3
Anutuwaa gawoŋ meme ejemba
1 Oo uumeleeŋ alauruna, oŋo naamade kaaŋa Kraistwo qokotaaŋ naŋgi. Kawaajoŋ niinoŋ oŋo balombaa nanamemeŋ metetereeŋkejutiwaa tani Buŋa qaa jeŋ asariŋ oŋoma batugianoŋ laligowe. Uŋa Toroyanoŋ sololooŋ oŋono laligojutiwaa tani kaaŋa iŋijomambaajoŋ amamaaŋ laligowe.
2 Niinoŋ qaa moma asariwutiwaa so aju apuya kaaŋa uŋuagiŋ laligowe. Nene hoŋa nenetaa so mende koloogitiwaajoŋ qaakeemeyaii mende oŋombe. Kambaŋ iikanoŋ nene hoŋa newombaa amamaagi ano kambaŋ kokaamba kaaŋagadeeŋ ii saanoŋ mende neŋkeju.
3 Oŋo toroqeŋ balombaa nanamemeŋ bologa metetereeŋ laligoju. Oŋo uugianoŋ uunoŋ junjuŋ moma aŋgowowo ama qaa jejegianoŋ nuuguna guuguwe amakeju. Kaeŋ aŋgi uu selewaa siiŋgia kombombaŋa bologanoŋ galeŋ koma oŋono uumeleembaa gadokopa ejemba omaya yoŋoo tanigiaeŋ kolooŋkeju.
4 Tosaaŋa oŋonoŋ kokaeŋ jeŋkeju, “Nono Poolwaanoŋ qaa otaaŋkejoŋ.” Tosianoŋ kokaeŋ jeŋkeju, “Nono Apoloswaanoŋ qaa otaaŋkejoŋ.” Kaeŋ kaeŋ jeŋ mono baloŋ ejemba omaya kolooŋkejutiwaa tani kaaŋa laligoju.
5 Apolosnoŋ moroga kolooja ano Pool niinoŋ moroga koloojeŋ? Noronoŋ mono Anutuwaa gawoŋga meŋ laligojo. Poŋnoŋ noroojoŋ gawoŋ aŋa aŋa noronoti, iikawaa so ilaaŋ oŋoni uugia meleema Poŋ moma laariŋ laligoju.
6 Niinoŋ kota komowe Apolosnoŋ apu meŋ kaŋ iikanoŋ maaroto, Anutunoŋ mono kondooro toomoriaŋ kolooro.
7 Kawaajoŋ komoroti, iinoŋ qatawo mende kolooja. Apu maaroti, iinoŋ kaaŋagadeeŋ qatawo mende koloojato, Anutunoŋ kotuegoro toomoriaŋa kouma somariiŋkejuti, iinondeeŋ mono qabuŋayawo kolooja.
8 Kaeŋ koloojato, komomakejeŋi ano apu maamakeji, noronoŋ mono so motooŋgo koloojo. Motooŋgo koloojoto, ii kileŋ tawanara ii mono gawonara meŋkejotiwaa so aŋa aŋa mewota.
9 Noronoŋ Anutuwaa gawombaa neŋawoita kolooŋ iwo gawoŋ meŋkejo. Oŋoo uugia ii Anutuwaanoŋ molaleŋ kaaŋa kolooro komakoomo gawoŋa kanoŋ meŋkeja. Anutunoŋ miri kaaŋa uugia inaaŋ mindiriŋ oŋono kotiiŋ waamakeju.
10 Anutunoŋ kaleŋmoriaŋ nonoti, niinoŋ iikawaa so miri memewaa momo eja kaaŋa kolooŋ Anutuwaa tando kombombaŋa uugianoŋ kuuŋ komowe moŋnoŋ iikawaa qaganoŋ miri meŋkeja. Saanoŋ meŋkejato, motomotooŋ nononoŋ miriwaa gawoŋa awaagadeeŋ mewoŋatiwaa so koloojoŋ. Iima kotoŋ mewoŋatiwaajoŋ mono jaa galeŋ meŋ aowoŋa.
11 Uuwaa tandoya ii Jiisas Kraist. Niinoŋ ii mono uugianoŋ komowe moŋnoŋ momalaariwaa tando moŋ mokoloomambaajoŋ amamaawaa.
