7
Nyɩma 'wlu glʋ ta -zakpa kugbua lɛ 'sɔ (144.000)
1 -Mʋʋ 'bɩgʋ, 'ɩn ɩn yia 'anzɩ -mnʋa -yɔyɩ 'yligbeda dʋdʋʋ gwɩgwɩ -mnʋa 'yli. -Mʋʋ mɩ dʋdʋʋ -pɩpɛ -mnʋa 'yoo -kʋlʋda, -mʋʋ yi 'wlʋ nɩɩ, -pɩpɛ yabhlogbɔɔ 'plɩ dʋdʋ -gʋ, gumunyu -gʋ we -yɔ su 'wlu.
2 'Ɩn, ɩn yia 'anzɩ -putu yabhlo -yɔyɩ 'wʋsɔda 'ylʋʋ 'wʋsɔlʋda. -Lu -we nya wa zʋa -Lagɔɔ yibhelida nyɩma -yɔ, we mɩ we kwɛɛ. 'Anzɩ -mnʋa -we -Lagɔ 'nyɛa 'tɩtɛ we 'ka gumunyu -yɔ dʋdʋ sɩalɩ, we 'kpɩa 'wʋ 'tɩtɛɛ we -yla, we nɛɛ:
3 «A 'yligbe -slɔ, nɩɩ, -a 'nɩ -slɔ 'yliyɔga -Lagɔɔ yibhelida -Lagɔɔ lubhonʋnyaa 'klʋ -yɔ zʋ, dʋdʋ klaa, su klaa, we -yɔ gumunyu, a 'na sɩalɩ we -nɩ.»
4 'Ɩn -wa -Lagɔ zʋa ɔ 'dɛɛ yibhelida -yɔ, 'ɩn ɩn yia wa ŋwɛ yibheli. *Izlaɛlɩɩ zʋa weee 'yli, nyɩma 'wlu glʋ ta -zakpa kugbua lɛ 'sɔ (144.000).
5 Zudaa zʋayli, nyɩma 'wlu glʋ ta (12.000).
Lubɛnɩɩ zʋayli, nyɩma 'wlu glʋ ta (12.000).
Gadɩɩ zʋayli, nyɩma 'wlu glʋ ta (12.000).
6 Asɛlɩɩ zʋayli, nyɩma 'wlu glʋ ta (12.000).
Nɛfʋtalii zʋayli, nyɩma 'wlu glʋ ta (12.000).
Manasee zʋayli, nyɩma 'wlu glʋ ta (12.000).
7 'Simeɔɔ zʋayli, nyɩma 'wlu glʋ ta (12.000).
*Leviii zʋayli, nyɩma 'wlu glʋ ta (12.000).
Isakaaa zʋayli, nyɩma 'wlu glʋ ta (12.000).
8 Zabulɔɔn zʋayli, nyɩma 'wlu glʋ ta (12.000).
*-Zɛzɛfʋʋ zʋayli, nyɩma 'wlu glʋ ta (12.000).
Bɛzamɛɛɛ zʋayli, nyɩma 'wlu glʋ ta (12.000).
Wa 'dɛ weee 'klʋ -yɔ wa zʋa -Lagɔɔ yibhelida.
Nyɩmaa -zlo bibea 'ŋnɩmnɩkpe
9 -Mʋʋ 'bɩgʋ, ɩn -talɩa -bha, 'ɩn ɩn yia nyɩmaa -zlo -yɔyɩ. Waa nyɩma -zu 'wʋ, -ɔ mnenia ɔ 'ka wa zɛlɩ, ɔ 'nɩ -mɩ. Nɩɩ, dʋdʋ weee -gʋ -nyɩma wa -mɩa: laga weee -gʋ -nyɩma mɩ -bha. Zʋa weee 'yli -nyɩma mɩ -bha. Klu weee nyɩma mɩ -bha. Wɛlɩ weee nyɩma mɩ -bha. Wa 'yligbe 'ŋnɩmnɩkpe -yɔ Bhlabhlɛyu 'yu. Wa ka -bana 'pʋpa 'wʋ, 'ɩn saʋn mɩa wa kwɛɛ.
10 Wa 'kpɩa 'wʋ 'tɩtɛɛ, wa nɛɛ:
«-Amɩaa -Lagɔ -ɔ -dɩa 'ŋnɩmnɩkpe -gʋ la,
ɔ -yɔ Bhlabhlɛyu 'sɔ,
gbʋwʋsasɩe mɩ wa -nʋ nya!»
11 Nɩɩ, 'anzɩ weee bibea wee 'yliyɔgali -mnʋa klaa, waa nyɩma kpasɩ klaa, we -yɔ 'ŋnɩmnɩkpe. Wa -gblia 'wlu la 'ŋnɩmnɩkpe 'yu, 'ɩn wa yia -Lagɔ bʋbɔ.
12 Wa nɛɛ:
«-Amɛnɩ!
Nyɩma weee gba ɔ 'ŋnɩ -zɔnʋ.
Nɩɩ, nyɩma weee -mnɩnɩ ɔ 'ŋnɩ,
gbʋyilo weee mɩ ɔ -nʋ nya,
nyɩma weee 'pa ɔ fuo, nyɩma weee zʋ -bha ɔ,
'tɩtɛ -yɔ latɛlo weee mɩ ɔ -nʋ nya.
We -mɩ 'sa, 'ɩn we 'ka 'sa -tʋ
'ylɩ weee -nʋ nya.»
13 -Bha nyɩmɛ kpasa yabhlo 'yɩbhaa 'mɩ laɛ: «'Lee, waa nyɩma kaa dɛ -bana 'pʋpa 'wʋ, mɔɔ -nyɩma wa -mɩ, 'ɩn mɔ wa 'bhʋlʋa?»
14 Ɩn nɛɛ ɔ -yla: «Na -kanyɔ, -ɔ -yia we 'ji, -mɩ -wa!»
Ɔ nɛɛ: «Waa nyɩma mɩa dɛ, wa ka wa sɩalɩ bhabha. Wa ka wa 'dɛɛ -bana -wɔlʋ Bhlabhlɛyuu 'pɩɔn lʋ, 'ɩn we yia pɔmanɩ tenyii.
15 We 'gbʋ wa 'yligbea -Lagɔɔ 'ŋnɩmnɩkpe 'yu, zlɩoo, sabɔoo, wa 'ka ɔ dʋmagbʋ lɛnʋ ɔ -budu 'kadʋ zɔ, 'ɩn -ɔ -dɩa 'ŋnɩmnɩkpe -gʋ la, 'ɩn -mɔɔ kʋa wa 'wʋ.
16 Ŋwɔ 'na 'ka 'maslɛɛn wa 'bha, 'nyumatʋ 'na 'ka 'maslɛɛn wa 'bha, 'ylʋ -yɔ slo 'na 'ka 'maslɛɛn wa 'bha.
17 Nɩɩ, Bhlabhlɛyu -ɔ mɩa 'ŋnɩmnɩkpe kwesi, mɔ yia wa 'nyuwlukʋa lʋ kwaa, bhlabhlɛɛ 'yliyɔzʋnyɔ 'bhisa. 'Ɩn -Lagɔ yia wa 'mɩɔ weee sɩa.»