15
Mosesena Kenane Pii Doko
1 Mosesemoo Isaraele wambu dupwapeme kenane dake Kamongo dokona pyao leyami.
Anatu baame mupwa wakasa dokome nyuo anamasi minyapya dokona lao Kamongo doko kando kenane dake pyaro.
Baame mena ose dupwape dee osena piso penge dupwape ipwa kota dokona pyao sukusa nembeya.
2 Kamongome namba porainyi pyambwapyamo porai ingyuo karo.
Baame namba elyape keta palyuo kiiramo nyiya.
Nyiyamo dokona baa nambana Anatu dokona nambame banya kingi lakandaro.
Baa nambana rakanena Anatu. Banya kingi andake dokona lao nambame lakandaro.
3 Kamongo baa soo giso yanda pimwaingi akali.
Doko Kamongo banya kingi.
4 Peraona mena oseme ipyuo penge uliuli dupwape banya yanda singi dupwape baame ipwa kota sukusa dokona pyao nembeya.
Banya yanda singi mupwa dupwana lapo yapasi dupwa ipwa kota Kone lenge dokona yalyiyami.
5 Ipwa kota yalu dokona yambe piya.
Nakama kamame ipwa kokorena kana petenge dopale ingyuo isa pao siyami.
6 Kamongo embena kingi rolaerena poraingi renge doko ama mupwa wakasa.
Dokome yanda pimwai dupwa pyao poro lapala inji ranji pingi.
7 Embena porai wakasa mupwa ingyapinyi dokome embena yanda pimwai dupwa pyao nembelene.
Embena imbu singi renge doko wakasa palyapala yangi manda isareme renge dopale ingyuo wambu dupwa rao otelyamo.
8 Embame poo lapinyi dokona porambaiye dokome ipwa doko wangu dolapona karalyapala kame ingyuo londanyi pyambwapi.
Dokopa ipwa romo pyuo paenge doko anda apya dopale ingyuo roya karapya.
Dopa pipala ipwa pete yalu doko opetae porai wakasa ingyapya.
9 Dokopa yanda pimwai dokome lao, Nambame nakama peteta epapala nakama minyarapala nyero.
Nambame bange nakamana dupwa wakale liti pira pira pipala namba nyelana maserono bange dupwa nyero.
Nambana wua gela kolo nyepala dokopa nambana porai dokome nakama bange peparae retaraminyi doko nyero, lapya.
10 Dopa pipyamopape embame yuu mendaki ŋee soo poo lapi dokopa ipwa kota dokome wambu dupwa yambe pyapya.
Ipwa pete paka pingi dokona kenda kenda pisi bange yalyingi dopale ingyuo yalyiyami.
11 Kamongo, anatuŋu lenge dupwana mende emba yalese?
Api mupwa wakasa poo pyasi emba yalese?
Api emba yalendeme yulu wambumi kapa pii nange dupwa pyuo yulu pakaramili porai dupwa pyuo pirase?
12 Embena kingi rolaerena pyasinju laro karene dokopa
yuu dokome namwana yanda pimwai wambu dupwa nao goe lao oteya.
13 Embena wambu kiiramo nyiinyi dupwa embena pii lao kana minyuo leene doko reto kaeya napala dokona palyuo mondo koo lao laminyii.
Embena porai dokome wambu dupwa laminyuo yuu yapasi dokona pee.
14 Dokopa wambu dupwame sepala nakama yamarangyuo pakame kumulyaminyi.
Enda wane manjinya pingi dokopa randa nyingi dopale ingyuo Pilisitia wambu dupwa randa nyuo pakalyaminyi.
15 Yuu Itome karenge wambunya akali mupwa dupwa pakame kumulyaminyi.
Moape range akali porai dupwa walu walu lao pungwa pungwa pilyaminyi.
Wambu peparae yuu Kenane palenge dupwa nakamana porainya renge pao otelyamo.
16 Walu lao pakange renge dupwa nakama keta palamo.
Embena porainya renge wakasa palipyamo dokona
nakama romo pii nao isa karele letaminyi.
O Kamongo, embena wambu dupwame pakiki palyama mee parami.
Dee embena wambu angi range kulisa embame kiiramo nyipinyi dupwa dopako pyuo parami.
17 Embame wambu dupwa lanyuo epo embena yuu kyau dokona wara pinyi palyare.
Kamongo, yuu doko embena anda piinyi mare doko.
Tembole anda Kamongo emba range yeelyo piinyi doko.
18 Kamongo emba yuu peparae kiŋi ingyuo karalu karare.
Miriamena Kenane Doko
19 Isaraele wambu wambo ipwa kotana peyami dupwa ipwa kota karalyapala yuu oo lasi siyamo dokona sukusa peyami. Dopa pyuo peyaminyipape Peraona mena oseme ipyuo penge uliuli dupwape dee dupwana minyingi dupwape ipwa kota sukusa peyaminyi dokopa Kamongo dokome ipwa doko nyuo pyasiya dokopa ipwa dokome nakama dupwa yambe piya.
20 Poropeta enda Miriame Eronena pemalenge doko laikuli kuki mende nyiya. Dokopa enda peparae laikuli kuki lapo nyepala banya matarename pao karo laikuli pyao danjiŋi piyami.
21 Miriame baame nakamana kenane pyakamiya.
Koo andake dupwa nyuo anamasi minyapya dokona Kaomongo banya kingi lakando kenane pyamanale.
Baame mena ose dupwape osena piso penge akali dupwape ipwa kota dokona sukusa pyao nembapya,
leya.
Ipwa Kau Pingi Doko
22 Moseseme Isaraele wambu dupwa ipwa kota Kone lenge doko yaki nyuo lanyuo peya. Peyamo dokopa nakama yuu muiyane Sua lenge dokona peyami. Pao yuu gii rema nembo yuu muiyane dokona kata pao kareyaminyipape ipwa mende epeyamo kanda nayami.
23 Kanda napala yuu kingi Mara lenge dokona epo ipwa kau pingi mende kando nyiyami. Dokopa nakama ipwa doko rende pii nalu nao nayamosa nakama naa napala kaeyami. Renge dokona yuu doko kingi Mara leyami. (Juunya pii lenge doko kingi Mara doko kau pingi dopale lenge.)
24 Wambu dupwame Mosese kando mumu andake lao piso siyami. Namwa ipwa aki naramase? leyami.
25 Dopa leyaminyi dokopa Moseseme Kamongo doko kando poraiyuo ateŋa piya. Piyamo dokopa Kamongo dokome baa isa mende lasaka piya. Dokopa baame isa doko nyepala ipwa dokona sukusa pyao nembeya. Nembeyamo dokopa ipwa doko mee rende pyuo rali piya. Dokona Kamongo dokome nakama mawa pii maiya. Maiyuo dee nakama makande pyuo kandoko piya.
26 Baame dopa leya. Namba nakamana Kamongo Anatu doko nakamame kamba laa nalu nao napala nambame rolae lao suu pilyu dokona palyuo pyuo nambana dopa pipenge laro dupwa dopa lalyane lao soo nambana mawa pii dupwa minyarami ramo doko nambame nakamba Isipi wambu anga yakane kiso maiyunuli pyuo nakama jii naro. Namba doko Kamongo nakama pyuo lete nyilyuŋu doko karo.
27 Enakana nakama yuu Ilimi dokona ipwa guu lenge akalisa ipisu lama epo dee isa bona akalisa yanda ipingi nyepo karo pingi dokona ipwa repeta dokona nakama epo anda pyuo paleyami.