2
Kuga nwaasug la yela
1 Dinzugo basimi potenꞌebeꞌed wusa, ne damaꞌam ne zam ne fufum, ne taaba kikeug.
2 Kel ka ya yaꞌam kpenꞌ ne Winaꞌam yela wuu bibibisi bood binꞌisim siꞌem la. Li na ke ka ya biꞌ ya Yesu Kiristo yadda niŋir yela.
3 Niŋimini ala yaname sadigim nye Zugsob la noŋi ya siꞌem la.
4 Kemini o saꞌan na, on kane nwaas wuu kugkane ka nidib zanꞌas o la, ka Winaꞌam gaŋ o ka o a suꞌum hale la.
5 Keli ka Winaꞌam noki ya, ka ya nwaas wuu kuga ne ka o meꞌ yir n tis o meŋ, ka me nwaas wuu maalmaan suma ka niŋ line maꞌed Winaꞌam suunr ka li yi Yesu Kiristo ni.
6 Ka li sobne Winaꞌam gbauŋin ye,
“Gosima, m deŋim gaŋi lodigin kugir line a suꞌum
hale ka zaŋidi li eenbid Winaꞌam puꞌusum zinꞌig, Zion ni.
Ka one niŋ man one nwaasne kugir la yadda,
o ku di nyan ne.”
7 Yanam bane niŋ o yadda la baŋ ka o a bunsuŋ hale n tisi ya. Amaa bane pu niŋ o yadda la, li sobi ba yela ye,
“Kugkan ka tanmeedib neꞌes la
yuꞌun lieb lodigin kugsuŋ.”
8 Ka lem sob ye,
“Li ane kugkane na ke ka nidib tuꞌug,
ka a tampiing kane na ke ka ba lu.”
Ba tuꞌusid, ban zanꞌas Winaꞌam pianꞌad la zug, wuu on yel ziꞌel siꞌem la.
9 Amaa yanam ane tuŋ yinni dim ka Winaꞌam gaŋ, ka ya a maalmaanib bane a naꞌanam, ka a Winaꞌam nidib bane a nyain ye ya mool o nyalima tuuma la, one buoli ya tuumbeꞌed zinꞌigin line a likin ka more ya na kpenꞌesi o neesim zinꞌig line a nyalima la ni.
10 Saŋsiꞌen la ya da kaꞌ Winaꞌam nidiba, ka nannanna ya aa o nidib. Ba da pu zoti ya nimbaanliga, amaa ba yuꞌun zoti ya nimbaanlig.
11 M zuanoŋa, m saꞌane yanam bane a saam dunia ni la ye ya bas saalib boodim line zabid ne ya Winaꞌam dolim la,
12 ka kpelim more tuumsuma niŋir nidib buudi soogin, ka ba yaꞌa nwaꞌasidi ya wuu ya ane tuumbeꞌed dim, ban nye ya tuumsuma ka naꞌas Winaꞌam, one na ti kenn daasiꞌer na.
Saꞌalug ya beilim la yela
13 Winaꞌam zugo, siemi ya meŋ Room naꞌab one soꞌe paŋ la saꞌan ka one soꞌe naꞌanam wusa,
14 ka lem sie ya meŋ gomenanam saꞌan, bozugo Room naꞌab la tumi ba ye ba namis bane tum tuumbeꞌed la ka zunꞌe bane tum tuumsuma la, ka lem sie ya meŋ saalib bane mor kpiꞌeuŋ wusa saꞌan.
15 Ka li ane Winaꞌam boodim ye ya guꞌe zon bane ziꞌ siꞌel la pianꞌad ne ya tuumsuma niŋir.
16 Bei wuu nimbane mor yolisim, ka da more ya yolisim la ka li a ziri bun ka tum line a beꞌede, amaa bei wuu Winaꞌam yamis ne.
17 Naꞌasim nidib wusa, ka more baꞌabiidug noŋilim. Zomi Winaꞌam ka naꞌas Room naꞌab.
18 Yanam tumtumniba, siakimi ya zugsobnam noya ne naꞌasi bedego. Ka li kaꞌane ninsuma maꞌanee, hale baa ba yaꞌa laꞌam a nimbeꞌednama.
19 Ka soꞌ yaꞌa modig namisugin ne filim filim on mor potenꞌer ne Winaꞌam la zug, neꞌeŋanami maꞌed Winaꞌam suunr.
20 Fun naani tum beꞌed ka ba sigis uf ne kpisiŋkpil ka fu sin ka mor suguru, li suꞌum a bo? Ka li yaꞌa wen wuu fu tumne line dol suer ka namisi li yela, ka niŋi li ne suguru, li maꞌed Winaꞌam sunf.
21 Ka tuumbama yela ka Winaꞌam buoli ya ka Kiristo da namis ya yela la, ka ye, ya me tuunn li tituunli n tuꞌas o.
22 O da pu tum tuumbeꞌede, ka damaꞌasiꞌa me da pu yii o noorin naa,
23 ka ban tuꞌud o la, o kulim pu lebis ye anwa ne anwaa, ka ban namis o la, o da pu volis ba mene, ka pesigi o meŋ one kad saria ne sida la nuꞌusin.
24 Ka zee ti tuumbeꞌed ne o meŋ niŋgbiŋ dapuudir la zug, ye ti bas tuumbeꞌed beilimin ka lee be ne popielim. Ka o paꞌalug la zug ka ya nye laafe.
25 Ya da wen wuu peꞌesi yiridi yirid sa, ka yuꞌun lebi ya konbkem la saꞌan na, on kane guri ya siis la.