15
Sa Hokuni Yesus Ile Hum Pailat
(Matyu 27.1-2; 27.11-14 pe Luk 23.1-5 pe Jon 18.28-38)
1 Idu maping ndre lik ti pe su pris mandra‑ane, sa lau mandra‑ane odo lotu, pe su sape ndramat odo lo, ndrodan ndre su jas ndre sulo‑on ta su Yuda, heduwe tawene ile ke sih. Pe su hehndrusi lumwen Yesus ile osukei inum pe hokuni Iy ile um tam Pailat.
2 Pailat ihndremte Yesus ihpah, “Ou ti king ta su Yuda, erih?”
Yesus ipe ihpah, “Ihpa ndre Ou andripa tih.”
3 Su pris mandra‑ane henehtuduwen Yesus ile nolou taheweh sulo‑on,
4 ile pe Pailat ihndremte Iy petsih yi, “Ou we esei Ou ndre pwi? Endre‑et oh, su heduwe nolou hudut inna puli‑im.”
5 Odoke Yesus kolon ke ndruwot. Pailat idawene hudut, pe imesi‑iy idu ke kolon.
Pailat Ipe Yesus We Kimet Kile Kei Tondrih
(Matyu 27.15-26 pe Luk 23.13-25 pe Jon 18.38—19.16)
6 Into lon krismas sih sih, eri Pailat ineruwyon ndramat homou odo kadapus. Iy si kadapus ndre sa lau hereh idu tadan, eri Pailat ineruwyon iy ina‑au, into mundrun ndre su Yuda hantawanon rang ndre Lapan ihnuwii su odo Isip tih.
7 Eri pe idu mundrun kudu, eri sa lau se hodo kadapus. Su lau erti heruruwon sane odo Yerusalam pe hapwi ndramat homou imet. Orngon homou rangan Barabas idu lon rurrou kuti yi, ile pe iy ti ke imin kadapus.
8 Ile pe sa sulo‑on ka hala hun Pailat pe hehndremte, hapa iy kah kiruwyon homou kadapus ke‑eu.
9-10 Pailat ti tunon ihpa ndre Yesus ti indripo hangka‑an mo‑on pwi. Su pris mandra‑ane kopwi lon ndrinen su inei ke porah ile Tadan. Ile pe Pailat ihndremte su ihpah, “Oduu waso‑o’ oduu atpa yu kuruwyon king odo Yuda ke‑eu?”
11 Odoke su pris mandra‑ane hetsulke londrine’ sa lau, ile pe sa hoyuw ile tam Pailat ihpah, “Odu waso‑o’ odu ou eruwyon Barabas.”
12 Pe Pailat ihndremte su, “Pe Iy lau ndre oduu atpa king ta su Yuda ti yu kupu sa kile Tadan?”
13 Su hasangar ihpah, “Opo nilim Iy kile kei tondrih!”
14 Pailat ipe ile ta su yi ihpah, “Odoke Iy ipu sa mo‑on?”
Odoke su hedehel pe hasangar puko‑on lakopwi ihpah, “Opo nilim Iy kile kei tondrih! Opo nilim Iy kile kei tondrih! Opo nilim Iy kile kei tondrih!”
15 Pailat ipe kipasi sa lau, ile pe iy iruwyon Barabas ihpa ndre su hereh tih. Iy ipe, pe su soldia odo Rom hapwi Yesus ile wisiu. Inum pe iy iduwe Yesus ile lumwe’ su soldia, pe ihtakalan su hokuni Iy kile pe holpo nilim Iy kile kei tondrih.
