5
A ningnigo na kakak a asaerla ane Iesu
(Mt 4:18-22; Mk 1:16-20)
1 Ning a pukakiar, ning e Iesu i tur tumo latasi ana puka tasi Genesaret, a tarai la tur talilis pasi, sur lar longor a warwara ane God.
2 Pa i oroi pas naur a mon ting latasi, ning dingla na tena minggen uben la ka han kusun diau, kaning la gos anunla na uben.
3 Pa e Iesu i kas ana ning halindiau, a mon ning ane Saimon, pa i atai i mang ir sugut siklik tar a mon usa latasi. Pa e Iesu i kes onoi, pa i asaer a kunum a tarai.
4 Ning ka rop anuna warwara, i atai e Saimon mang, “Mulor han usa na laman, pa mulor minggen anumulo na uben sur al sis.”
5 E Saimon i atai i mang, “Tena Asaer, mila tol panai kol ana kidol a morom, pa bel mila dat pas al sis. Ika, ar minggen ulak tar na uben, anasa u arsune.”
6 Ning la minggen tar la, la dat pas a galis a sis, pa nunla na uben milau lar taksilir.
7 La kali pas na halalinla kusun areur a mon sur lar nangan la. Pa la han tetek la, pa la abukus naur a mon rop, pa milau diar murung.
8 Ning e Saimon Pita i oroi a utna ne, i punga purum tingia na hana e Iesu pa i atai i mang, “Leklek, han kusun iau, iau a tena laulau.”
9 Anasa e Saimon pa la ning la armuri la kulkulan ana sisla ning la dat pasi,
10 mang otleng larning tetek naur a halalna, e Jems pa e Jon, naur a nat e Sebedi.
E Iesu i kelesi mang, “Gong u matmataut. Turpasi onone, ur dat a taraila.”
11 Ning la ka dat tar naur a mon, la han kusun anunla ututnala rop, pa la mur e Iesu.
E Iesu i alangolango pas a lepra
(Mt 8:1-4; Mk 1:40-45)
12 E Iesu i kes ana ning a hanua, pa ning a barsan a palaona rop i laulau ana lepra i kes tingia. Ning i oroi pas e Iesu, i punga tuntudu tar ting lapiu pa i nunung rakrakai i mang, “Leklek, ning u mang, ur tolsot sur ur alangolango pas iau.”
13 Pa e Iesu i tuslan a kuna, i tong a palaona pa i atai i mang, “A mang ot, ur langolango.” Ono otning a lepra i rop kusuni.
14 Lamur e Iesu i warwara rakrakai teteki mang, “Gong u atai tar tik ono. Ur han pa ur asangan u tetek a tena artabar tetek e God, pa ur saran a artabar tetek e God larning e Moses ka atong tari. Ning ur toli larne ir talapor tetek a taraila mang a palaom ka wakak ulak.”
15 Ika a warwara o e Iesu i han sarara kol tar, pa a galis a tarai la han taum sur lar longori, pa sur ir alangolango pas la kusun a nunla na tinsaman.
16 Ika a galis a pukakiar e Iesu i sira han masik utumo na hanua bel sur ir nunung.
E Iesu i alangolango pas a barsan ning a palaona i mat
(Mt 9:1-8; Mk 2:1-12)
17 Ning a pukakiar ning e Iesu i asaer a tarai, dingla na Parisaio pa dingla na tena asaerla tagun a warkurai, la kes tingia. La hanot tagun a hananuala rop ting na papar Galili pa papar Judia pa misaot e Jerusalem otleng. Pa a rakrakai ana Leklek i kes o e Iesu sur ir alangolango na tinsaman.
18 Dingla na barsan la los a barsan ana logo ngasna. A barsan ning a palaona i mat. La tohoi sur lar kas onoi, sur lar aborbori sa lanigo ta e Iesu.
19 Ika bel la kas lar pas onoi, anasa a tnan kunum a tarai. La abit taum onoi usaot na rumai, la kepsen pas ning a pukna tisaot, pa la alorong purum amoni ana logo ngasna na arpotor a kunum a tarai, tostos ting lanigo ta e Iesu.
