12
Yelsuaꞌada line nie Paul saꞌan la yela
1 Li nar ka m nweꞌe nyoꞌog, hale laꞌam ne nyoꞌog nweꞌeb la kaꞌ nyood laa. Ka m ye m pianꞌ siꞌelnam line ka Zugsob la ke ka m nye ka li wenne zaansuŋ ne, ne yelsuaꞌada line ka o ke ka ba nie ka m baŋi ba.
2 M miꞌ soꞌ Kiristo ni, ka yuma piinanaasi line da gaad sa la, ka Winaꞌam da nok o du arazana ni agol. M ziꞌ o sid da du ne, ne o niŋgbinaa, bee o zaansimne nyee lii, Winaꞌam maꞌaa miꞌ.
3 Ka m miꞌ ye niŋkaŋa da du Winaꞌam sumalisim teŋin agol, ka lee ziꞌ ye o sid da du ne, ne o niŋgbina bee o zaansimne nyee lii, Winaꞌam maꞌaa miꞌ.
4 Ka dau la wum siꞌelnam anina, line ka o ku nyaŋe yel, ne line ka ninsaal pu mor suer na yel laa.
5 Ka man na nweꞌe nyoꞌog dau kaŋa yela ka lee ku nweꞌe nyoꞌog m meŋ yelaa. Asee bun line paꞌal ye m ane tadim la yela maꞌaa ka m na nweꞌe nyoꞌog.
6 Ka m yaꞌa boodin ye m nweꞌe nyoꞌog m naan ku aan yalim, man pianꞌadin sida la zug. Ka m lee ku niŋi lii, ka soꞌ ti tenꞌes m suꞌum yela n gaad on nye ka m niŋ siꞌem ne on wum man yel siꞌem la.
7 Siꞌel be m niŋgbinin ka m laafe poꞌog, lin ket ka m pu nyaŋed nweꞌed nyoꞌog ne yelsuaꞌada titada line ka Winaꞌam nie m laa. Ka line zabidi m niŋin la yi ne Sutaana saꞌan na n daamid m ye li ke ka m ku nyaŋe nweꞌ nyoꞌogo.
8 Noor atanꞌ ka m sos Zugsob ye o yiisimi li m saꞌan.
9 Ka o lebisi m ye, “Man yelsum la siak uf, ka fun kaꞌa paŋ saŋsiꞌa la ka m paꞌane m paŋi zem siꞌem.” Dinzug m mor sumalisim ka nweꞌed nyoꞌog ne man pu kpiꞌem la ye Kiristo paŋ na bee m saꞌan.
10 M yaꞌa pu kpiꞌema, bee nidib yaꞌa tuꞌud m bee m yaꞌa nyet yeltood bee namisug bee daamug Kiristo zug, m mor sumalisim. Mam kaꞌa paŋ la, lin ket ka m mor Kiristo paŋ, ka linzug ka m mor sumalisim.
Paul n bood ye Korint dim nye yelsum la yela
11 M niŋid wuu yalim ne. Ka li ane yaname ke ka m aa ala. Yanam naan paꞌalin mam a suꞌum siꞌem. Hale baa m yaꞌa a zaalim, li kaꞌ ye m pu a suꞌum n paae nimbane ka ya tenꞌes ye ba a Tumtumnib ka a suꞌum galis laa.
12 M daa modigi niŋ bunnyalima ne tuumtitada ya saꞌan line paꞌal ye m sid ane Kiristo Tumtum.
13 Ka ya diꞌe yelsum ka li zemis ne Winaꞌam nidib sieba n diꞌe siꞌem la. Yelsum kan maꞌaa ka ya pu diꞌe ane ye, m pu ke ka m meŋ yela daami yaa. M belimi ya ye ya tisi m suguru m taal kaŋa yela.
14 Noor atanꞌ daan nwa ka m tiꞌebid ye m kena kaae ya. M noŋi ya ka bood ye ya me noŋi m, ka pu bood ye m diꞌe ya ligidi, ka ku ke ka m yela daami yaa. Yanam wenne m biis ne. Ka li kaꞌ ye biise na diisi ba saamnama, ka ane ye saamnami na diisi ba biis.
15 M na mor sumalisim ka nok m soꞌolim ne m meŋ wusa n tis, ye m suŋi ya. Man noŋi ya bedego la zugo, yanam na noŋi man biꞌela bee?
16 Ya sieba yet ye, li a sida ye m yela pu daami yaa. Ka ye m lee more yaꞌam, ka nyaŋe ya ne damaꞌam.
17 M daa pu ke ka nimbane ka m tumi ya saꞌan la soꞌ soꞌ zami ya n diꞌe siꞌel ya saꞌan n tisi ma.
18 M daa belim Titus ye o keenn ya saꞌan na, ka ke ka ti baꞌabiig soꞌ laꞌam dol o. Titus daa pu zami ya n diꞌe siꞌela. Bee m maꞌanee? Ka mam ne Titus tum ne potenꞌer yinni, ka dol suer yinni.
19 Ya tenꞌes ye tinam yet neꞌeŋa wusa la, ti mood ye ti pianꞌ yiisi ti meŋ ya saꞌan bee? Ayei, ti pu niŋid alaa. Ti pianꞌad gbauŋin nwa ne Winaꞌam tuon lin ka Kiristo bood ye ti pianꞌ la. Ka li wusa ane ye ti suŋ yanam bane aa ti baꞌabinoŋa la.
20 M zot dabiem ye m yaꞌa keenn ya saꞌan na, m paꞌati nye ka ya pu wenne wuu man boodin ye ya aan siꞌem laa, ka ya me na nye ka mam meŋ ku niŋ wuu yanam boodin ye m niŋin siꞌem la mene. Ka m paꞌati nye ka ya zabid ne taaba ka nyuun, ka ya sunf dued ne taaba, ka ya weligid ne taaba, ka saꞌam ya taaba zut, ka keend taaba, ka niŋid yood yoodi, ka mor nyeesim.
21 M lem zot dabiem ye m yaꞌa lem kena Winaꞌam na diisi m nyan ya tuon, ka m sunf na saꞌam ne ya sieba bane daa tum tuumbeꞌed ka nam pu tiake ba sunya ne tuumbeꞌed ne dianꞌad tuuma ne nyaꞌamis line ka ba daa tum la yelaa.