4
Iri kandriyen Kindrei aso-ok
1 Ya aha nadu tine aso, na dah aso anya katorou sahou ta iri lakou rayah udu kede-eh. Aso anya kabatanau aha ma kasehek sahou boto-on kewek taha in ta nyara Laban Jises. Aso mene leheya aha ta iri kandriyen, ta aha kadek aliy, ma ka-en hamon tiri lakou Kindrei aso-ok. Na dah, aha kede-eh a-en hamon le ta kandriyen buku aso mene asehek taha. Arile, aha ka-en hamon handru ta lakou doh kili le bwena. Eme ma, kandriyen doh kameh, amekes Kindrei kasekesek taha.
2 Aha ndratanan iri batanau, aso mene leheya aha ta aliy na boto-on ta nyara Laban Jises.
3 Handru, so-ok ta Kindrei i buku doh: Koha aha ma manyah taha mara-ei kasahan ndrabun. Aha kateleya aha kare ndra len ta kandriyen ta karei.
4 Ta kandriyen ta tasou, aha ari, ari kakohok tanan ta atondrok bada aha amwenen. Aha badeh, kadeu bada aha ki-in hamon ta kandriyen mwasin ma ndrabun.
5 Aha salelei bada aha ta amekes lomondra ma kandriyen ndra-in, ma madalakis laleyah, i buku iri lau tana iri Kindrei bwe amekes.
6 Buku aha ba-en hamon ta sahou dah bwe, ma amadin hawe udu ndramak ari ja, aha amekes karei ili tiri lau ta Kindrei, iri nadu tine aha, ma wendreya iri ta lakou doh. Ari ndramak samekes kandriyen buku doh, tasah Laban badeh, edeu ndramas ndra-in ili tare lau nane amekes lakou doh. Handru, bwena mene ahi adeu sahou boto-on labai tiri lakou doh ndrawek taha.
7 Handru, koha taha badeh, kasahan ha-un mara-ei, tasah Kindrei batehei taha ba-en hamon ta kandriyen ta karei bwe. Iy atehei taha ta a-en hamon ta kandriyen ha-un, ma ndrabun labai.
8 Eme ma, lau banuhun sahou doh bwe, iy batehei konan bala ta ndramak le bwe. Iy atehei konan ili ta Kindrei, ma Kindrei edeu Malawin Ndrabun tan le amwenen ewek taha ta aseben aha.
Taha badeh, kamekes iri kandriyen mwasin kabadok
9 Ya, jo gok ta atorou rayah sahou ewek taha ta kandriyen ta aso-ok labai iri nadu tine aha, bwe. Tasah, Kindrei ndraleheya aha ta kandriyen doh, ma aha ndratanan ta aliy.
10 Ya, idoh handru, aha leheya kandriyen ta aso-ok labai iri nadu tine aha iri, i tiri lau badu loboho kon tinan mara-ei udu bolo Masadoniya. Idoh mwasin, arile ahi asehek sahou boto-on ewek taha nadu tine ahi: Aha ka-en le hamon ta kandriyen doh, kamwenen kili le ai.
11 Ma aha kabudon boto-on ta aha kamanyah kamwenen kado le, ma ka-en hamon ta gok taha amwenen. Ya aha kamekes gok na mine aha, ma katondrok aha amwenen, buku bwena mene aso ndrasehek boto-on ndrawek taha.
12 Buku aha amekes i buku aliy, idah kameh iri lau tana iri Kindrei bwe, iri anyolom kandriyen doh, aha a-en hamon ta aliy, ma iri kameh atudun nyara aha, ma aha kameh barah ta ari lakou bwe.
Laban eme hamon ta atukum taha
13 Aha nadu tine aso, aso aso-ok aha katanan ta saba lakou kameh asahan tiri lau ta Kindrei, iri mene ndramak bwena. Kora-on ndrine aha keden tiri lau mene ndramak, buku iri lau rayah, iri batehei budon tiri handru ba-en ta Kindrei bwe, iri aden ma iri batondrok len ta ndramak mene imek, ano iy amak eme awas ja, bwe.
14 Handru, taha baden buku iri lau rayah bwe. Tasah, taha atehei budon handru in ta Jises imek, ano iy amak eme awas ja. Eme ma, taha ndratanan, na boto-on ta Jises kameh Kindrei atiye iri lau tan mene ndramak, ma iri kameh ame hamon ja hawe Jises.
15 Sahou aso asehek nane dan, idah sahou ta Laban. I buku doh: Len ta Laban eme hamon, taha mwan ma badih, are lau iy udu ndra awas udu munyak dah kahis, taha winiyan bala bwena tiri lau nane ndramak, ma taha ala atou Jises, bwe.
16 Bwe! Kameh asahan i buku doh: Ma mwena kameh Laban ruwani kandrah, ma iy eme andri. Handru, iy kameh aloh boto-on ili tiri lau mwan ma badih kame katukum, ma tinan tiri angelo kameh aloh ale, ma ndrah ta Kindrei kameh ili. Idah kameh, iri mwan ma badih mene ndramak bwena, ma iri atehei budon tiri handru in ta Krais, iri kameh amak ame awas ja, ma bwena handru.
17 Ano, taha mwan ma badih nane bamak bwe le, ado kon munyak dah, Laban kameh akohok taha ala bolo asi kandrah hawe iri mwan ma badih nane, ma taha atukum hawe Laban. Eme ma, taha mara-ei kameh are hawe Laban ta are le buku doh.
18 Handru, aha badeh, katadau ndrine aha kabadok, na sahou dah.