3
Na Yesus A Pelalava Se Moses
Mu fetinan siak lana pabung si Krais, nami vaxa a Piran ti la xunavata fo xel nami xe sina: mi taa lamon faagut se Yesus, nane aava Piran fo fenge xena vil a faisok ina yaamut e memai priis lapaana namkaian aava taara kuus turoxo pana. Nane waan fatak lapaana vubuxanan sina Piran aava fo siak fatie xena vil a faisok aanabeꞌ. Na Moses sait a waan fatak lapaana vubuxanan sina Piran layaan nane vil a faisok lana lifu sina Piran. Naak mi fuuna tavai a mataa aava vesan a lifu pana suaian molava sena lifu aava nane vesane, bo? E voxo na Yesus i taxa siak a suaian molava paaliu se Moses. A maana lifu xapiak, saxano rabuna ri fo vesane e a Saxa aava vesan a maana mo xapiak, nane ve a Piran. Na Moses xa waan fatak lana vepen ina sisiak la palou ina lifu sina Piran e nane kuus fangaasik sena maana mo aava Piran i taa kuusane lumui. Taasaxa na Yesus a waan fatak lana vepen ina Natuna Piran lana lifu sina. E netaara xa, taara lifu aave, tamo taara waan fatateak e taara tao faagutan a lamon fanaian aava waan la xunus itaara.
A Rabuna Ti Kavai Ri Fuuna Milung Sena Namkaian Tuuna
E voxo malaan sena Vovau Xaradak a kuus:
“Tanin, tamo mi langai a ling ina Piran, Muta fatavanat a lamonan simi, malaan sena mu bumi layaan ri fakasalau; ri vil malaane pe la xobingil layaan ri tafangau pana langai pesalaian siri.”
A Piran taxa kuus malaan seri:
“Ri tafangau pave e ri gigiran a kuus fanaian siak.
Naapalaan, ri xalum a maana faisok siak
aava ne fo vile xari la mariaas sangafilu talafaat aava ri waan pave. 10 E voxo ne kasalan a mu rabuna aave e ne kuus:
‘Nari, ri taxa lo milung sega lana lamonan siri e ri taxa lo langai pesalai sena maana mu fefasaian siak.’
11 Nenia, ne marala e ne fakalimaan faagut malaan:
‘Nari, ri taa pife laak lana nobina aava ne vubuk tavai nari pana xena fangaafusan.” Yng 95:7-11
12 Kamu fetinan, faxatang faroxo senaso pife mo roxo o saxa imi i taa toxan a lamonan saat e a xunus ina piau ta namkaian talo i taa puk tapin nane xa xasena Piran aava taxa to. 13 Taasaxa layaan a vapaling aava waan lana Xakalayan ti Kavai, a vapaling aava “Tanin”, a toxan a malasuf ina la toyan sitaara, taara taa faxaar netaara xa la maana yaan xapiak talo piau ta saxa imi i taa waan lapaana bitan ina vilaana saat e a lamonan sina i taa pife tavanat temasaat. 14 Senaso taara taxa faxaalit o taara pabung si Krais tamo taara tao fatateak a namkaian aava taara xaveak siaxe fefexaxaas sena yaan ina maatan sitaara saxa saxa. 15 A ferawaian aanabeꞌ taxa waan lana Xakalayan ti Kavai:
“Tanin, tamo mi langai a ling ina Piran muta fatavanat a lamonan simi malaan sena mu bumi layaan ri fakasalau.” Yng 95:7-8
16 Naseꞌ ta rabuna ve ri bai langai a ling ina Piran e ri fakasale? Nari xapiak aava na Moses fo xel nari ti lana bina Isip, bo? 17 E naseꞌ sang a Piran a marala xuvul pari fefexaxaas sena mariaas sangafilu talafaat? Nari, mu rabuna aava ri faasaal pana vilaana saat e voxo ri poxo maat la xobingil, bo? 18 E naseꞌ sang a Piran a fakalimaan nari o ri taa pife laak xe lana nobina ina fangaafusan sina? Nari aava ri langai pesalai sena ferawaian sina, bo? 19 E voxo taara masam o nari, ri pife fexaxaas sena laak xe lana nobina sina Piran senaso ri pife namkai.