22
Laaligo kotigaa apu gowoya iibe.
1 Kawaa gematanoŋ Siwe gajoba iikanoŋ laaligo kotigaa apu jaaya qendeema nono Anutu ano Lama meria yoroo jiŋkaroŋ duŋnoŋga ujuŋgoŋ kaŋ apu gowoya kolooro. Kawaa apuya ii kaaro jokaŋa jokaŋa kokobilibiligiawo meleema asariŋkejuti, mono iikawaa so tualalakota kolooro.
2 Apu gowoya iikanoŋ sitiwaa kana somatanoŋ kamaaŋ biiwia metetereeŋ kotoŋ karo. Apu gowoyaa goraayanoŋ leelee kanoŋ laaligo kotigaa gereya ii nano. Gere iikawaa hoŋanoŋ mono gbani so somaŋa 12, ii koiŋ motomotoombaa uutanoŋ kolooŋkeju. Gere iikawaa seŋanoŋ mono kantria kantria ejembanoŋ qeeaŋgo mokoloowutiwaajoŋ ama nanju.
3 Moŋnoŋ moŋ mende toroqeŋ alia seigoŋ qasuaawaa. Anutu ano Lama meria yoroo jiŋkaroŋ duŋgaranoŋ mono siti iikanoŋ ero Lama meriaa gawoŋ meme ejembaurutanoŋ weleŋ qeŋ muŋkeju.
4 Weleŋ qeŋ muŋ jaasewaŋa iima Anutuwaa qata wambusooŋgianoŋ meŋ mokotaagi ewaa.
5 Gomaŋ mende toroqeŋ tiiwaa. Poŋ Anutunoŋ meŋ asariŋ oŋomakejiwaajoŋ kiwa asasagaajoŋ me weeŋ asasagaajoŋ mende amamaawuya. Kaeŋ oyaŋboyaŋ laligoŋ kambaŋ so tetegoya qaa kiŋ poŋ kaaŋa galeŋkoŋkoŋ gawoŋ meŋ laligoŋ ubuya.
6 Ii iibe Siwe gajobanoŋ kokaeŋ nijoro, “Buŋa qaa mojaŋi, iikanoŋ mono hoŋa tooŋ uuwoiya qaa kolooja. Poŋ Anutunoŋ gejatootoo ejemba sololooŋ oŋomakeji, iinoŋ mono Siwe gajobaya nii wasiŋ nono asugiŋ goma laligowe. Iwoi kuuya uulaŋawo koloowutiwaa so anji, momalaari ejembaurutanoŋ ii mobutiwaajoŋ ii asugiŋ qendeema gombe.” Kiaŋ.
Jiisasnoŋ mombo eleema kawaa.
7 Jiisasnoŋ jeja, “Mobu, niinoŋ mono uulaŋawo eleema kamaŋa. Tosianoŋ buk kokawaa gejatootoo qaaya buŋa qeŋ qokotaaŋkejuti, iyoŋonoŋ mono simbawoŋawo kolooju.”
8 Jon niinoŋ Buŋa qaa koi moma jaana meleeno uŋaya iibe. Ii iima modaboroŋ Siwe gajobanoŋ uŋa koi qendeema nonoti, niinoŋ iwaa waeya meŋ mepeseemambaajoŋ moma namonoŋ kamaaŋ kanianoŋ simiŋ kumbe.
9 Simiŋ kumbeto, kokaeŋ nijoro, “Ae! Kaeŋ mende amba. Niinoŋ gii ano gejatootoo alauruga ano ejemba buk kokawaa Buŋa qaaya buŋa qeŋ qokotaaŋkejuti, mono kuuya oŋoo kooroŋgianoŋ nama motooŋ Anutu weleŋ qeŋ muŋkejoŋ. Niiga qaagoto, mono Anutu waeya meŋ mepeseeŋkeba.”
10 Kaeŋ jeŋ kokaeŋ nijoro, “Kambaŋ torija. Kawaajoŋ buk kokawaa gejatootoo qaayanoŋ aasaŋgoyanoŋ ewabotiwaajoŋ ii papia-noŋ oowato, ii mono muŋgeŋ aasonoŋ (siil) mende qokotaawa.
11 Bologa meŋkeji, iinoŋ mono toroqeŋ kaeŋ meŋ kileqileewa. Tilooŋ laligoji, iinoŋ mono toroqeŋ tilooŋ aŋgonjorayawo kolooŋ laligowa. Nanamemeŋ dindiŋa amakeji, iinoŋ mono toroqeŋ dindiŋagadeeŋ ama meŋ laligowa. Soraaya kolooŋkeji, iinoŋ mono toroqeŋ soraaya totooŋ kolooŋ laligowa.” Siwe gajobanoŋ kaeŋ nijoro.
