19
ཨེ༌ཕེ༌སས༌སི༌ ནང༌ང༌ པ༌འུ༌ལུ༌།
19:1 ནེ༌ 22
1 ཨ༌པོ༌ལོས༌ ཀོ༌རིན༌ཐི༌ གྱལ༌སའེ༌ ནང༌ང༌ ཡོད༌ ཟ༌ནེ༌, པ༌འུ༌ལུ༌ ཨ༌སི༌ཨཱ༌ ཡུལ༌ཇོངས༌སི༌ ནང༌ཀུག༌གི༌ ལམ༌གུན༌ གྱུད༌ཏེ༌ ཨེ༌ཕེ༌སས༌ལ༌ ལེབ༌, ཏེ༌རུ༌ ཁོང༌ང༌ ལོབ༌ཕྲུགས༌ ཁ༌ཅིག༌ ཐུག༌།
2 པ༌འུ༌ལུའི༌ ཁོང༌གུན༌ལ༌ ཏྲིས༌, "ཁྱོ༌ཞའེ༌ ཏད༌པ༌ ཅོའ༌ཅིག༌ ཁྱོ༌ཞའེ༌ཀ༌ དམ༌པའེ༌ ཐུག༌ཉིད༌ བབས༌ས༌?"
ཁོང༌གུན༌ནི༌ ལན༌ཏངས༌, "ང༌ཞའ༌ མ༌ཐོབ༌ལེ༌, ང༌ཞའ༌ དམ༌པའེ༌ ཐུག༌ཉིད༌དི༌ སྐོར༌ལ༌ ཚོར༌ ཁོ༌རང༌ མ༌ཚོར༌ལེ༌།"
3 ཏེ༌ནེ༌ པ༌འུ༌ལུའི༌ ཏྲིས༌, "ཁྱོ༌ཞ༌གུན༌ནི༌ ཀ༌ཟུག༌ ཁྲུས༌ཤིག༌ ལེན༌པིན༌།"
ཁོང༌གུན༌ནི༌ ལན༌ཏངས༌, "ཡོ༌ཧཱ༌ནན༌ནི༌ ཁྲུས༌།"
4 པ༌འུ༌ལུའི༌ མོལས༌, "ཡོ༌ཧཱ༌ནན༌ནི༌ ཁྲུས༌སལ༌ཁན༌བོ༌ ནི༌ གྱོད༌པ༌ ཅོ༌ཅེས༌སི༌ ཕིའ༌ ཨིན༌ནོག༌, ཁོང༌ངི༌ མི༌གུན༌ལ༌, ཁོང༌ངི༌ སྟིང༌ནེ༌ སྐྱོད༌ཅེས༌ཅན༌བོའེ༌ཀ༌ ཏད༌པ༌ ཅོ༌ཅེས༌ལ༌ མོལས༌, ཀ༌བོ༌ ནི༌ ཡེ༌ཤུ༌ ཨིན༌ནོག༌།"
5 ཏེ༌བོ༌ ཚོར༌ཏེ༌ ཁོང༌གུན༌ནི༌ གཙོ༌བོ༌ ཡེ༌ཤུའི༌ ཚན༌ནི༌ ནང༌ང༌ ཁྲུས༌ལེནས༌།
6 པ༌འུ༌ལུའི༌ ཁོང༌གུན༌ནི༌ གོའེ༌ཀ༌ ཆག༌ བོར༌ར༌ཅིག༌, ཁོང༌ ཚང༌མའེ༌ཀ༌ དམ༌པའེ༌ ཐུག༌ཉིད༌ བབས༌། ཁོང༌གུན༌ནི༌ སྐད༌ སོ༌སོའེ༌ ནང༌ང༌ སྤེ༌ར༌ ཏངས༌ ཡང༌ ལུང༌སྟན༌ ཤདས༌།
7 ཁོང༌གུན༌ནི༌ ཀྲངས༌ཀ༌ ཧ༌ལམ༌ ཅུག༌ཉིས༌ ཡོད༌པིན༌།
8 པ༌འུ༌ལུ༌ ཡ༌ཧུ༌དཱ༌པའེ༌ དུ༌ཁང༌ངི༌ ནང༌ང༌ སྐྱོད༌ཏེ༌ ཧ༌ལམ༌ ཟླ༌ཝ༌ སུམ༌, མ༌ ཧམ༌པ༌ ཉམ༌པོ༌ ཆོས༌ཤད༌ཏེ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཉན༌ཁན༌གུན༌ནི༌ ཏད༌པ༌ ཁྱོང༌ཉན༌ཅེས༌སི༌ གྲོས༌དུར༌ ཅོའ༌ ཛདས༌།
