15
Kiristo kuꞌum vuꞌugir la yela
1 M baꞌabiise, nannanna m bood ye m tienn ya labasuŋ kan ka m da mooli tisi ya, ka ya diꞌe li mor kiŋ kiŋ la yela.
2 Ya yaꞌa mor li kiŋ kiŋ, li na faaenn ya. Ka li yaꞌa kaꞌa alaa, ya yadda niŋir ane zaalim.
3 M tolis man diꞌe siꞌeli tisi ya line a buntitaꞌar n gaad siꞌel wusa, ye Kiristo kpi ti tuumbeꞌed zug, ka li dolne lin da sob Winaꞌam gbauŋin siꞌem la.
4 Ka ba da mum o, ka Winaꞌam vuꞌug o kumin daba atanꞌ daar, ka li me dolne lin da sob siꞌem la.
5 Ka o da nie o meŋ n paꞌal Piita, ka naan nie o meŋ n paꞌal Tumtumnib piina ayi la.
6 Ka lin nyaꞌaŋ ka o nie o meŋ saŋa yinni o nyaꞌandolib bane gaad kobus nu la saꞌan. Ba sieba bedego nan voe, ka sieba kpi.
7 Ka o nie o meŋ Jemes saꞌan, ka yuꞌun nie o meŋ Tumtumnib la wusa saꞌan.
8 Lin wusa nyaꞌaŋ ka o nyaan nie o meŋ paꞌal man one wenne one ka ba yuolim duꞌa la.
9 Mane a kpaanr Tumtumnib la wusa saꞌan, ka pu nar ka ba buoli m ye Tumtum na, man da namis Winaꞌam nidib la zug.
10 Winaꞌam popielim zug ka m kilim man a siꞌem nannanna nwa. Ka popielim kan ka Winaꞌam tisi m la kaꞌ zaalim, ka man tum gaad bama wusa. Ka li daa kaꞌ m meŋi tumi lii. Winaꞌam popielim zug ka m daa nyaŋe tumi li.
11 Dinzugo, li yaꞌa daa ane man one moon labaar la bee ban, ti wusa moon labaar line ka m pun tienn ya li yela, ne line ka ya daa siak la.
Ti kuꞌum vuꞌugir la yela
12 Ka ti labaar yaꞌa a ye Kiristo vuꞌug kumin, wala ka ya sieba yel ye, bane kpi ku vuꞌug kumine?
13 Ka li yaꞌa a sida ye bane kpi ku vuꞌug kumine, ala li paꞌale ye Kiristo da pu vuꞌug kumine.
14 Ka Kiristo yaꞌa da pu vuꞌug kumine, alaa ti labasuŋ la moolug ane zaalim, ka yanam yadda la me a zaalim.
15 Li yaꞌa a sida ye bane kpi pu vuꞌugid kumine, ala Winaꞌam da pu vuꞌug Kiristo kumine, ka lin paꞌal ye tinam maꞌade ziri Winaꞌam yela, tiname yel ye Winaꞌam vuꞌug Kiristo kumin la zug.
16 Bane kpi yaꞌa pu vuꞌug kumine, ala Winaꞌam da pu vuꞌug Kiristo kumine.
17 Ka Kiristo yaꞌa pu vuꞌug kumine, ya yadda niŋir la ane zaalim, ka ya tuumbeꞌed kpelim bee ya ni.
18 Li me na paꞌal ye bane a Kiristo yadda niŋidib ka kpi la, bodigne.
19 Ti yaꞌa mor tiꞌir Kiristo ni ti dunia beilim nwa, ti mor nimbaanligi gat soꞌ mekama dunia ni.
20 Amaa neꞌeŋa ane sida ye Winaꞌam vuꞌug Kiristo kumin, ka o sid a one vuꞌug kumin yiiga.
21 Din a ninsaal yinni n mor kum n kenn dunia ni la na, ala men kum vuꞌugir yine ninsaal yinni ni na.
22 Adam zug ka nidib wusa kpiid. Ala men ka bane a Kiristo nidib na vuꞌug kumin.
23 Amaa soꞌ mekama mor o saŋa, ka Kiristo n vuꞌug kumin yiiga, bane aa o nidib me na ti vuꞌug o ken daar la na.
24 Dunia naar na kenn Kiristo lebig nyaꞌaŋ na, ka Kiristo na saꞌam bane soꞌe dunia nwa paŋ ne kpiꞌeuŋ dim ne naꞌanam wusa paŋ, ka zaŋ soꞌolim la yuꞌun lebisi tisi o Baꞌ Winaꞌam.
