4
I tar ot ra balbali pire ra tarai Sion
1 Ua, ra goled i tar kubar! Ua, ra goled i tar kaina, nina i ga ngatngat muka!
Di tar lolonge guve ra umana vat na pal i gomgom ta ra lavur ngu na nga.
2 A umana ngatngat na natu i Sion, diat dia varogop ma ra vakak na goled,
Di tar varogopane diat ma ra pal a tava, ra papalum kai ra tena pait la na pia!
3 Ea, ra umana kuabar na pap dia tul tar ra u i diat, dia vau ra umana natu i diat;
Ma ra umana vaden ta kaugu tarai dia dekdek da ra umana murup ta ra bil.
4 A karamea i ra kuramana i ki petep ta ra ul a ngiene, tago i mar;
A umana bul ikilik dia lul upi ta nian, ma pa ta na i tabar diat.
5 Diat dia ga en ra magit ma ra nangnang dia mulmulum na nga;
Diat dia ga mong ma ra mal meme ba dia ga bul dia va ta ra umana ul a puta.
6 Tago ra kaina mangamangana ba kaugu tarai dia ga pait ia i ngala ta ra kaina mangamangana kai Sodom,
Nina di ga vue pukue vue da ta ra kopono pitu mata, ma pa ta lima i ra tarai i ga bili ia.
7 Kana umana luluai dia ga barabara tuna, ma ra tava pata; dia ga pua tuna, ma ra polo na u pa i pua damana;
A paka i diat i ga mong ma ra bo na nilaun, ma i ga bagabagele da ra ngatngat na vat;
8 Go ra mata i diat i korakorong ma ra teke na mi pata; vakir da nunure diat ta ra lavur nga;
A pal a paka i diat i petep ta ra uru i diat; i tar maranga, i tar da ra davai.
9 Diat ba ra pakat na vinarubu i ubu diat, dia ti doan ta diat ba dia virua ta ra mulmulum;
Tago go diat dia kuvakuvoro, tago dia iba upi ra vuai ra uma.
10 A umana vavina, a umana tena varmari, dia tar kabalane ra umana natu i diat;
Dia ga da ra adia magit na nian ta ra e ba ra vinirua i ga tadav kaugu tarai.
11 A Luluai i tar pait ot pa kana karangap na kankan, i tar lolonge kana nginangal na kulot;
Ma i tar vautunge ra iap aro Sion, ma ra iap i tar vaimur ra vunapaina.
12 A umana king ta ra rakarakan a gunagunan ma ra tarai par dia ki ra pia pa dia kapupi ia,
Ba ra tena vargegelenai ma ra ebar dir a olo ta ra mataniolo Ierusalem.
13 Tago kana umana propet dia ga varpiam, ma kana umana tena tinabar dia ga rara,
Ma dia ga ubu ra umana tena takodo tana.
14 Dia pepere da ra umana pula ta ra lavur nga, a gap i vadur diat.
Ma damana i dekdek upi ra tarai diat a bili kadia mal.
15 Dia biti ta diat: Avat a vana! A umana dur! Avat a vana! Avat a vana! Koko da varbili!
Ba dia vilau ma dia tenten vurvurbit, ra tarai dia biti pire ra umana Tematana: Koko diat a kiki mulai ati.
16 A mata i ra Luluai iat i tar korot varbabaiane diat; pa na nuk pa mule diat;
Pa di ga ru ra umana tena tinabar, pa di ga mari ra umana patuana.
17 A mata i dat i gavul boko ma ra ginigira upi ra tena maramaravut vakuku;
Ba da ga makmakila, da ga ki pa ra tarai ba pa i topa diat upi diat a valaun dat.
18 Di tikan mur ra pal a kau i dat ma i dekdek ba dat a vana ta kada lavur nga.
A mutuai dat i tar maravai, kada kilala i tar ot; tago ra. mutuai dat i tar pot.
19 Diat dia korot mur dat dia lulut tuna, ra umana minigulai liu pa dia lulut damana.
Dia ga korakorot dat ta ra lualuana, dia ga kiki uai upi dat ta ra pupui.
20 A vuvu na bilau i dat, nina ra Luluai i ga tar ku ia, i tar virua ta kadia umana ubu;
Nina da ga biti ure dari: Livuan ta ra umana vuna tarai dat a laun ta ra maluruna.
21 Una gugu ma una ga, natu i Edom, u ba u ki ta ra gunan Us;
Ra momamomo na tadav u bula; una longlong boko ma ra nimomo, ma una ga pala vue kaum mal.
22 Natu i Sion, i tar par ra balbali ure kaum varpiam; pa na kap vavilavilau vue mule u;
Natu i Edom, na bali kaum kaina papalum; na vaarike kaum varpiam.