9 ཨིན༌ནའང༌ ཁ༌ཅིག༌གི༌ སེམས༌ མ༌སྐྱོང༌པོ༌ ཅོས༌ཏེ༌ ཏད༌པ༌ ཁྱོང༌ཅེས༌ལ༌ མ༌ཐད༌, ཡང༌ མི༌མངས༌སི༌ དུན༌ལ༌ མ༌ཤི༌ཀའེ༌ ལམ༌མི༌ཀ༌ གྲུལ༌ཁན༌གུན༌ནི༌ སྐོར༌ལ༌ སྤེ༌ར༌ ངན༌པ༌ མང༌པོ༌ ཟེརས༌། ཏེ༌བོའེ༌ཕིའ༌ པ༌འུ༌ལུའི༌ ཁོང༌གུན༌ བོར༌ཏེ༌ ལོབ༌ཕྲུགས༌གུན༌ ཁོང༌རང༌ ཉམ༌པོ༌ ཁྲིད༌ཏེ༌ ཁྱེརས༌, ཡང༌ ཏྲེ༌ར༌ནས༌, ལོབ༌ཇོང༌ ཅོ༌སའེ༌ ནས༌སའེ༌ ནང༌ང༌ ཞག༌ཏང༌ གྲོས༌དུར༌ ཛད༌དད༌པིན༌།
10 ཏེ༌ གྲོས༌དུར༌རི༌ ཚིར༌ཀ༌བོ༌ ཧ༌ལམ༌ ལོ༌ ཉིས༌ ཚག༌པ༌ གྲུལ༌པ༌, ཨ༌སི༌ཨཱ༌ ཡུལ༌ཇོངས༌སི༌ ནང༌ང༌ དུག༌ཁན༌ནི༌ ཡ༌ཧུ༌དཱ༌པ༌ དང༌ གིརིས༌པ༌ གུན༌ལ༌ གཙོ༌བོའེ༌ བཀའ༌ ཚོར༌།
11 དཀོན༌མཆོག༌གི༌ པ༌འུ༌ལུ༌ གྱུད༌ཏེ༌ མ༌ ཧ༌ལས༌ཤེས༌སི༌ ཛད༌པ༌གུན༌ ཛད༌དད༌པིན༌།
12 སྤེར༌ན༌ པ༌འུ༌ལུའི༌ ཆག༌ ཐུག༌ཁན༌ནི༌ ཆག༌ཕིས༌ ཡ༌ ཀོས༌ལག༌ མི༌ ཟུ༌མོ༌ ཡོང༌ཁན༌གུན༌ནི༌ ཐུག༌ན༌ ཟུ༌མོ༌ གྱལ༌ཅེས༌ ཡང༌ རྡུད༌ ཞུགས༌ཏེ༌ ཡོད༌ཁན༌གུན༌ བིང༌ཏེ༌ ཆའད༌པིན༌།
13 གྲོང༌ཁྱེར༌ནེ༌ གྲོང༌ཁྱེར༌ལ༌ རྡུད༌ ཞུགས༌ཁན༌གུན༌ ཕིང༌ང༌ལ༌ ཆའ༌ཁན༌ནི༌ ཡ༌ཧུ༌དཱ༌པ༌ ཁ༌ཅིག༌གི༌ ཡེ༌ཤུའི༌ ཚན༌ ཀོལ༌ཏེ༌ རྡུད༌གུན༌ ཕིང༌ཅེས༌སི༌ རྩོན༌གྲུས༌ ཅོས༌ཏེ༌ ཟེརས༌, "པ༌འུ༌ལུའི༌ ཆོས༌ཤད༌ཁན༌ནི༌ གཙོ༌བོ༌ ཡེ༌ཤུའི༌ ཚན༌ནི༌ ནང༌ང༌ བིང༌ཏེ༌ ཆ༌ཅེས༌ལ༌ ངའེ༌ བཀའ༌ཏང༌ངད༌།"
14 ཡ༌ཧུ༌དཱ༌པའེ༌ བླ༌མ༌ འུ༌སྐྱོང༌ སྐེ༌ཝཱ༌ ཟེར༌ཁན༌ནི༌ བུ༌ཚ༌ རྡུན༌ཀོའེ༌ ཏེ༌ཟུག༌ ཅོའད༌པིན༌།