25 Bozugo li ane tilas ye Kiristo di naꞌam hale ti paae saŋkan ka o dataas wusa na be o nuꞌusin.
26 Kuꞌum ane dataa kane ka o na ti yuolim saꞌam.
27 Li yel Winaꞌam gbauŋin ye, “Winaꞌam zaŋ siꞌelnam wusa n niŋ Kiristo nuꞌusin.” Amaa li pu paꞌal ye siꞌelnam wusa la paas Winaꞌam one lee zaŋ siꞌel mekama wusa n niŋ Kiristo nuꞌusin laa.
28 Siꞌelnam wusa yaꞌa ti be Kiristo nuꞌusin, on one a Winaꞌam Biig la me na niŋ o meŋ Winaꞌam nuꞌusin. Li ane Winaꞌam one zaŋ siꞌelnam wusa n niŋ o nuꞌusin la. Ka Winaꞌam na a siꞌelnam wusa naꞌab.
29 Nidib yaꞌa ku vuꞌug kuminee, bo ka ninsieba diꞌed kuꞌom suub tisid bane pun kpi la? Kuꞌum yaꞌa kudin ku vuꞌugi, bo ka ba niŋid neꞌeŋa?
30 Ka bo ka ti kpenꞌesidi ti meŋ yela ni saŋa wusa?
31 M baꞌabiise, m nweꞌed nyoꞌog ya yela, yanam be siꞌem Zugsob Yesu Kiristo ni la zug. Neꞌeŋa zug ka m yeti ya ye m pu lal ne kuꞌum daar wusa la.
32 M daa nye yela Efesus teŋin wenne one zab ne gbigima ne, ka lin yaꞌa a dunia nwa yela maꞌaa, li nyood a bo? Kuꞌum yaꞌa pu vuꞌugida, siiliŋ la yel sida ye,
“Keli ka ti di ka nu,
ka beog ti saa kpiidne.”
33 Da ke ka soꞌ maꞌa yaa. Siiliŋ ane sida ye, “Dolim taab beꞌed saꞌamid ninsuŋ.”
34 Keli ka ya yaꞌam leb na, ka da lem tum tuumbeꞌede. Sieba ziꞌ Winaꞌam. Ka m sobid ye m diisi ya nyan.
Niŋgbiŋ kuꞌum vuꞌugir la yela
35 Ka soꞌ na buꞌos ye, “Wala ka bane kpi la na ti vuꞌug kumine? Niŋgbiŋ bo buudi ka ba na ti mora?”
36 Zoluga! Fu ziꞌ ye fu yaꞌa but siꞌel biili ka li bul, asee pak la punꞌe ka bul la yuꞌun vuꞌugi?
37 Fun but siꞌel la kuduŋ ane biilif. Li tunꞌe a ki biilif bee biil sieba. Ka lin ka fu but la niŋgbiŋ ku wenne line na ti yi na laa.
38 Amaa Winaꞌam tisid biilif kan ka fu but la ne on Winaꞌam bood niŋgbiŋ siꞌa, ka me tisid biilif buudi wusa niŋgbiŋ konꞌob konꞌob.
39 Li kaꞌ niŋgbina wusa n wen na. Ninsaalib more niŋgbiŋ buudi yinni, ka bunkonbid me niŋgbina bee li konꞌ, ka niis niŋgbina me bee li konꞌ, ka zimi me niŋgbina bee li konꞌ.
40 Saazug bunam more ba meŋ niŋgbina, ka dunia bunam me more ba meŋ niŋgbina. Venlim be saazug bunam niŋgbina la ni, ka venlim me be dunia bunam niŋgbina la ni.
