3
Khreq yad awg mor haq ngawx haq sax var te che awg lawn
1 Tawd che te khuhd awr lehr, kar tiq yeg che tawd khuhd phehq che yaog. Khreq yad awg mor haq ngawx haq sax sehr phad te che kanx haq ca che chaw awr lehr, daq che kanx haq ca che yaog.
2 Kheh te lehq, Khreq yad awg mor haq ngawx haq sax var te che chaw te ghad awr lehr, vend bax tar kig mad cawg che chaw, awg mid ma te ghad lehax cawg che chaw, sa tiq tar vix che chaw, ni ma tar vix che chaw, te kenr te cawd che haq te che chaw, khehx chaw haq haq yug vix che chaw he lehq mar vid vix che chaw te ghad gha phehq che yaog.
3 Yawd juhg dawg buhz che chaw he lehq su haq yaq daq dawz daq che chaw maq gha phehq. Kheh ma khuhd, ni ma nud nehg che chaw, su haq tawd mad ghawg daq vix che chaw, phu haq maq sex lae vix che chaw te ghad gha phehq che yaog.
4 Yawd ved yehg ka haq kha sehax uq penr lehq, yehg yad ka yad teq pa haq thed che cawd che awg khuhn kha sehax na yug tug mar vid gha che chaw te ghad gha phehq che yaog.
5 Awg lawn ghod ver, a sug yawd ved yehg ka haq uq penr maq gha che chaw awr lehr, Ghig sa ve Khreq yad awg mor haq khawd-ehg kheh te ngawx haq sax gha tuawg le.
6 Yawd awr lehr, Khreq yad awg suhx phehaq che chaw maq gha phehq. Awg lawn ghod ver, yawd ni ma ir ni ma muh veh lehq ned haeg haq cir yanr che heh te lehq yawd haq liz cir yanr vid tug yaog.
7 Kheh te lehq, yawd haq awg bag phawd awr ve chaw mehz caz khuhn, yawd daq che awg meh cawg che chaw gha phehq che yaog. U kheh ma te ver, su be su khaex lehq vend bax tar che haq gha khanr lehq, ned haeg va thuh lar che haq yaw tug yaog.
Khreq yad awg mor khuhn ga vid var te che chaw awg lawn
8 Che ve haq kha sur suar, ga vid var te che chaw liz, su tar ir yawz yan che chaw gha te che yaog. Ha lez nid mag mad cawg che chaw, juhg dawg var ma hez che chaw, phu si med nged jeg kor haq maq sex lae che chaw gha phehq che yaog.
9 Daq kehg che haq sir vix che ni ma khuhn, pheq mar ax che cuhx kig nax che yonr khad teq pa haq kha sehax yonr yeg che chaw gha phehq che yaog.
10 Chaw che ve teq pa liz, i hehd haq awg kawd te cuh vid ngawx ser. Te vid ngawx peg lehq, vend bax tar kig mad cawg ver, yawd haq ga vid var te cuh cawd che yaog.
11 Che ve haq kha sur suar, ga vid var mid ma teq pa liz, su tar ir yawz yan che chaw gha phehq che yaog. Ca khaex ca koz vix che chaw maq gha phehq lehq sa tiq cawg che chaw he lehq awg ceng gha lia khuhn kar tiq yeg che chaw gha phehq che yaog.
12 Ga vid var te che phad awr lehr, awg mid ma te ghad lehax gha cawg che yaog. A sug yawd ved yad teq pa he lehq a sug yawd ved yehg ka haq kha nehax uq penr gha che chaw gha phehq che yaog.
13 Awg lawn ghod ver, ga vid var te che phad awr lehr, ga vid che kanx haq kha nehax gha ga te lehq, daq che awg meh haq gha lehq, Yer suq Khreq haq yonr che awg khuhn, ni ma tag che ted ceng cawg che yaog.
Cuhx kig nax jad che Ghig sa haq a kor pi che awg lid
14-15 Maq muh muha ver, ngag nawg chehd lo lag tug duhd lar liz, ngag har naq mad lag gag cawd ver, Ghig sa ve yehg ka awg khuhn, khawd kheh te kenr te cawd che teq pa haq nawg gha sir vid tug, awg lawn che ve teq pa ngag nawg haq buhq fea lar che yaog. Yehg ka u ve awr lehr, teq chehd che Ghig sa ve Khreq yad awg mor phehq che yaog. Khreq yad awg mor u ve awr lehr, Ghig sa ve awg cehg mag te che awg ceng awg pun, awg chi pi nux phehq che yaog.
16 A nig ved yonr che ted ceng awr lehr, cuhx kig nax jad che yaog, lehd a nig liz sax khiz khanr gha che yaog.
Khreq awr lehr, chaw yad ve awg hoq awg han khuhn lag che yaog.
Awg ha phu liz, yawd awg lawn sax khiz khanr gha che yaog.
Muhd nuh maq cuh yad teq pa liz yawd haq gha mawg che yaog.
Yawd ved awg lawn chaw ceng gha lia haq bon mar vid che yaog.
Mig gig yad teq pa yawd haq yonr vehr lehq.
Ghig sa ve awg mig awg phond ir jad che awg khuhn,
yawd haq haq yug lehq yawd taz kawq veh che yaog.