Su Soldia Odo Rom Hepsen Osukei Pudon Hopus Pe Heduwei Imin Palan Yesus
(Matyu 27.27-31 pe Jon 19.2-3)
16 Su soldia hokuni Yesus ile lon sariy odo um tam Pailat, pe heyuwen su soldia ndre sulo‑on hala.
17 Su heduwe kolos sih rama‑an ile mundren, inum pe su hepsen osukei pudon hopus pe heduwei ile palan.
18 Inum pe su hoyyuw illa Tadan ihpah, “Maping Tadam, king ta su Yuda!”
19 Su hokuni kei pe heneruson ile palan, pe hena‑amburnguh ile Tadan. Su hentawe pandrulku‑u’ su illa pwoi odo purmadan pe hompo ruru ile Tadan.
20 Su hetulyan Iy ihmo‑on oh, pe ndre ilnum ti su hedaso‑o kolos rama‑an ti iyeu odo mundren yi, pe heduwe yi ndre kolson ti ile mundren. Ndre ilnum pe su hokuni Iy odo lon sariyen um tam Pailat ile kiu, pe ka we holpo nilim Iy kile kei tondrih.
Su Hopo Nilim Yesus Ile Kei Tondrih
(Matyu 27.32-44 pe Luk 23.26-43 pe Jon 19.17-27)
21 Su hahrah tan orngon homou rangan Saimon. Iy ti odo taon Sairini. Iy ipe kile Yerusalem odoke su soldia hehkikiyan iy pe iy isursor kei tondrih ta Yesus. (Saimon kuti ndre nedun Aleksenda horu Rufus tih.)
22 Su hokuni Yesus ile lok ndre sa heneyuwen ile Golgota. Mining tan Golgota ti ‘Ndruhun Palndramat’ ile nolou Aram.
23 Su hehir Golgota ti pe hotou wain ile ta Yesus hapa Iy ki‑ing. Wain kuti marsin idu lon, pe sa heni‑ing odo we kihnan mundrei ngendre‑en kinum. Odoke Yesus indri‑ing pwi.
24 Eri pe su soldia kah hopo nilim Iy ile kei tondrih, inum pe hedotinen idu eleng. Inum pe su hopo ndruwot laki ile kolos Tadan.
25 Mundroi ti kah idu ihpa ndre 9 kilok maping, pe su soldia hopo nilim Yesus ile kei tondrih.
26 Pe sa heduwe kei hendrek malahan idu padan kei tondrih. Kei malahan erti sa hopo nilim ise pule‑en Yesus. Pe sa hadatorwe rong sa ndre Iy ihnan ti iyin eriy. Sa hadatorwei ihpah, “King Ta Su Yuda.”
27 Sa hopo nilim horu lau rumuu mo‑o’ horu yi. Homou idu kei tondrih he‑ei idu mudon, pe homou idu kei tondrih he‑ei idu kamweu, pe Yesus idu ndrokoron.
28 Ile pe nolwo‑on Lapan iyin buk ti ihir ndre ndrokene. Nolou erti ipe ihpah, “Pe sa hondrumon Iy yi ndroda sa lau mo‑osa!”
29-30 Sa lau ndre henehrik sal ti madan sa ile ta Yesus ingakik ise kei tondrih ti pe henehngunguu Iy pe hampa ihpah, “Apa yi puko‑om ti ka asa pwoi! Ou apa we etparan omwen surok mandra‑an odo Yerusalem oh pe otmon yi kidu ke rang tul, eri pe ka asa pwoi pe amat kolwii.”
31 Su pris pe su tisa odo Lo yi ti hampa ihpa ke eriy. Su ke ndre su henesohou into lenga’ su pe henehngowen Iy. Pe su hampa ihpa, “Iy inahnan sa lau se hala huyen, odoke Iy ndre Iy ti kindranon kindrehnuwii Iy pwi.
32 Ipe ye Iy ti Kristus pe Iy king odo Israel ti eri kah kise pwoi odo kei tondrih, kile pe tidu titpo bilip kile Tadan.” Horu lau ndre sa hopo nilim horu ile ndrodan Iy ti heruson poh idu pule‑en yi.