15 ཨིན༌ནའང༌ ཞག༌ཤིག༌ རྡུད༌པོའེ༌ ཁོང༌གུན༌ལ༌ ཟེརས༌, "ང༌ ཡེ༌ཤུ༌ ཤེས༌སད༌, ཡང༌ པ༌འུ༌ལུའང༌, ཨིན༌ནའང༌ ཁྱོ༌རང༌གུན༌ སུ༌ ཨིན༌།"
16 ཏེ༌ནེ༌ ཏེ༌ རྡུད༌ ཞུགས༌ཁན༌ནི༌ མི༌བོ༌ ཁོང༌གུན༌ནི༌ཀ༌ ལྕེབས༌, ཁོང༌གུན༌ནི༌ སང༌ ཤེད༌ཆེའ༌ སོང༌ཏེ༌ ཁོང༌གུན༌ལ༌ སྲན༌ཏྲེ༌ རྡུངས༌པ༌ ཁོང༌གུན༌ ཁྲག༌ བིང༌ཨིན༌ ལྗེར༌ཉལ༌ལ༌ ཏེ༌ ཁང༌པ༌ནེ༌ ཤོར༌།
17 ཏེ༌ ནས༌ཚུལ༌བོ༌ ཨེ༌ཕེ༌སས༌སི༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པ༌ དང༌ གིརིས༌པ༌ གུན༌ལ༌ གྱུས༌ཆའ༌ཅིག༌, ཁོང༌གུན༌ནི༌ གཙོ༌བོ༌ ཡེ༌ཤུའི༌ ཇིགས༌སི༌ ནང༌ང༌, ཁོང༌ངི༌ ཚན༌ལ༌ རྩི༌ཝ༌ ཀྲག༌པོ༌ ཏངས༌།
18 ཏད༌པ༌ ཁྱོང༌ཁན༌ནི༌ མི༌ མང༌པོ༌ ཡོངས༌ཏེ༌ རང༌རང༌ངི༌ ལས༌ ངན༌པ༌གུན༌ མི༌ཚང༌མའེ༌ དུན༌ལ༌ ཤད༌ཏེ༌ གྱོད༌པ༌ ཅོས༌།
19 ཡང༌ ཇའ༌དུ༌ ཅོ༌ཁན༌གུན༌ནི༌ རང༌ངི༌ ངན༌པ༌ ཇའ༌དུའི༌ སྤེ༌ཆ༌གུན༌ ཁྱོངས༌ཏེ༌ མི༌ཚང༌མའེ༌ དུན༌ལ༌ མེའ༌ ཏུགས༌, ཏེ༌ སྤེ༌ཆ༌གུན༌ནི༌ རིན༌ཚད༌པོ༌ རྩིས༌པ༌, མུལ༌ལི༌ གྱིར༌མོ༌ སྟོང༌ ལྔབ༌ཅུ༌ བིང༌།
20 ཏེ༌བོའེ༌ ཞས༌ཏེ༌ གཙོ༌བོའེ༌ བཀའ༌ ཀ༌རུང༌ས༌ ཕེལ༌ ཡང༌ བྲས༌བུ༌ ཀྲག༌པོ༌ སྨིན༌།
21 ཏེ༌ ཚང༌མ༌ བྱུངས༌ཏེ༌ སྟིང༌ནེ༌ པ༌འུ༌ལུའི༌ མ༌ཀེ༌དོ༌ནི༌ཡཱ༌ དང༌ ཨ༌ཀ༌ཡཱ༌ ཡུལ༌གུན༌ གྱུད༌ཏེ༌ ཡེ༌རུ༌ཤ༌ལེམ༌མ༌ ཆ༌ཅེས༌ལ༌ ཐག༌ཅདས༌, ཡང༌ ཁོང༌ངི༌ མོལས༌, "ཏེ༌རུ༌ དུགས༌ཏེ༌ སྟིང༌ནེ༌ ང༌ རོམ༌མའང༌ ཆ༌གོས༌།"
22 པ༌འུ༌ལུའི༌ ཁོང༌ངི༌ ཕྲོ༌པ༌ ཏི༌མོ༌ཐི༌ དང༌ ཨེ༌རས༌ཏུས༌ གུན༌ མ༌ཀེ༌དོ༌ནི༌ཡཱ༌ ལམ༌ཅུགས༌ ཡང༌ ཁོང༌རང༌ ཨ༌སི༌ཨཱ༌ ནང༌ང༌ ཏུས༌བན༌ཤིག༌ ཞུགས༌།
