୨
ତେସଲନିକିତା ପା଼ୱୁଲତି କାମା
୧ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମୀରୁ ଜାହାରାଇଁ ପୁଞ୍ଜାମାଞ୍ଜେରି, ମା଼ମ୍ବୁ ମୀ ତା଼ଣା ୱା଼ହାମାନାୟି ଉଜେଏତାୟି ଆ଼ହା ହିଲେଏ;
୨ ସାମା ଏ଼ନିକିଁ ମୀରୁ ପୁଞ୍ଜାମାଞ୍ଜେରି, ମା଼ମ୍ବୁ ତେସଲନିକିତା ୱା଼ନି ନ଼କେଏ ପିଲିପିତା ହା଼ରେକା ଦୁକୁ କସ୍ତ ଅ଼ଡ଼େ ନିନ୍ଦା ବେଟାଆ଼ତି ଡା଼ୟୁ ମୀ ତା଼ଣା ଜୀୱୁତି ପିସାହାଁ ମାହାପୂରୁତି ନେହିଁ କାବ୍ରୁ ୱେ଼କ୍ହାଲି ତାକି ମା଼ ମାହାପୂରୁ ତଲେ ସା଼ସା ବେଟା ଆ଼ହାମାଚମି ।
୩ ଏ଼ନାଆଁତାକି ଇଚିହିଁ ମା଼ ୱେ଼କ୍ନି କାତା, ଲାଗେଏତାୟି କି ନା଼ଡ଼ିକିନି ଲେହେଁତାୟି ଆ଼ଏ ।
୪ ସାମା ମା଼ କେୟୁତା ନେହିଁ କାବ୍ରୁ ୱେ଼କ୍ନି ବ଼ଜୁ ହେର୍ପି ଆ଼ହାଲିତାକି ମା଼ର ଏ଼ନିକିଁ ମାହାପୂରୁତି ଅଦିକାରା ଜ଼ଗେ ଆ଼ହାମାନାୟି, ଏଲେକିହିଁଏ ମା଼ର ୱେ଼କ୍ହିମାନାୟି, ମା଼ ହିୟାଁତି ମାହାପୂରୁ ତାୟିପାରି କିନାସି, ମାଣ୍ସିଇଁ ରା଼ହାଁ କିହାଲିତାକି ଏ଼ଦାଆଁ କିଆନା ସାମା ମାହାପୂରୁଇଁ ରା଼ହାଁ କିହାଲିତାକି ଏ଼ଦାଆଁ କିହିମାନାୟି ।
୫ ମୀରୁ ନେହିଁକିଁ ପୁଞ୍ଜାମାଞ୍ଜେରି, ମା଼ମ୍ବୁ ଏଚେଲା ଜିକେଏ ନା଼ଡ଼ିକିନି ହା଼ଡାୟାଁ ତଲେ ୱେସାମାଞ୍ଜଅମି, କି ଜୂପ୍କା ଆ଼ନିଲେହେଁତି କାତା ୱେସାମାଞ୍ଜଅମି, ଏ଼ ବାରେତାକି ମାହାପୂରୁ ସା଼କି ମାନେସି ।
୬ ମା଼ମ୍ବୁ ଆମ୍ବାଆରି ତା଼ଣାଟି ଗାୱୁରମି ବେଟାଆ଼ହାଲି ଅଣ୍ପି ହିଲାଆତମି, ଆ଼ତିଜିକେଏ ମୀ ତା଼ଣାଟି କି ଏଟ୍କା ଆମ୍ବାଆରି ତା଼ଣାଟି ଆ଼ପେ ଆମିନି ମାଣ୍ସି ତା଼ଣାଟି ଗାୱୁରମି ବେଟାଆ଼ହାଲି ଅଣ୍ପାହିଲଅମି ।
୭ କ୍ରୀସ୍ତିତି ପାଣ୍ତ୍ୱିଆ଼ତି ସୀସୁୟାଁ ଲେହେଁ ମା଼ମ୍ବୁ ମୀ ତା଼ଣାଟି ଗାୱୁରମି ବେଟାଆ଼ହାଲି ଅଣ୍ପିତମିମା, ସାମା ତାଲି ଏ଼ନିକିହିଁ ଜାହାରା କକାରି ପ଼ଦାଁଣି ଜୀୱୁନ଼ହାଁନା ଜାତ୍ନୁ କିନେ ମା଼ମ୍ବୁ ଜିକେଏ ମିଙ୍ଗେ ଏଲେକିହିଁଏ ଜାତ୍ନୁ କିୟାତମି ।
