15
Juta Wambu Dupwa Keta Randa Mende Epara Lao Reteya
1 Enakana Kamongo dokome namba langyuo lao, Akali Mosese Samyuelepa dakena karapala namba piso sokondali pyuo lambili doko nambame wambu dapwa sakame kumuo pyuo nyii napuli. Wambu dupwa nyisa pena lape. Wambu dupwa nambana lenge kambu silyamo dokona kara napala neta pena lape.
2 Nakamame emba piso soo, Anja paramase? leyami kande dokopa nambame letono doko nakama lamaipwape.
Lapo yanyi nyepala kumuo parami ingilyamo dokona nakama parami.
Lapo yandana kumarami ingiyamo dokona lao parami.
Lapo lopome kumuo parami ingilyamo dokona lao parami.
Dee lapo dupwa karapusi pyuo minyuo parami ingilyamo dokona parami leto.
3 Namba Kamongo dokome yulu kisima mona randanyi pyambuo epara dusipa nakama keta pyaka sinya lao suu pyao retelyo. Nakama yanda dokona pao kumaraminyipa nakamana yanenge dupwa suwame ipyalya ipyana pyuo soo parami. Dokopa yaka dupwame napala malarami dupwa suwa menape rae lenge dupwame yuu mendaki nao yuu mapu pinyi nembarami.
4 Yuu muu peparaena wambu dupwa namba Juta wambu Esakayana ikinyingi Manasa baa Juta wambunya kiŋi ingyuo karo dokopa yuu Jerusaleme dokona yulu koo piyamo dokona lao isingi piru doko kando yamarangyuo pakarami.
5 Kamongo dokome lao,
Jerusaleme wambu dupwa apimi nakama kondome kumuo
dee apimi nakama mona randame kumuo ee lao
apimi kapa pyuo wangu lakao karo
nakama apa pipyamo karaminyi lao piso serase? letamo.
6 Wambu nakamame namba yaki nyuo kaeyo
mata jiminyi dokona
nambana imbu singi doko kame pyuo minyuo makapu dokome
nambana kingi pyasinju lapala nakama pyao kokwa sinyi nembapu.
7 Yuu taone peparaena
nambame nakama kalendakuna porakana pyao nembele lao
nakama nambana wambu dupwa kokwa sinyi nembeyo.
Nakamana yulu koo pingi karo doko yaki nyuo kaeya nao minyaro siyaminyi dokona
nambame nakamana wane wanake dupwa opetae pyao kumakayo.
8 Nakama rangena yuu dokona enda waiya dupwa ipwa kota kee kana dupwa
manda manja nao kamame wakasa petaminyi.
Nambame nakamana wane parange andengena dupwa pyao kumakapala
endangi dupwa mona rumbingi petena lao piyu kande.
Aopa nambame nakama keta yuu mendaki
paka rengepe mona randange rengepe paleta epo piyu.
9 Enda mendena wane yanda ipingi nyepo kumapyasa baa lulaka pao pembetoko pyapyasa
popo nembalana saka nalyamo.
Baa eŋa nembo petenge dopa pyuo pisa napala
mona rumbingi petamo.
Nakama lapo pyapa nalyaminyi dupwa
Kamame yanda pimwai keta nyuo mapi sero dokopa pyarami.
Pii dusipa namba Kamongo dokome lapusa pilyamo.
Jeremayame Kamongo Doko Kando Mumu Leya
10 Namba keta rae maingi renge pali nalyamo doko aki akalinde karose? Akipamo nambana anyi dokome isa yuu dakena manjo nyiyase? Nambame yuu dakena wambu peparae kando laiya lao apiyanda pyuoko kararolyamo. Nambame kana lapo kyanju pyao nyakamyuope dee nambame lapo mainyi palyuowape pii nangeko. Doŋo wambu peparaeme namba koo keta palyuo letaminyi.
11 Kamongo nambame embena yulu pyaka nao kinyi letaminyi dupwa pyaka naronde ramo nakamame namba keta koo mende palena letaminyi pii dupwa angi inginya. Dee nambana yanda pimwai randa nao kareyaminyi dokopa nyisa naronde ramo doko randa dupwa namba keta palena.
12 (Mendeme ane isa doko minyuo roo pyarami ingya nalyamo. Ane isa dulurena kone kaname palya palya pyuo wasingi dupwasa leto, lao, Jeremayame leya.)
13 Dokopa Kamongo dokome namba langyuo lao, Nambame yanda pimwai dupwa epena lapala nambana wambunya kanape kamongonge bangepe yuu dokona silyamo dupwa nyuo soo pena laro. Renge doko nakama yuu palaminyi dokona kapa kapa pyuo koo pilyaminyi dokona randa maiyuo dopa piru.
14 Pipala nambana imbu singi doko isare ingyuo angao karalu karamo dokona nambame nakama see naraminyi panda mendasa nakamana yanda pimwai wambu dupwana yulu pyakaminya lao piru, leya.
15 Leyamo dokopa nambame lao, Kamongo emba silini. Namba suu pyapala nyisape. Wambu lapome namba randa jilyaminyi dupwa isingi randa mairuwale. Nakamame namba pyao kumakalena pilyaminyi dokona embame nakama pyuo karena lao iso karo panda maiyuo kaeya napipi. Embena kingi dokona reke lao karapusi namba kando kilya kando letaminyi doko suu pyape.
16 Embame namba pii langii dokopa pii mende isa nemba nao siyu kande. Kamongo Anatu Porai Wakasa doko, namba embena kandale. Dokona lao embena pii doko nambana monarena rae maingi mona pyakalyuo pingipi renge dupwa pipya palyuo simbulyamo.
17 Nambana yuu gii doko wambu lapo pipya mee giinyi kamba sero rae maiyuo mee role pisa nange kandale. Embena pii leene doko warombo soo namba range iki piso wambu koo piyaminyi dupwa kando imbu singi dokome palyuo simbuyamo peteyo kande.
18 Namba akipamo mee randa nyuoko karose? Akipamo nambana monarena rete dupwa umbwa pii nalyase? Akipamo umbwa pii nalyase? Panyi pipala ipwa epenge sokolyasa nalana lisa pingi. Nambame embapa dopale ingyuo suu pyao karalase lao pilisi?
19 Dokona dee Kamongo dokome isingi lao, Emba kapu kyuo epare ramo doko nambame emba nyepala dee kamba emba nambana kendemande akali ingyare. Ingyapala pii koo lao papilini doko suu pyao emba wai pii keyange doko larenepa emba dee kamba nambana poropeta akali ingyare. Wambu dupwa kapu kyuo emba karare dokona eparaminyipa emba dee nakama kararami dokona pare ingya nara.
20 Nambame emba kone kana yale kapa dupwame kana kame porai pingi dopale ingyuo kareene lao suu pyapala nakamame emba isa palya narami ingyara. Nambame emba kyawa minyuo lete wai pyao nyuo kararo.
21 Nambame akali koo kopetame pingi dupwana porainya renge dupwana emba kyawa minyuo reto kararo lao namba Kamongo dokome lapusa pilyamo, leya.
16:1—17:27 Randa oo repeta Juta keta epara, leya. Jeremaya rangeme Kamongo nyisinya lao ateŋa leya. Dokopa Anatumi wambu dupwa koro petenge yuu gii dokona dopa pyuo dapa pyuo karalapape, lamaiya.