ཨེ༌ཕེ༌སས༌སི༌ ནང༌ང༌ ཧི༌ལིངས༌ བིང༌།
19:23 ནེ༌ 41
23 ཏེན༌ན༌ ཏུས༌ལ༌ ཨེ༌ཕེ༌སས༌སི༌ ནང༌ང༌ མ༌ཤི༌ཀའེ༌ ལམ༌མི༌ཀ༌ གྲུལ༌ཁན༌ནི༌ གྱབ༌གལ༌ལ༌ མ༌ ཧི༌ལིངས༌ སྲན༌ཏྲེ༌ ཕིངས༌།
24 དེ༌མེ༌ཏྲི༌འུས༌ ཟེར༌ཁན༌ནི༌ སེར༌གར༌ ཀ༌བོའེ༌ ཨར༌ཏི༌མིས༌ ཆོད༌ཁང༌ངི༌ ཟོ༌གུན༌ མུལ༌ལ༌ ཅོས༌ཏེ༌ ཙོང༌ངད༌པིན༌། ཁོའེ༌ ཚོང༌བོ༌ གྱལ༌ལ༌ གྲུལ༌པ༌, ལས༌མི༌ ཟོ༌པ༌ མང༌པོ༌ཞིག༌ ལས༌སི༌ ཕིའ༌ བོར༌ཏེ༌ ཡོད༌པིན༌།
25 ཁོའེ༌ རང༌ངི༌ ཕྲོ༌པ༌ ཟོ༌པ༌ ཚང༌མ༌ ཡང༌ ཚོང༌ དང༌ བྲེལ༌ཏེ༌ ཡོད༌ཁན༌ནི༌ མི༌གུན༌ བོད༌ཏེ༌ ཟེརས༌, "ལས༌ཅེད༌པ༌ ཕྲོ༌པ༌གུན༌, འི༌ ལས༌པོ༌ གྱུད༌ཏེ༌ ང༌དང༌ང༌ ཡོང༌གོ༌ མང༌པོ༌ ཡོད༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌།
26 ཨིན༌ནའང༌ ཁྱོ༌ཞ༌གུན༌ནི༌ ཐོང༌ཨིན༌ ཡང༌ ཚོར༌ཨིན༌ ཨིན༌ནོག༌, ཏེ༌ མི༌ པ༌འུ༌ལུའི༌ ཨེ༌ཕེ༌སས༌ མ༌ཚད༌ ཨ༌སི༌ཨཱའེ༌ ཡུལ༌ གང༌པོའེ༌ ནང༌ང༌ མི༌ ལག༌པ༌ནེ༌ ཅོས༌ཁན༌ནི༌ སྐུན༌དྲ༌གུན༌ དེན༌བའེ༌ དཀོན༌མཆོག༌ མ༌ནོག༌ ཟེར༌ཏེ༌ མི༌ མང༌པོའ༌ ཁོའེ༌ ཤད༌ཁན༌བོའེ༌ཀ༌ ཏད༌པ༌ ཁྱོང༌ཅུགས༌།"
27 ཁོའེ༌ ཏ༌རུང༌ངའང༌ ཟེརས༌ "མི༌གུན༌ནི༌ ང༌དང༌ངི༌ ཟོ༌ལས༌པོའ༌ ཀུས༌པ༌ ཅོ༌ཅེས༌པོ༌ ཕང༌ཅེས༌སི༌ ཇིགས༌པ༌ མ༌ཚད༌, ཇིགས༌པོ༌ ཨར༌ཏི༌མིས༌སི༌ ལ༌མོའེ༌ ཆོད༌ཁང༌ངི༌ སྐོར༌ལའང༌ སྤེ༌ར༌ རྩོག༌པོ༌གུན༌ ཟེར༌ཨིན༌། ཡང༌ འི༌ ཡུལ༌ གང༌པོ༌ མན༌པ༌, ཇིག༌རྟེན༌ གང༌པོའེ༌ ནང༌ང༌ འི༌ ལ༌མོ༌བོའ༌ ཅོལ༌ཁན༌གུན༌ནིའང༌ ཁོང༌ང༌ དཀོན༌མཆོག༌ ཙོགས༌ལ༌ རྩི༌ཝ༌ མི༌ཏང༌།"
