3
Poꞌab ne sidib la yela
1 Ala mene poꞌaba, siakimini ya sidib noya ka ya na nyaŋe ya sidib la sieba laꞌam ne ban da nam pu siak Winaꞌam pianꞌad laa, ka li ku yi ne ya pianꞌadinee, amaa ya tuuma niŋirin,
2 ban kpansi nye ya naꞌasi zotim tuuma line a nyain siꞌem la.
3 Da ke ka ya baꞌa be ne yiiŋ venlim nak galisug ka li yela wen wuu zuobid loob ne salima laꞌad ne fusuma yeebo.
4 Amaa keli ka ya venlim ae baanlim ne naꞌasi beilim line suaꞌ ya sunya ni n wen wuu salima line kaꞌ saꞌuŋo, ka li a suꞌum galis Winaꞌam saꞌan.
5 Ala men ka poꞌabane da a suꞌum nyain ka mor tiꞌir ne Winaꞌam me da yiti nakid, amaa ka siakidi ba sidib noya,
6 wen wuu Sara da siaki o sid Abraham noor ka buon o ye o zugsob la. Ya yaꞌa niŋ dine nar, ka pu zot dabiem, ya ane o poꞌayuos.
7 Ala mene yanam bane a poꞌab sidiba, bei ne ba ne potenꞌesuŋ, ka naꞌasi poꞌa la on a tadim la zug, ne yanam laꞌam taaba diꞌed nyovur line a Winaꞌam popielim piini la zug. Ka ya Winaꞌam puꞌusum da viꞌ.
Namisug nyeeb tuumsuꞌuŋa zug la yela
8 Ka nannanna, ya wusa wusa more potenꞌer yinni, ka more nyoog ne taaba, ne baꞌabiidug noŋir, ne nimbaanlzoor ne sumbugusum,
9 ka soꞌ yaꞌa tumi ya beꞌed da yiꞌene li sammee. Ka soꞌ yaꞌa tuꞌu ya da lebisi yaa, amaa lee tim o yelsum. Winaꞌam da buoli ya ye ya beilim a ala, ka ya na nye yelsum. Ka li sob ye,
10 “One bood ye o nyovur beilim malis
ka nye dabis suma
kel ka o luaki o zilim pianꞌabeꞌedin
ka guꞌe damaꞌam.
11 Asee ka o luak tuumbeꞌed
ka tum line dol suer,
ka ia sumalisim ne nimmua suꞌuŋa.
12 Zugsob la kpaꞌa o nindaa n gosid bane a sida dim la,
ka o toba kelisidi ba sosug,
ka nyaꞌali bid kudug ne bane a tuumbeꞌed dimin.”
13 Ka ya yaꞌa mood ye ya tum line dol suere, anoꞌone na tumi ya beꞌede?
14 Hale baa ya yaꞌa namis ne yelsida yela ya na nye yelsum. Ala zug da more dabiem ka ke ka li paki yaa.
15 Amaa ya sunya ni, nokimi ya zug lo Kiristo; ka o a Zugsob. Tiꞌebimi saŋa wusa ye ya lebis one mekama buꞌosi ya tiꞌir kane ka ya mor la, li yela a siꞌem, baanlim ne naꞌasi,
16 ka ke ka ya poos a nyain, ka ba yaꞌa tuꞌu ya ne, yanam tum siꞌem Kiristo zugo, ban on di nyan.
17 Ka li suꞌum ye ya namis yaname naan niŋid line dol suer, li yaꞌa a Winaꞌam boodim ye li aa ala, n gat yanam na tum line pu dol suere ka namis.
18 Kiristo da kpii ya tuumbeꞌed yela vuguri, on one a popiel la, kpii tis bane kaꞌ popielnama, ye o more ya keŋ Winaꞌam saꞌan. Ba kuu o niŋgbiŋ kuub amaa ka Siig Suŋ ke ka o voe.
19 Ka Siig Suŋ la ni ka o keŋ mool labaar n tis siis bane be sarega ni,
20 bane da pu siak Winaꞌam noyelug saŋkan ka o da di nidib suguru saŋkan ka Noa da kpaꞌad aaruŋ titaꞌar ka nidib biꞌela bane da aa anii maꞌaa nye faangir kuꞌomin aaruŋ la poogin.
21 Kuꞌom suub la nwaasne dine yuꞌun faann ya. Ka li kaꞌane niŋgbiŋ dianꞌad pier yelaa, amaa li sosid Winaꞌam ye o ke ka ya poos a nyain, ka li yit Yesu Kiristo kuꞌum vuꞌugirin,
22 on kane keŋ arazana ni zinꞌi Winaꞌam datiuŋ ka soꞌe maleknam ne bane mor kpiꞌeuŋ ne paŋ.