18
A tinata valavalar ure ra ua na vavina ma ra tena varkurai
1 Ma i tatike ra tinata valavalar ta diat upi na tovo diat, ba i topa ra tarai upi diat a araring milat ma koko diat a talanguan.
2 I biti: Tika na tena varkurai i ga ki tai tika na pia na pal, pa i ru God, ma pa i nuk pa ra tarai.
3 Ma tika na ua na vavina bula ta nam ra pia na pal, ma i vala vana tadav ia, i lul ia dari: Una obo iau ta kaugu ebar.
4 Ma lua boko i ole; ma namur i nuk ia ra balana dari: Pa iau ru God, ma pa iau nuk pa ra tarai,
5 ia kaka, tago go ra ua na vavina i vovo vatalanguane iau, ina oba ka, kan na vatalanguane iau ma kana vinavana milat.
6 Ma ra Luluai i biti: Avat a valongore go ra tinata kai ra kaina tena varkurai.
7 Ma God bar, pa na obo laka ra taraina, diat, dia tangi tadav ia ra marum ma ra keake bula, nina diat, i ungung vovovon pa diat?
8 Iau tatike ta vavat, na obo lulut pa diat. la kaka, ba Natu i ra tutana i pot na gire tadav bar ta nurnur ra pia?
A tinata valavalar ure ra Parisaio ma ra tena varurue totokom
9 Ma i tatike bula go ra tinata valavalar tadav diat dia nurnur ta diat mule, ba ra umana tena takodo diat, ma dia pidimuane ra tarai par.
10 A ivu tutana dir vana urama ra pal na vartabar upi ra niaring; tikai ta dir a Parisaio, ma ta ra tikai a tena varurue totokom.
11 A Parisaio i tur ma i araring ta ra balana dari: God, iau pite pa u tago pa ave vardada ma ra tarai par, a lavur tena varvaur, a lavur tena vaongo, a lavur tena nipo diat, ma pa amir varogop bula ma go ra tena varurue totokom.
12 Iau vevevut ma ra vinavel a vikvik par; iau vartabar ma tikatikai ta ra vinvinun iau vatur vake.
13 Ma ra tena varurue totokom i tur ara vailik, i ruva ba na tadarake ra bakut, i tibul ra bongobongono, ma i biti: God, una mari ka iau, iau a tena varpiam.
14 Iau tatike ta vavat: Go ra tutana i talil ra kubana, a tena takodo, ma ta ra tikai pata; tago nina i vangala pa mule, da vaikilik pa ia; ma nina i vaikilik pa mule, da vangala pa ia.
Iesu i vadoane ra umana bul ikilik
(Mat 19:13-15; Mar 10:13-16)
15 Ma dia kap ra umana kuramana tadav ia, upi na bili diat; ba kana tarai na vartovo dia gire, dia tigal diat.
16 Ma Iesu i oro pa diat pirana, ma i biti: Avat a nur vue ra umana bul ikilik upi diat a tadav iau, ma koko avat a tigal diat, tago kadiat dia dari ra varkurai kai God.
17 A dovot go iau tatike ta vavat: Nina ba pa i kapupi ra varkurai kai God da ra bul ikilik, pa na olo muka tana.
Ra uviana na tutana
(Mat 19:16-30; Mar 10:17-31)
18 Tika na tena varkurai i tir ia: Bo na Tena Vartovo, ava ina pait ia upi kaugu ra nilaun tukum?
19 Iesu i tatike tana: Dave u vatang iau ba iau boina? Pa ta i boina, ia kaka God.
20 U nunure ra lavur vartuluai: Koko una po, Koko una vardodoko, Koko una long, Koko una varvai vavaongo, Una ru tamam ma nam.
21 Ma i biti: Go parika iau tar toratorom tana papa amana ba iau ga bul.
22 Ba Iesu i valongore, i biti tana: A kopono magit boko u iba upi ia; una ivure kaum vurvur magit parika, ma una tibe ra lavur luveana me, ma kaum boko ra bo na vuvuvung ra bala na bakut; ma una mai, una mur iau.
23 Ba i valongore go ra tinata i tabun muka ra balana tana, tago i manga uviana.
24 Ba Iesu i gire, i biti: I papait na dekdek muka upi ta tika na uviana na olo ta ra varkurai kai God!
25 Tago a niolo kai ra uviana ta ra varkurai kai God i manga dekdek ta dir ma ra nidolo kai ra kamel ta ra matana ingingit.
26 Ma diat dia valongore dia tatike: Ari ona damana, ia da valaun ia?
27 Ma i biti: A magit i dekdek pire ra tarai, God i pait valar pa ia.
28 Ma Petero i biti: Ave ga vana kan kaveve vurvur magit ma ave murmur u.
29 Ma i biti ta diat: A dovot go iau tatike ta vavat: Pa ta i ga vana kan ra pal, ba kan kana vavina ba ra umana turana, ba nana, ba tamana, ba ra umana natuna, ure ra varkurai kai God,
30 ba pa na vatur vake ra mangoro iat ta go ra nilaun ma namur ra nilaun tukum.
Ra vautuluna tinata kai Iesu ure kana minat
(Mat 20:17-19; Mar 10:32-34)
31 Ma i agure vaire pa ra vinun ma a ivut, ma i biti ta diat: Go da vana urama Ierusalem, ma da pait nina ra lavur magit par ra umana propet dia ga tumu ia ure Natu i ra tutana.
32 Tago da tul tar ia tai ra lavur Tematana, ma da kulume, ma da vakaina muka, ma da nami ia;
33 diat a virit ia, ma diat a doka; ma ta ra vautuluna bung na laun mulai.
34 Ma pa dia matoto ta go ra magit; ma di ive go ra tinata kan diat, ma pa dia nukure ra kukurai ra lavur magit di ga tatike.
Iesu i vanana pa ra pula
(Mat 20:29-34; Mar 10:46-52)
35 Ba i maravai Ieriko, tika na pula i ki ra papar a nga, i lulul;
36 ba i valongore ra kor dia vanavana, i titir ba ava go.
37 Ma dia ve ba Iesu ra te Nasaret i vanavana pakit.
38 Ma i oraoro dari: Iesu, u natu i David, una mari iau.
39 Ma diat dia lualua, dia tigal ia ba na ki mut uka; ma i manga oraoro ka dari: U natu i David, una mari iau.
40 Ma Iesu i tur, ma i vartuluai ba da ben ia pirana; ma ba i vana maravai pirana, i tir ia:
41 Ava u mainge ba ina pait ia tam? Ma i tatike: Luluai, ba ina nana mulai.
42 Ma Iesu i biti tana: Una nana muka, kaum nurnur i tar valaun u.
43 Ma i nana vuavuai mulai, ma i mur ia, ma i pite pa God; ma ra tarai par bula ba dia gire, dia pite pa God.