Yesus Imet
(Matyu 27.45-56, pe Luk 23.44-49 pe Jon 19.28-30)
33 Idu 12 kilok ti pe lik ihir lok ndre mandra‑an. Lik ti idu aua ihndre toloh.
34 Idu 3 kilok ti pe Yesus ideng puko‑on ile nolou Aram ihpah, “Eloi, Eloi, lama sabaktani?” Mining tadan ti ihpah, “Lapan Todo, Lapan Todo, Ou andra‑au Todo ti ile sa?”
35 Sa lau se ndre hodo mukehe ti hehrungi Yesus iyuw pe hapa ihpah, “Atahrung oh, Iy ti iyyuw ile tan Elaijah.”
36 Ile pe orngon homou iporitai itlaman palan kolau ile lon wain tudo‑on, inum pe ihndrusi ile palan kei sehir, pe itou ile pohon Yesus, ipe Yesus ki‑ing. Orngon eti ipe ihpa, “Otto oh. Kihne Elaijah kise pe kikuni Iy kile pwoi.”
37 Odoke Yesus idehel sehir kopwi, pe imet.
38 Idu ke ndre Yesus imet ti pe kolau mandra‑an ndre ingkakik pe issorohe rum nembruwen lakopwi odo lon omwen surok mandra‑an odo Yerusalam ti iseket ile ndre rumbrul, idu eleng uu pe ile ndre poi.
39 Pe kapten ta su soldia ndre hapwi Yesus ti indre‑et ile mat ta Yesus ti ipe ihpah, “Ndre ndrokene lakopwi, Iy lau kurti Nedun Lapan!”
40 Su pedih se hodo ke ndre mahun pe henendre‑et. Su se odo lo’ su pedih kuti eri Maria odo taon Makdala, pe Maria homou yi. Iy Maria kuti tinen Josep pe Jems lehyen tih. Salome ti idu lenga’ su pedih kuti yi.
41 Odo Galili, eri su pedih kuti henehnuwii Yesus. Sa pedih sulo‑on ndre ho‑us Iy hasa Yerusalem ti hodo pe henendre‑et yi.
Su Heduwe Yesus Ile Ngat
(Matyu 27.57-61 pe Luk 23.50-56 pe Jon 19.38-42)
42-43 Lok ti kah pehon odo rang Paraide. Kah mukehe kopwi pe Sabat kah kihir. (Sabat ti into Paraide mundroi ile pwoi uu pe ilento ndre Sarere pehon mundroi ile pwoi.) Idu pehon Paraide eriy, orngon homou rangan Yosep ile. Yosep ti iy odo taon Arimatea. Iy ti lau mandra‑an homou odo lo’ su lau ndre ndrotulngeh ndre hetpris ine‑en munen su pe su hempunuwon mandro‑o’ su Yuda tih. Iy ti lau huyen, pe ingkeli‑iy kapman ta Lapan. Ile pe iy indrinoh pwi. Iy ile hun Pailat pe ihndremte ipe kikuni Yesus pe kiltonii.
44 Pailat ihrung ihpa ndre Yesus ti indrimat eri pe iy ihretek. Iy ipe kihne Yosep kintaheweh, ile pe iyuwen kapten ta su soldia ti pe ihndremte iy, pe kapten inen ndralngan.
45 Pailat ihrung suhwon kapten inum pe iy ipe ile ta Yosep ihpah, “Huyen, Iy ke indrimat ndre ndrokene. Ou ka ala pe okuni Iy kise pwoi pe eltoni Iy.”
46 Yosep isihnen kolau hapal mandra‑an. Inum pe iy ile pe ikuni Yesus ise pwoi pe ipulngi Iy ile kolau kutih. Ndre ilnum pe iy iltawe Iy ile ngat sih, sa hali ise padan pat. Inum pe Yosep ikotitye‑en pat hene malahan pe mandra‑an isorohe madan ngat.
47 Maria odo Makdala pe Maria ndre tinen Yosep ti horto pe herenendre‑et, ile pe horu ti tuno’ horu lok kehe ndre hedoni Yesus idu eriy tih.