12 Tando motooŋgo koloojato, iikawaa qaganoŋ tosianoŋ mirigia goul silwanoŋ me jamo hoŋgiawo tosaaŋa kanoŋ meŋkeju. Tosianoŋ mirigia gere kasanoŋ, towo booŋ seŋanoŋ me ganoŋ meŋkeju. Silinana kaeŋ me kaeŋ nama meŋkejoŋi eeŋ,
13 uuwaa gawonanaa hoŋanoŋ mono iyaŋa iyaŋa asuganoŋ asugiwaa. Poŋnoŋ kambaŋanoŋ kaŋ kuuro iikanoŋ mono miri merotiwaa esuya luluumbaa. Miri esunananoŋ mono Anutuwaa gere bolaŋanoŋ asugiro jeŋ kamaaro hoŋanoŋ asuganoŋ iibombaa so koloowaa. Gere iikanoŋ mono motomotooŋ nonoo mirinanaa tania hoŋa ii aŋgotetenoŋ ama gosiwaa.
14 Gerenoŋ jeŋ miri kuuya gosiŋ oŋono megi hoŋgianoŋ kotiiŋ nambuyati eeŋ, iyoŋonoŋ mono gawoŋgiaa tawaya buŋa qeŋ aowuya.
15 Tosianoŋ mirigia megi hoŋgianoŋ jeŋ kamaawuti eeŋ, iyoŋonoŋ mono tawa qaagoto, tiwitiwilaa mokoloowuya. Ii mokoloowuyato, iyaŋgio kileŋ Siwewaa buŋaya laligowuya. Gere bolanoŋ jeŋ oŋooro iikawaa tani uuguwombaajoŋ janjariŋ riiŋ kok koŋgi Anutunoŋ metogoŋ oŋono Siwenoŋ ubuya.
16 Oŋoaŋgio Anutuwaa Buŋa jigo (tempel) koloogi Anutuwaa Uŋayanoŋ uugianoŋ laligoji, ii moju me qaago?
17 Anutuwaa Buŋa jigoya ii kowoga kolooji, iikawaa so oŋonoŋ soraaya kolooju. Kawaajoŋ moŋnoŋ Anutuwaa jigo meŋ boliji eeŋ, Anutunoŋ mono iyaŋa meŋ boliŋ mubaa.
18 Moŋnoŋ aŋaa baloŋ momoya otaaŋ tiligoŋ aowabo. Oŋoo batugianoŋ moŋnoŋ iyaŋaajoŋ moro “Balombaa momakooto uuta meŋ laligojeŋ,” jeji eeŋ, iinoŋ mono wala uuta qaa kolooŋ iikaaŋa kanoŋ momakooto hoŋa mokoloonaga.
19 Anutunoŋ balombaa momakooto uuta iikawaajoŋ moro uugia qaa yoŋoo qaaga kolooja. Iikawaa qaaya Buŋa Terenoŋ kokaeŋ oogita eja, “Anutunoŋ momakooto uuta meŋ laligojuti, ii gbadooŋ oŋono iyaŋgiaa momo aiŋgianoŋ sipasipa koma osiwuya.”
20 Kawaa qaaya moŋ ii kokaeŋ eja, “Poŋnoŋ momakooto ejemba yoŋoo momo areŋgiaajoŋ moro omaya kolooja.”
21 Kawaajoŋ oŋoonoŋga moŋnoŋ mono ejemba nonoojoŋ ama selia meŋ ubabo. Kuuya nononoŋ mono oŋoo buŋaga koloojoŋ.
22 Pool, Apolos, Piito nononoŋ mono oŋoo buŋaga koloojoŋ. Ejemba baloŋ so laligojoŋi, nononoŋ mono kuuya oŋoo buŋa koloojoŋ. Kawaajoŋ saanoŋ qaa ii me ii gosiŋ meŋ iikaaŋa kanoŋ laaligogia laligowuya ano koomugia komuwuya. Kambaŋ kokaamba laligojoŋi, kuuya nononoŋ mono oŋoo buŋa koloojoŋ ano kanageŋ gawoŋ meme ejemba laligowuyati, iyoŋonoŋ mono kaaŋagadeeŋ oŋoo buŋa koloowuya.
23 Kaeŋ kolooŋ oŋonjonto, oŋonoŋ Kraistwaa buŋa koloogi Kraistnoŋ Anutuwaa buŋa kolooja. Kiaŋ.