5
Saꞌalug
1 Mam, one a yadda niŋidib kpeenm ne bane da nye Kiristo ka o namis la yinni, bane na diꞌe naꞌasi line na ti nie la yinni, saꞌan yanam bane a m kpeenm taaba la,
2 ye ya guri Winaꞌam nidib bane ka o guꞌuli ya wuu peꞌes la, ne yaꞌamseug ka kaꞌane mugusugo. Niŋimi ne nimmua ka kaꞌ nyood line a ligidi yelaa.
3 Da webidi bane bee ya nuꞌusinee, amaa niŋimi suꞌum ka ba tuꞌasi li.
4 Ka konbkem kpeenm yaꞌa ti nie, ya na diꞌe naꞌam zugpibig line pipilim ku saꞌam.
5 Ala men yanam bane pu kudig la, siemi ya meŋ kpeenmnam la tuon. Ya wusa siemini ya meŋ n tisi taaba; ka li sob ye,
“Winaꞌam zanꞌasid nyeesim dim la
ka tisid bane sie ba meŋ la yelsum.”
6 Dinzugo siemini ya meŋi niŋi Winaꞌam one a paŋ sob la nuꞌusin, ye li saŋa o na duꞌosi ya.
7 Zaŋimi ya yelpakir wusa ziil o; ka o guri ya.
8 Ae bane gbanꞌadi ba meŋ, ka lem a bane guꞌusid suꞌuŋa; ka ya dataa Sutaana goondi nwaꞌam wuu gbigim ne ied nid ye o gbanꞌe onb.
9 Niŋimi Yesu Kiristo yadda suꞌuŋa ka zanꞌas Sutaana, ka ya miꞌ ye li nar ye ya baꞌabiis bane be zinꞌig wusa namis namiskan meŋim ka ya nye la.
10 Winaꞌam soꞌe yelsum wusa, ka buoli ya o naꞌasi line kaꞌ ben la ni yanam a yinni ne Kiristo la. Ka yaname namis saŋa biꞌela nyaꞌaŋ la ka Winaꞌam maali ya suꞌum ka ziꞌeli ya kiŋ kiŋ, ka kpeꞌeŋi ya.
11 Ka naꞌam paŋ be ne o, saŋa line kaꞌ benne.
Puꞌusug
12 Silvanus one a baꞌabisida mam ni la, suŋi m ka m sob gbauŋ kaŋa giŋa nwa n kpeꞌeŋidi ya yet ye, lina a Winaꞌam popielim ameŋa la, gbanꞌamini li kiŋ kiŋ.
13 Ka Winaꞌam nidib bane be Babilon, ka Winaꞌam me gaansi ba la, puꞌusidi ya laꞌam ne Maak one liebi m biig la.
14 Puꞌusimi taaba ne noŋilim puꞌusug.
Sumalisim na be ne yanam bane a yinni ne Kiristo la.