ତେସଲନିକି ର଼ ଲମ୍ବର ଆ଼କୁ ପାଣ୍ତ୍‌ୱିଆ଼ହାମାନି ପା଼ୱୁଲ ତା଼ଣାଟି ରା଼ସ୍‌କି ଆ଼ହାମାନେ ୧:୧ । ଈଦି ଜୀସୁ କ୍ରୀସ୍ତ ଜାର୍ନାଆ଼ତି ୫୧ ବାର୍ସା ଡା଼ୟୁ ରା଼ସ୍‌କି ଆ଼ହାମାନେ । ତେସଲନିକି ପିଲିପ ଦେ଼ସାତି ର଼ କାଜା ଗା଼ଡ଼ା ମାଚେ । ପା଼ୱୁଲ ଏଚେ଼ତା ଆ଼କୁ ରା଼ଚିମାନେସି ଏଚିବେ଼ଲା ଏ଼ୱାସି କରନ୍ତି ଗା଼ଡ଼ାତି କୁଲମିତା ମାଚେସି । ଏମିନି କୁଲମିତା ୱେଣ୍ତେ ରୀ ଦେବାତାକି ମାହାପୂରୁ କାତା ୱେ଼କ୍‌ହାଲି ହାଚେସି ଏଚିବେ଼ଲା ତେସଲନିକି କୁଲମି ଗା଼ଡ଼ି ଆ଼ହାମାଚେ କାମା ୧୭:୧-୧୦ । ଏମ୍ବାଆଁ ଜୀହୁଦି ଅ଼ଡ଼େ ଗ୍ରିକ୍‌ ଜ଼ଲିନି ଲ଼କୁ ତା଼ଣାଟି କୁଲମି ଆ଼ହାମାଚେ । ଡା଼ୟୁ ଜୀହୁଦି ଲ଼କୁ ଡା଼ହାରା ଆ଼ହାନା ପା଼ୱୁଲ କ଼ପାଟି ନିଙ୍ଗାଲିଏ ତେସଲନିକି ଗା଼ଡ଼ା ପିସାଲି ଆ଼ତେ ।

ପା଼ୱୁଲ କରନ୍ତିତା ଏତି ଡା଼ୟୁ ତାନି ଆଟ୍‌ହିତାସି ତିମତି ତା଼ଣାଟି ତେସଲନିକି କୁଲମିତି କାତା ବାରେ ୱେଚେସି । ଏ଼ୱାରି ଜୀୱୁ ନ଼ୱିଆ଼ହିମାନାଣି ୱେଞ୍ଜାନା ହା଼ରେକା ରା଼ହାଁ ଆ଼ହାନା ତାନି ଈ ରା଼ହାଁ ତ଼ସାନା ରା଼ଚାମାନେସି । କ୍ରୀସ୍ତ ୱେଣ୍ତା ୱା଼ନି କାତା ଏ଼ୱାରି ତାମି ବିତ୍ରା ଅଣ୍‌ପିମାଚେରି ଅ଼ଡ଼େ କ୍ରୀସ୍ତଇଁ ନାମାହାଁ ହା଼ତିହିଁ କ୍ରୀସ୍ତ ୱେଣ୍ତା ୱା଼ନାଟି କା଼ଲାକା଼ଲାତି ଜୀୱୁ ବେଟା ଆ଼ନେସି, ଈ ବାରେ କାତାତି ପୁଣ୍‌ମ୍ବି କିହାଲି ରା଼ଚିମାନେସି ୫:୬-୮ ।