2
Taara Taa Waan Faxuvul E Fexavongan Netaara Lapaana Lamonan Si Krais
Tamo a xuvulaian simi xuvul pa Krais a fagut nami o a vubuxan xasingitan sina a famalulum nami o mi waan xuvul lapaana Vovau Xaradak o mi fo siak a fangaasixan o mamaaluxan, mi taa fabas xapin a faamamaasan siak layaan mi faxuvul lapaana lamonan saxa e vubuxan xasingitan saxa e mi taa faxuvul lapaana vovau saxa e mi taa vil a faisok saxa mon. Muta vil a mo xena siak a roxoyan xami mon o xena siak a isin lava, piau. Taasaxa fasivi nami xa e lamon a xasanofuna malaan seri peraroxo semi. Nami xapiak mi taa lamon pana maana mo i taa xavang nami xa taasaxa mi taa lamon vaxa pana maana mo i taa xavang a xasanofuna.
Na Krais A Fasivi Nane Xa E Taara Taa Usi A Vilaana Sina
A fufuna lamonan simi i taa fexaxaas sena fufuna lamonan si Krais Yesus:
“Lana mu vilaana e lamonan sina nane ve a Piran fatak,
taasaxa lamon faati o i taa pife tao fatateak
a mu vilaana e lamonan xapiak aave xena waan la vepen sina Piran.
Taasaxa nane faamamaas o i taa timin patak
a maana mo xapiak aava fapirane
xena falak a vilaana e lamonan sina saxa sisiak.
Nane savat mataa e a vipin sina ve a vipin sina mataa.
Nane pife bilai malaan sena matalava
taasaxa nane fatapal nane xa pana langai faroxo vulai
fefexaxaas a yaan ina maatan sina- a maatan xuluna bolo.
E voxo a Piran a faneie la nobina pelalava e
faꞌisine pana isin aava pelalava sena xasano isin xapiak.
10 E a maana mo xapiak la xunavata, la xavala e lapaana xavala aava bina sina mu mamaat,
ri taa bukaak xena nangus a isi Yesus
11 e ri taa kuus fasavat o na Yesus Krais ve a Memai
e ri taa vil malaane xena tavai a Piran Tamataara, pana isin molava piis.”
Taara Taa Bilai Pana Vilaana Aava Ri Malaan Sena Malang La Palou Ina Rabuna
12 E voxo, kamu fesing, malaan seꞌ mi langai vulai layaan ne waan xuvul pami, a roxo paaliu o naboxo mi taa langai. A Piran fo fakaxup nami e voxo, mi taa lo faisok faagut vulai pana matautan e radakuian xena faxalitaana. 13 Senaso a Piran i taxa faisok la vubuxanan e lamonan simi talo mi taa vubuk bilai faroxo xena fasavat a vubuxanan sina.
14 Vil a maana mo xapiak e muta fefinaas o fegagelai. 15 Pana vilaana aave, mi taa piau ta fetusaian e mi taa pife vupuno. Nami ve mi mu rafulak tuuna sina Piran e mi piau ta lalosaat la palou ina mu rabuna saat ti la xavala. La palou iri nami, mi rarapak malaan sena vapara 16 layaan mi kuusan fasavat a ferawaian sena toyan tuuna. Tamo mi vil malaane layaan ne tigina la mata Krais ne taa ferawai pana faamamaasan o a faisok siak la palou imi a pife savat palau. 17 Tamo ri taa punuxau a vilaana aave a malaan sena saxa tatavai pana wain aava ri tiuane xuluna falfaalan la matana Piran, e tamo ri taa tiuan a ria iga malaan xuluna falfaalan e faisok aava savat sena namkaian simi ne taa faamamaas e merao xuvul pami. 18 E nami vaxa mi taa faamamaas e merao xuvul paga.
Na Pol A Vubuk Rao I Taa Feng Na Timoti Nare Epafrodaitas Xe Siri
19 Tamo na Memai Yesus i taa turoxo pana, monabeꞌ mon ne taa feng na Timoti xe simi talo ne taa faamamaas layaan ne langai semi. 20 Ne pi ta saxa fulaa malaan sena senaso nane toxan a nanasam semi la xunus ina, malaan sega e vulai nane sei soxot nami pana roxoyan. 21 Senaso a xasanofuna ri taxa faxatang a vubuxanan siri xa e pife mu vubuxanan si Yesus Krais. 22 Taasaxa mi texaas o na Timoti fo faxalit a vilaana tuuna sina layaan nane faisok xuvul paga xena kuusan fasavat a Lagasai Roxo malaan sena lak tomexaan xuvul pa tamana. 23 E voxo layaan ne texaas sena so ta mo i taa savat sega ne taa fenge xe simi. 24 E ne lamon tuuna o faasilak a Memai i taa turoxo o nenia xa ne taa falet xe simi.
25 Taasaxa ne lamon o a mo roxo ne taa feng faꞌuli a fefeng simi, na Epafrodaitas aava mi fenge xena xavangau. Nane ve na tiak aava faisok e tigina xuvul paga malaan sena mataa ina rawen. 26 Nane toxan a lagafan senaso nami, mi langai o nane fo giis e nane buk xalum nami xapiak. 27 A tuuna, nane fo giis e faasilak i maat. Taasaxa Piran a muluxe e pife muluk nane mon, taasaxa muluxau vaxa e pife tavaiau pana xasano lagafan fulaa maan. 28 E voxo ne vubuk faagut rao ne taa feng faꞌulie talo mi taa faamamaas layaan mi xalum fulane e nenia, ne taa pife lamon faaxaves fulaa. 29 Faamamaas pana savatan sina senaso nane ve na timi lana xuvulaian xuvul pa Krais. Mi taa suai sena rabuna malaan sena 30 senaso faasilak nane i maat sena faisok si Krais: nane lamon fepalauan a toyan sina xena xavangau la nobina simi.