41 Winig mor o meŋ venlim, ka nwadig me mor venlim siꞌa. Ka nwadibibis venlim me bee li gunni. Hale nwadibibis la soogin ba venlim be gun gun.
42 Ala ka li me na ti a kumvuꞌugir saŋa. Niŋgbiŋ yaꞌa sig teŋin, li punꞌodne. Amaa Winaꞌam yaꞌa ti vuꞌugi li, li pu punꞌoda.
43 Kuꞌum mumne ne ziemis, ka na ti vuꞌug ne venlim. Li mumne ne tadimis ka na ti vuꞌug ne paŋ.
44 Li yaꞌa sig teŋin, li ane dunia ni niŋgbiŋ. Amaa Winaꞌam yaꞌa ti vuꞌugi li, li ane arazana ni niŋgbiŋ. Ti mor niŋgbina line a dunia ni din. Ala men ti na ti mor niŋgbina line a arazana ni din.
45 Li sob Winaꞌam gbauŋin ye, “Adam ane niŋkane da deŋi be yiiga.” Yesu one a niŋkane kpelim nyaꞌaŋ la ane siig one tisid nyovur.
46 Li kaꞌ arazana ni niŋgbina la ka ti diꞌed yiiga. Ti diꞌed dunia ni din la yiiga, ka naan diꞌed arazana ni din.
47 Winaꞌam da maal deŋir dau, Adam la, ne teŋ titan. Amaa dau one tiaꞌal la yi ne arazana ni na.
48 Dunia nidib wusa n wenne nid on ka Winaꞌam da zaŋ teŋ titan maal la. Ka Winaꞌam nidib me wenne nid one da yi arazana ni na la.
49 Tiname wenne nid one ka Winaꞌam maal ne teŋ titan la, ala men ti na ti wenne nid one yi arazana ni na la.
50 M baꞌabiise, neꞌeŋa ka m sobidi yeti ya ye, ninsaal niŋgbina ane dunia ni din, ka ku nyaŋe kpenꞌ Winaꞌam soꞌolim nii. Niŋgbiŋ line punꞌod la ku nyaŋe diꞌe nyovur line kaꞌ naare.
51 Kelisimi yelsuaꞌadir kaŋa. Sieba na kpi, amaa li kaꞌ wusaa.
52 Ka dunia naar, naꞌatan yaꞌa ti pieb, ti wusa na tiak yimmo, wenne nini amisid siꞌem la. Naꞌatan na pieb, ka bane kpi na vuꞌug ne niŋgbina line kudin ku kpii, ka Winaꞌam na tiake ti niŋgbina.
53 Li ane tilas ye dunia ni niŋgbiŋ kane punꞌod la na gaad, ka ti na diꞌe niŋgbiŋ kane pu punꞌoda. Ka niŋgbiŋ kane me kpiid na gaad, ka ti na diꞌe niŋgbiŋ line pu kpiida.
54 Dinzugo neꞌeŋa yaꞌa ti niŋ, ala ka line sob Winaꞌam gbauŋin ye, “Winaꞌam nyaŋ kuꞌum, ka kuꞌum len kaeꞌ la,” na niŋ ameŋa. Li lem sob ye,
55 “Kuꞌum, fu paŋ kane nyaŋed nidib ka toondi ba wenne naŋi yiti tonꞌ nidib siꞌem la be yaa ni?”
56 Li ane tuumbeꞌed ket ka kum nyet paŋ na tonꞌ nidib. Ka li ane wada la ket ka tuumbeꞌed nyet paŋ.
57 Ka ti puꞌus Winaꞌam bareka on tisi ti kum nyaŋer paŋ ti Zugsob Yesu Kiristo ni la.
58 Dinzugo m baꞌabinoŋa, yaname sadigim miꞌ ye bun lin ka ya niŋid Zugsob yela kaꞌ zaalim la, yanam modigimi n ziꞌene kiŋ kiŋ ka kpeꞌeŋi ya meŋ saŋa wusa ya tuuma ni n tis Zugsob la.