28 ཏེ༌ ཚང༌མ༌ ཚོར༌ར༌ཅིག༌ ཟོ༌ལས༌པ༌གུན༌ལ༌ མ༌སྲན༌ཏྲེ༌ སྲོ༌ ཡོངས༌ཏེ༌ ཀུ༌ཅོ༌ ཏང༌ཨིན༌ ཟེརས༌, "ཨེ༌ཕེ༌སས༌པའེ༌ ལ༌མོ༌ ཨར༌ཏི༌མིས༌ མ༌ ཇིགས༌པོ༌ ཨིན༌།"
29 ཐོང༌ཨིན༌ ཐོང༌ཨིན༌ དང༌ གྱལ༌ས༌ གང༌པོའེ༌ ནང༌ང༌ ནས༌ལུག༌ རྩོག༌པོ༌ སོང༌, མི༌གུན༌ནི༌ མ༌ཀེ༌དོ༌ནི༌ཡཱ༌པ༌ པ༌འུ༌ལུའི༌ བེས༌སི༌ ཕྲོ༌པ༌ གཱ༌ཡུས༌ དང༌ ཨ༌རིས༌ཏར༌ཀུས༌ ཟུམས༌ཏེ༌ དྲུད༌ཨིན༌ མི༌གུན༌ ཛོམས༌སེ༌ ནས༌ས༌ ཁྱེརས༌།
30 པ༌འུ༌ལུའང༌ མི༌ཚོགས༌སི༌ ཕྲོའ༌ སྐྱོད༌ཉིན༌ ཡོད༌པིན༌, ཨིན༌ནའང༌ ལོབ༌ཕྲུགས༌གུན༌ནི༌ གགས༌ཏེ༌ སྐྱོད༌ མ༌ཅུགས༌།
31 ཡང༌ ཏེ༌ གྱལ༌ཁག༌གི༌ སྤོན༌བོ༌, པ༌འུ༌ལུའི༌ ཛ༌འོ༌ ཁ༌ཅིག༌གིའང༌ ཁོང༌ང༌ མི༌ཚོགས༌ ཛོམས༌ས༌ མ༌སྐྱོད༌ ཟེར༌ཏེ༌ ཞུ༌ཝ༌ ཕུལ༌ཨིན༌ ལོན༌ ཀལས༌།
32 མི༌ཚོགས༌སི༌ ནང༌ང༌ ཧི༌ལིངས༌ ཆེན༌མོ༌ བིང༌, མི༌ སོ༌སོའེ༌ སྤེ༌ར༌ སོ༌སོ༌ ཟེར༌ཨིན༌ ཀུ༌ཅོ༌ ཏང༌ངད༌པིན༌, ཡང༌ མང༌ཆེའ༌བོའ༌ ཁོང༌གུན༌ ཏེ༌རུ༌ ཅི༌ཕིའ༌ ཡོངས༌ཏེ༌ ཨིན༌ཁན༌བོའང༌ གྱུས༌ མེད༌པིན༌།
33 ཏེ༌ ནས༌ལུག༌པོ༌ ཧ༌གོ༌ཅུག༌ཅེས༌ལ༌ ཡ༌ཧུ༌དཱ༌པ༌གུན༌ནི༌ ཨ༌ལེག༌ཟན༌དེར༌ མི༌ཚོགས༌སི༌ དུན༌ལ༌ རིལས༌། ཁོའེ༌ མི༌གུན༌ལ༌ ཅུབ༌ཅད༌ཅེས༌ལ༌ སྟགས༌ ཅོས༌ཏེ༌ སྤེ༌ར༌ ཟེར༌ཅེས༌སི༌ རྩོན༌གྲུས༌ ཅོས༌།
34 ཨིན༌ནའང༌ མི༌གུན༌ནི༌ ཁོ༌ ཡ༌ཧུ༌དཱ༌པ༌, ཨར༌ཏི༌མིས༌ལ༌ མ༌རྩི༌ཁན༌ ཨིན༌ཁན༌བོ༌ ཤེས༌ས༌ཅིག༌, མི༌ཚང༌མའེ༌ ཅིག༌ སོང༌ཏེ༌ ཆུ༌ཚོད༌ ཉིས༌ ཟམ༌ ཀུ༌ཅོ༌ ཏང༌ཨིན༌ ཟེརས༌, "ཨེ༌ཕེ༌སས༌པའེ༌ ལ༌མོ༌ ཨར༌ཏི༌མིས༌ ཇིགས༌པོ༌ ཨིན༌།"
