga lualua na apik na tarai pire ra umana vuna tarai Israel.
15 Ma dia ga tadav ra tarai Ruben, ma ra tarai Gad, ma ra ngungu vuna tarai Manase, ta ra gunan Gilead, ma dia ga pirpir ma diat, ma dia ga biti dari:
16 A tarai par kai ra Luluai dia biti dari: Ava go ra varpiam ava pait ia tadav ra God kai Israel, tago ava vana irai kan ra Luluai go ieri ma pa ava mur mule, ma ava tar pait kavava tika na uguugu na vartabar upi avat a tut na varpiam ure ra Luluai gori?
17 Dave, pa i ngala vang ra varpiam aro Peor pire dat, nina ba pa da langalanga boko tana, ma a dovotina tika na kinadik i ga tup ra tarai kai ra Luluai ure,
18 ma go ava vana tapuku kan ra Luluai ma pa ava mur mule? Ma ona ava tut na varpiam ure ra Luluai gori, ningene na kankanuane ra tarai Israel par.
19 Ma ona ra gunan ta kavava tiniba i kaina, i boina ba avat a bolo lake tadav ra gunan nina ba ra tiniba kai ra Luluai ma ra pal kai ra Luluai i tur tana, ma dat a vatur varurungane vake; ma koko avat a tut na varpiam ure ra Luluai, ma koko avat a tut na varpiam ure avet, ma ra papait enana uguugu na vartabar ta nam ra uguugu na vartabar kai ra Luluai kada God.
20 Dave bar, Akan natu i Sera pa i ga pait ra varpiam laka ta ra magit di ga vatabue, ma ra kankan i ga tar ki taun ra tarai Israel par? Ma nam ra tutana pa i ga virua varkolono ta kana varpiam.
21 Ma ra tarai Ruben ma ra tarai Gad ma ra ngungu vuna tarai Manase dia ga tata bali diat, ma dia ga biti ta ra umana lualua na apik na tarai Israel:
22 A Luluai ra God kai ra lavur god, a Luluai ra God kai ra lavur god, i nunure, ma na vakapa Israel; ari i vuna ta ra varpiam ba ra vartuam tadav ra Luluai, (koko una valaun avet gori),
23 ba ave tar pait ra uguugu na vartabar ure avet, upi avet a vana irai kan ra Luluai; ba ona ave tar pait a upi avet a tul tar ra tinabar di tuntun tar ia tana, ba ra tinabar na vuai na uma, ba ra tinabar na varmaram, ra Luluai iat na kure bali ia.
24 Ave tar pait bulu ka go ra magit, ma ave tar manga nuknuk tana, tago ave ga biti dari: Kan ta ra umana bung namur a umana natu i vavat diat a biti ta ra umana natu i vevet dari, Ava dave ma ra Luluai ra God kai Israel?
25 Tago ra Luluai i ga tibe ra Iordan upi ra langun livuan ta vevet ma avat a tarai Ruben ma ra tarai Gad; vakir kavava ta tiniba tai ra Luluai. Damana ra umana natu i vavat diat a tigal ra umana natu i vevet upi koko diat a ru mule ra Luluai.
26 Kari ave ga biti: Boina dat a vaninara, ma dat a pait ta tika na uguugu na vartabar, vakir ure ra tinabar di tuntun tar ia, ba ure ra vartabar,
27 ure ke ra vakilang pire vevet ma pire vavat, ma pire kada lavur taun tarai namur, upi avet a pait ra papalum na lotu kai ra Luluai ta ra luaina matana ma kaveve lavur tinabar di tuntun tar ia, ma kaveve lavur vartabar, ma kaveve lavur tinabar na varmaram, upi koko ra umana natu i vavat diat a biti ta ra umana natu i vevet ta ra eae namur dari: Avat, vakir kavava ta tiniba tai ra Luluai.
28 Kari ave ga biti: Ona dia tatike nam ra tinata ta vevet ba ta kaveve taun tarai namur, avet a biti: Gire ra valavalar i ra uguugu na vartabar kai ra Luluai nina ba ra umana tama i vevet dia ga pait ia, vakir ure ra tinabar di tuntun tar ia ba ure ra vartabar, patana; ure ke ra vakilang pire vevet ma avat.
29 Koko muka avet a piam ra Luluai, ma koko avet a vana irai kan ra nimur pire ra Luluai gori, upi avet a pait ta enana uguugu ure ra tinabar di tuntun tar ia, ba ure ra tinabar na vuai na uma, ba ure ra vartabar, ta nam ra uguugu na vartabar kai ra Luluai kada God nina i tur ta ra luaina mata i ra kubana.
30 Ma ba Pinekas ra tena tinabar, ma ra umana luluai kai ra tarai, a umana lualua na apik na tarai Israel nina dia ga varagur me, dia ga valongore ra tinata kai ra tarai Ruben ma ra tarai Gad ma ra tarai Manase, dia ga gugu tuna tana.
31 Ma Pinekas natu i Eleasar ra tena tinabar i ga biti ta ra tarai Ruben ma ra tarai Gad ma ra tarai Manase: Go ieri da nunure ba ra Luluai i ki livuan ta dat, tago pa ava ga pait ra varpiam tadav ra Luluai; go ava tar valangalanga ra tarai Israel kan ra lima i ra Luluai.
32 Ma Pinekas natu i Eleasar ra tena tinabar, ma ra umana luluai, dia ga lilikun kan ra tarai Ruben ma ra tarai Gad ta ra gunan Gilead, ma dia ga vana mulai Kanaan tadav ra tarai Israel, ma dia ga kap ra tinata pire diat.
33 Ma ra tarai Israel dia ga gugu ta go ra magit; ma ra tarai Israel dia ga pite pa God, ma pa dia ga biti mulai ba diat a vana upi diat a varubu ma diat, upi diat a vakaina vue ra gunan nina ra tarai Ruben ma ra tarai Gad dia ga ki tana.
34 Ma ra tarai Ruben ma ra tarai Gad dia ga vatang ra uguugu na vartabar ba a Vakilang; tago dia ga biti: la ra vakilang pire dat ba ra Luluai ia God.