6
Taaba suŋir la yela
1 M baꞌabiise, tuumbeꞌed yaꞌa ke ka soꞌ lu, yanam bane ka Siig Suŋ la bee ya ni bedego la suŋim o ne sumbugusum, ka o due ka lem a suꞌum. Ka me guꞌusimini ya meŋ; ka ya paꞌati nye makir.
2 Suŋimi taaba ya yeltood poogin, ka ala ka ya na dol Kiristo wada la.
3 Soꞌ yaꞌa tenꞌes ye o a suꞌum, ka sid a one pu kpiꞌema, o maꞌad o meŋ.
4 Soꞌ mekama kpansim o meŋ yela. O yaꞌa nye ka li a suꞌum, o tunꞌe nweꞌe nyoꞌog ne o meŋ yela. Ka li kaꞌ ye o mak o meŋ ne o tiraan yela.
5 Soꞌ wusa moom o meŋ yela.
6 One zamis Kiristo labaar la on pudugim bunsum line ka o mor la ne one zamis o la.
7 Da maꞌa ya meŋa. Soꞌ ku nyaŋe maꞌ Winaꞌam wuu o ane zolugo. Nid na bun on but siꞌel la buudi. Ka li me ane ala nidib beilim ni.
8 Soꞌ beilim yaꞌa dolne o ninsaalib boodim, li nyood ane kuꞌum. Ka soꞌ beilim yaꞌa dol Winaꞌam Siig Suŋ la boodim, lin nyood me ane nyovur lin kaꞌ naare.
9 Dinzug, keli ka ti da genn ka bas tuumsumaa. Ka ti yaꞌa pu basi li saŋa na kena ka ti na nyee li nyood.
10 Dinzugo ti yaꞌa nye suer, keli ka ti tum tuumsuma n tis soꞌ mekama, ka tumi tisi ti baꞌabiis bane niŋ Kiristo yadda la n gaad soꞌ mekam wusa.
Saꞌalug ne puꞌusug
11 Gosimi man sob ka li a sob beda siꞌem, li ane man Paul m meŋi yuꞌun sob bama.
12 Nimbane paꞌane ba meŋ la bood ye ba mugusi ya ka ya kpenꞌ baŋo la. Ka ba kudun niŋidi li ye ba da nye namisug Kiristo kuꞌum dapuudir zug la yelaa.
13 Hale nimbane malima a baŋo kpenꞌeb la, ba pu niŋid wada la yel siꞌel laa, ka bood ye yanam kpenꞌ baŋo ka ba na nyaŋe nweꞌe nyoꞌog ne yanam siaki diꞌe bun line a niŋgbina malima la.
14 Ka li yaꞌa a mam, man kudun ku nweꞌe nyoꞌog ne siꞌel yelaa, asee ti Zugsob Yesu Kiristo kuꞌum dapuudir zug la maꞌaa. Li ane o kuꞌum dapuudir zug la ke ka dunia yela pu lem soꞌe ma, ka m wenne m kpine, ka m baꞌa lem kaeꞌ ne li yelaa.
15 Li pu pak ye soꞌ kpenꞌ baŋo bee o pu kpenꞌee, line pak ane ye ti mor vumpaal.
16 Winaꞌam na tis nimbane dol suer kaŋa la sumalisim ka zoo ba nimbaanlig, laꞌam ne Winaꞌam nidib sieba la wusa.
17 Keli ka soꞌ soꞌ da lem daami ma; ka isa bane be m niŋgbina ni mam dol Yesu la zug la paꞌal ye m ane o nid.
18 M baꞌabiise, ti Zugsob Yesu Kiristo yelsum na be ne ya siis. Ami.