20 Ning e Iesu i oroi anunla tortorot, i atai i mang, “Halik, di ka kepsen tar anum na toltol laulau.”
21 A tena asaerla tagun a warkurai pa a Parisaiola, la nuknuk ana nuknukinla mang, “Esi na ngas a barsan ne? Ning i warwara larning, i atong saksakan e God anasa i arlari ono. Esi ir kepsen a toltol laulaula? E God ka.”
22 Ika e Iesu ka tasman tar a nuknukinla, pa i deken la mange, “Sur asa mulo nuknuk larne?
23 Esi na ngas a warwara ning bel i ngangaten sur ar atongi? Ar atongi mange, ‘Di ka kepsen tar anum na toltol laulaula,’ o, ‘Ur kamtur, pa ur han’?
24 Ar atongi larne sur mulor tasmani mang e God ka saran tar a warkurai tetek a Nat a Barsan sur ir kepsen a toltol laulaula te lapiu.” Pa i atai a barsan ning a palaona i mat mange, “A atai u, ur kamtur, ur kibas logo ngasim, pa ur han uting na rumai ngasim.”
25 Ano otning i tur sa lanigo tanla rop, i kibas a logo ngasna, pa i han uting na rumai ngasna. Ning i han amon i atong leklek pas e God.
26 Pa la rop la kulkulan, la rakan aleklek pas e God, a palaonla i suren, pa la atongi mang, “Onone, dala oroi a maskan a utna i totoh ana ororoi anundala.”
E Iesu i kabah pas e Liwai
(Mt 9:9-13; Mk 2:13-17)
27 Ning ka rop a ututnala ne, e Iesu i han pa i oroi pas a tena los totokom, a risana e Liwai, i kes ting na rumai a los totokom, pa e Iesu i atai i mange, “Ur mur iau.”
28 Pa e Liwai i kamtur pa i han kusun anuna ututnala rop, pa i muri.
29 Lamur e Liwai i tol a tnan utna na hangan o e Iesu ting na nuna rumai. A galis a tena los totokom pa dingla na tarai otleng la kes taum o e Iesu ana utna na hangan ne.
30 Dingla na Parisaio pa anunla na tena asaerla tagun a warkurai, la lingir anuna na kakak a asaerla mange, “Sur asa ning mulo hangan pa mulo gang taum ana tena los totokomla pa a tena laulaula?”
31 E Iesu i keles la mange, “A dokta bel i hanot sur la ning la langolango. I hanot sur la ka ning la sasam.
32 Bel a hanot sur a tena tostosla. A hanot sur ar kabah pas a tena laulaula sur lar lingir a nuknukinla.”
A kabah ana tamai
(Mt 9:14-15; Mk 2:18-20)
33 Dingla na tarai la atai e Iesu mange, “A kakak a asaerla ane Jon la sira tamai pa la nunung, mangotleng lar a kakak a asaerla anuna Parisaiola. Ika anum na kakak a asaerla la hangan pa la gang.”
34 E Iesu i keles la mange, “Ning ta barsan ir taulai totoh, na halalna lar tamai mangmangasa ning a barsan ning kaning ot i kes taum onla?
35 Ika ta pukakiar ir hanot, ning dir ben maskan pas a barsan ning kusun la, pa ana pukakiar ning lar bot tamai.”
A warwara larlar ana kaen pa a wain
(Mt 9:16-17; Mk 2:21-22)
36 E Iesu i warwara larlar otleng tetek la mange, “Bel tik ir silir pas ta dia kaen tagun a tona kaen, sur ir suk ahati ana muar a kaen. Ning ir toli larning, ir silir laulau a tona kaen, pa tona dia kaen bel ir arlar taum ana dia muarna.
37 Pa bel tik ir tere a tona wain uting na turai a koto na wain ning di toli ana palaona inagoi. Ning ir toli larning, a tona wain ir bubus pa ir pusa a turai a koto, pa a wain ir tapek, pa koto na wain otleng ir laulau.
38 Dir pek ot a tona wain uting na tona koto na wain.
39 Bel tik ning ka gang pas a muar a wain, ir mang ulak sur a tona wain, ir atongi ka mang, ‘A muarna ot i wakak.’ ”