35 ཨིན༌ནའང༌ གྱལ༌སའེ༌ སྤོན༌བོ༌བོའེ༌, མི༌ཚོགས༌པོའ༌ ཅུབ༌ཅད༌ཅུག༌ཉན༌ ཡང༌ ཟེརས༌, "ཨེ༌ཕེ༌སས༌པ༌གུན༌, ཨེ༌ཕེ༌སས༌སི༌ གྱལ༌སའ༌, ལ༌མོ༌ ཨར༌ཏི༌མིས༌སི༌ ཆོད༌ཁང༌ དང༌ ནམ༌ཁའ༌ནེ༌ བབས༌ཁན༌ནི༌ ཁོང༌ངི༌ སྐུན༌དྲའ༌ སྲུང༌ཁན༌ ཨིན༌ཁན༌བོ༌ ཚང༌མ༌ལ༌ གྱུས༌ཨིན༌ནོག༌།
36 ཏེ༌ དེན༌བ༌གུན༌ལ༌ སུ༌ཞིག༌གིའང༌ གྱབ༌གལ༌ ཅོ༌མི༌ཉན༌ཅེས༌པོའེ༌, ཁྱོ༌ཞའ༌ ཚང༌མ༌ ཅུབ༌ཅད༌ཏེ༌ དུག༌ཤིག༌ ཡང༌ རིང༌གྱོགས༌སི༌ ནང༌ང༌ སམ༌བ༌ མེད༌ཁན༌ནི༌ ལས༌ མ༌ཅོ༌ཤིག༌།
37 ཁྱོ༌ཞའེ༌ ཟུམས༌ཏེ༌ འི༌ཀ༌ ཁྱོང༌ཁན༌གུན༌ནི༌ ང༌ཏི༌ ལ༌མོའ༌ དད༌ལོག༌ མ༌ ཅོས༌ཏོག༌ ཡ༌ ཁོང༌ངི༌ ཆོད༌ཁང༌ མ༌ ཅོམས༌ཏོག༌།"
38 "གལ༌ཏེས༌ སེར༌གར༌ དེ༌མེ༌ཏྲི༌འུས༌ དང༌ ཁོའེ༌ ཕྲོ༌པ༌ ཟོ༌པ༌གུན༌ནི༌ ཁོང༌གུན༌ནི༌ ཁྲིམས༌ ཅགས༌ཏོག༌ སམ༌མད༌ན༌, ཁྲིམས༌ཁུང༌ ཕེས༌ཏེ༌ ཁྲིམས༌པོན༌གུན༌ ཡོད༌ཏེ༌ ཨིན༌ནོག༌, ཏེ༌རུ༌ ཁོང༌གུན༌ནི༌ གྱབ༌གལ༌ལ༌ ཤགས༌ ཏང༌ཉན༌ཅེས༌ ཨིན༌ནོག༌།
39 གལ༌ཏེས༌ ཁྱོ༌ཞ༌གུན༌ལ༌ ཁོང༌གུན༌ནི༌ གྱབ༌གལ༌ལ༌ ཞན༌ཡང༌ སྐྱོན༌རྗོད༌ ཡོད༌ན༌ ཏེ༌གུན༌ནའང༌ ཏེ༌ ཁྲིམས༌པོན༌གུན༌ནི༌ ཐག༌ཅད༌ ཉན༌ཅེས༌ ཨིན༌ནོག༌།
40 དི༌རིང༌ བྱུང༌ཁན༌ ཚང༌མའེ༌ སྟིང༌ནེ༌ རོམ༌པའེ༌ ཝང༌སྲུལ༌པའེ༌ ང༌དང༌ང༌ ཧི༌ལིངས༌ བིང༌ཅུག༌ཅེས༌ལ༌ ཉད༌གལ༌ ཀལ༌ཅེས༌སི༌ ཇིགས༌པ༌ ཨིན༌ནོག༌། འི༌ ཧི༌ལིངས༌ ཕིང༌ཅེས༌པོའེ༌ ཕིའ༌ ཅའང༌ གྱུན༌ཚན༌ གྱལ༌ལ༌ཞིག༌ མེད༌པ༌ ང༌དང༌ངི༌ ཅི༌ ལན༌ཏང༌ཨིན༌།"
41 ཏེ༌ཟུག༌ ཟེར༌ཏེ༌ སྟིང༌ནེ༌ ཁོའེ༌ ཏེ༌ མི༌ཚོགས༌པོ༌ ཤོལ༌ཅུགས༌།