12 Jiisasnoŋ jeja, “Mobu, niinoŋ mono uulaŋawo eleema kamaŋa. Kamaŋati, iikanoŋ mono tawagia meŋ kamaŋa. Nanamemeŋgia ama meŋ laligogiti, mono ii gosiŋ iikawaa so tawagia motomotooŋ oŋomaŋa.
13 “Niinoŋ kanakanaiyanoŋ mutuya laligoŋ (iwoi kuuya mokolooŋ kanageŋ jewe qaono) tetegoyanoŋ konoga kolooŋ laligomaŋa. Iikawaa so niinoŋ A ano Z, tere nemuŋa mutuya ano tetegoya koloojeŋ.
14 “Niinoŋ ejemba malekugia galeŋ komakejuti, iyoŋoojoŋ kiropo naguya horowe saanoŋ siti uutanoŋ ugi mende aŋgoŋ koma oŋombe laaligo kotigaa gere hoŋa newuya. Kawaajoŋ opo malekugia galeŋ koma soŋgbamakejuti, ejemba iyoŋonoŋ mono simbawoŋawo ano oyaŋboyaŋ kolooju.
15 “Yoŋonoŋ oyaŋboyaŋ mokoloowuto, tosaaŋa yoŋoojoŋ nagu koma somoŋgowe seleeŋgeŋ laligowuti, ii ejemba koi kaaŋa: Kasu kaaŋa serowiliŋ ama oweŋ hamoqeqe amakeju. Serowiliŋ ama ejemba uŋugi komuŋkeju. Tando lopioŋ waegia meŋ mepeseeŋkeju ano aŋgomokolombaa siiŋa moma ii amakeju. Ejemba kaaŋa kuuya ii mono kiropo seleeŋgeŋanoŋ laligowuya.
16 “Jiisas niinoŋ gajobana wasiwe liligoŋ uumeleeŋ kanageso oŋoojoŋ gejatootoo qaa koi naŋgoŋ iŋijoŋkebaa. Niinoŋ kiŋ Deiwidwaa wanjaleya ano mundaŋa koloojeŋ. Niinoŋ gomaambawaa widia asamararanawo kolooŋ asariŋkejeŋ.” Jiisasnoŋ kaeŋ jero.
17 Uŋa Toroya ano emba buŋaya yoronoŋ kokaeŋ jeŋkejao, “Jiisas, gii mono kawa.” Kaeŋ jeri mobuti, oŋo mono kaaŋiadeeŋ kokaeŋ jewu, “Jiisas, gii mono kawa.”
Moŋnoŋ apuwaajoŋ moji, iinoŋ mono kawa. Moŋnoŋ laaligo kotigaa apuwaajoŋ siiŋa moji, iinoŋ mono kaŋ ii kaleŋga aŋaliŋ aŋgoŋ komba. Kiaŋ.
Galeŋ meme ano jojopaŋ qaa tetegoya
18 Niinoŋ buk kokawaa gejatootoo qaaya mobuti, kuuya oŋoojoŋ galeŋ meme qaa kokaeŋ jejeŋ: Moŋnoŋ gejatootoo qaa koiwo qaa moŋ toroqeŋ jewaati, lombo kanjaŋawo koloowaatiwaa qaaya buk kokanoŋ ooweti, Anutunoŋ ii mono iwaa qaganoŋ ano ubaa.
19 Moŋnoŋ buk kokawaa gejatootoo qaaya iikanoŋga qaa moŋ qetegowaati, Anutunoŋ mono ii aŋgoŋ kono laaligo kotigaa gere hoŋa mende neŋ siti toroyanoŋ mende ubaa. Iikawaa qaaya Anutunoŋ somoŋgoro buk kokanoŋ ooweto, qaa iikanoŋ mono iwaanoŋ hoŋawo mende koloowaa.
20 Buŋa qaa koi naŋgoŋ jeji, iinoŋ kokaeŋ jeja, “Qaa ii oŋanoŋ. Niinoŋ mono uulaŋawo eleema kamaŋa.”
Kaeŋ jero niinoŋ kokaeŋ jejeŋ, “Qaa ii oŋanoŋ. Oo Poŋ Jiisas, gii mono kawa.”
21 Poŋ Jiisaswaa kaleŋmoriaŋanoŋ mono kuuya oŋowo ewa. Qaa ii oŋanoŋ.