୮ ଏଲେକିହିଁ ମିଙ୍ଗେତାକି ମା଼ ଜୀୱୁନ଼ନାୟି ମାନାକି, ମିଙ୍ଗେ ୱାର୍ଇ ମାହାପୂରୁତି ନେହିଁ ବ଼ଲୁତା ଆଣ୍ତ୍ୱି କିହାମାଞ୍ଜାଆତମି, ସାମା ମିଙ୍ଗେତାକି ଜାହାରାଇଁ ଦା଼ନା କିହାଲି ଜିକେଏ ମା଼ମ୍ବୁ ତିୟାରା ଆ଼ହାମାଚମି । ମୀରୁ ଏଚେକା ଜୀୱୁ ନ଼ନାତେରି ମାଚେରି ।
୯ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମା଼ମ୍ବୁ କାମାଲ଼ଡ଼ା ଇଞ୍ଜାଁ ୱା଼ହୁ କାମା କିହାମାନାୟି ମୀ ଅଣ୍ପୁତା ମାନେ, ଏ଼ନିକିଁ ମା଼ମ୍ବୁ ଆମ୍ବାଆତେରି ମିଙ୍ଗେ ବ଼ଜୁଲେହେଁ ଆୟଅମି, ଈଦାଆଁତାକି ଲା଼ଆଁ ମାଦେନା ୱା଼ହୁ କାମା କିହାଁ ମାହାପୂରୁତି ନେହିଁ ବ଼ଲୁ ମୀ ତା଼ଣା ୱେ଼କ୍ହା ମାଚମି ।
୧୦ ମାହାପୂରୁ ତା଼ଣା ନାମିନାତେରି ମୀରୁ, ମିଙ୍ଗେତାକି ମା଼ମ୍ବୁ ଏ଼ନିକିଁ ସୁଦୁ ତଲେ, ଦାର୍ମୁତଲେ, ଦ଼ହ ହିଲାଆଲେହେଁ ଲେ଼ମ୍ବାମାଞ୍ଜାତମି, ଏ଼ଦାଆଁ ମୀରୁ ଅ଼ଡ଼େ ମାହାପୂରୁ ସା଼କି ।
୧୧ ଅ଼ଡ଼େ ମୀରୁତ ପୁଞ୍ଜାମାଞ୍ଜେରି, ଆ଼ବା ଏ଼ନିକିଁ ଜାହାରା ମୀର୍କା ମା଼ସ୍କାଣି ଜା଼ପ୍ନେସି, ଏଲେକିହିଁଏ ମା଼ମ୍ବୁ ମୀ ବାରେଜା଼ଣା ତାକି ବୁଦିଜା଼ପ୍ହାଁ ଅ଼ଡ଼େ ରା଼ହାଁ କିହାଁ ରଣ୍ତିଏ ଅଣ୍ପୁ ତଲେ ବାତିମା଼ଲା ମାଞ୍ଜାତମି,
୧୨ ଏ଼ନିକିଁ ମିଙ୍ଗେ ହା଼ଟାମାଞ୍ଜାନି ମାହାପୂରୁ ରା଼ଜିତି ଜ଼ଗେ ମାଣ୍କି ତଲେ ତା଼କିଦେରି, ଇଞ୍ଜାଁ ତାନି ଗାୱୁରମିତା ଆଣ୍ଡାଲି ଆ଼ଡିଦେରି ଇଞ୍ଜିଁ ବାତିମା଼ଲି ମାଞ୍ଜାନମି ।
୧୩ ଅ଼ଡ଼େ ଈଦାଆଁତାକି ମା଼ମ୍ବୁ ଜିକେଏ ଜ଼ମାଆନା ମାହାପୂରୁଇଁ ଜହରା କିହିମାନମି, ଏଚିବେ଼ଲା ମୀରୁ ମା଼ମ୍ବୁ ୱେ଼କ୍ହାମାନି ମାହାପୂରୁତି ବ଼ଲୁ ଆବିତେରି, ଏଚିବେ଼ଲା ଏ଼ ବ଼ଲୁଇଁ ମାଣ୍ସିତି ବ଼ଲୁ ଲେହେଁ ଆବାଆନା ସାମା ମାହାପୂରୁତି ବ଼ଲୁଲେହେଁ ଆବାମାଚେରି, ଅ଼ଡ଼େ ସାତା ତଲେ ଏ଼ଦି ମାହାପୂରୁତି ବ଼ଲୁ, ଇଞ୍ଜାଁ ନାମିତାତେରି ମୀରୁ, ମୀ ହିୟାଁତା ଏ଼ଦି ଜିକେଏ କାମା କିହିମାନେ
୧୪ ଇଚିହିଁ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମୀରୁ କ୍ରୀସ୍ତ ଜୀସୁ ତା଼ଣା ମାନି ଜୀହୁଦା ଦେ଼ସାତି ମାହାପୂରୁ କୁଲମିତା ଏ଼ନିଆ଼ହିଁ ମାଚେରି ଏଲେ ଆ଼ହାମାଞ୍ଜେରି, ଏ଼ୱାରି ଜୀହୁଦିଙ୍ଗା ତା଼ଣାଟି ଆମିନି ଦୁକୁ ବେଟା ଆ଼ହାମାଚେରି, ମୀରୁ ଜିକେଏ ଜାହାରା କୂଡ଼ାତି ଲ଼କୁ ତା଼ଣାଟି ଏ଼ ବାରେ ଦୁକୁ ବେଟାଆ଼ହି ମାଞ୍ଜେରି ।
୧୫ ଏ଼ ଜୀହୁଦି ଲ଼କୁ ମା଼ ପ୍ରବୁ ଜୀସୁଇଁ ଅ଼ଡ଼େ ମାହାପୂରୁ ଅଣ୍ପୁତି ବ଼ଲୁ ୱେହ୍ନାରାଇଁ ପା଼ୟାମାଚେରି, ଅ଼ଡ଼େ ମାଙ୍ଗେୱା ସା଼ସ୍ତି କିୟାତେରି, ଏ଼ୱାରି ମାହାପୂରୁତି ରା଼ହାଁ ଗାଟାରି ଆ଼ଏ! ବାରେ ନ଼ର ନା଼ରିତି ସାତ୍ରୁୟାଁ ।
୧୬ ଇଚିହିଁ ଏଟ୍କା କୂଡ଼ାତାରି ଗେଲ୍ପି ଆ଼ହାଲିତାକି ଏ଼ୱାରିତା଼ଣା ମାଙ୍ଗେ ନେହିଁ କାବ୍ରୁ ୱେ଼କହାଲି ହୀହିମାଞ୍ଜାତେରି, ଇଞ୍ଜାଁ ଏ଼ୱାରି ପା଼ପୁତା ଜାହାରାଇଁ ନେଞ୍ଜିକିହାମାନେରି; ଏ଼ୱାରି ଲାକ ମାହାପୂରୁତି କାର୍ବି ନିଙ୍ଗିତେୟିଏ ।
ପା଼ୱୁଲ ଏ଼ୱାରିତା଼ଣା ଅ଼ଡ଼େ ୱେଣ୍ଡେ ବେ଼ଚି ହାଜାଲି ମ଼ନ କିନାୟି
୧୭ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମା଼ମ୍ବୁ ହିୟାଁତା ଆ଼ଏ, ସାମା ଆଙ୍ଗାତା ଗା଼ଡ଼େକା ତାକି ମୀ ତା଼ଣାଟି ଏଟ୍କା ଆ଼ହାମାନାକି ମୀ ମୂମ୍ବୁ ମେସାଲି ଗାଡି ପଣ୍ଙ୍ଗୁ ତଲେ ହା଼ରେକା ଅଣ୍ପାମାଚମି ।
୧୮ ଏ଼ଦାଆଁତାକି ମା଼ମ୍ବୁ ମୀ ତା଼ଣା ୱା଼ହାଲି ଅଣ୍ପାମାଚମି, ଏ଼ଦାଆଁ କିହାଁ ନା଼ନୁ ପା଼ୱୁଲ ର଼ ଦେବା, ହାଅ, ରୀ ଦେବା ୱାୟାଲି ଅଣ୍ପିମାଚେଏଁ, ସାମା ସୟତାନ ମାଙ୍ଗେ ୱାୟାଲି ହୀୟାଆତେ ।
୧୯ ଇଚିହିଁ ମା଼ ପ୍ରବୁ ଜୀସୁ ୱେଣ୍ଡାୱା଼ନି ଦିନା ତାନି ନ଼କିତା ମା଼ ବା଼ର୍ସୁ, ରା଼ହାଁ କି ଟ଼ପେରି ଏ଼ନାୟି ? ଏ଼ଦି କି ମୀରୁ ଆ଼ଏ ?
୨୦ ମୀରୁ ମା଼ ରା଼ହାଁ ଅ଼ଡ଼େ ମା଼ ଗାୱୁରମି ଲେହେଁ ତାତେରି ।