19
Jises asehek ta kandriyen ta apou tasou
(Mak 10:1-12; Luk 16:18)
1 Jises asehek sahou tan nane ano, iy ruwani kon Galili ma iy iu ili loboho kon Judiya ereu kapa gwa Jodan bilisiu.
2 Eme iri lau solo-an an hamon tan, ya iy mesekei bada iri nane udu ndra-in amwenen ja.
3 Eme oro Parasi rayah ame atou Jises ma oro anya kanone iy. Oro ndremenyani iy i buku doh, “Sebwe sahou batanau tataha anya, lau winiyan tikahei udun na saba katin udu budon tan amwenen nadeh?”
4 Jises asumon boho oro i buku doh, “Sebwe ado batou tarou ta Kindrei ereu bolo buk ndrabun tan bwe nadeh? Bwena handru kala Kindrei mene
‘mesekei lakou mari, iy mesekei lau mwan ma badih.’ Jenesis 1:27
5 Eme Kindrei anya,
‘Ta katin le doh, iy mwan karuwani taman uru tinen ya iy keme len hawe udun, ya uru kasahan ari buruwen.’ Jenesis 2:24
6 Kindrei asehek anya, bada uru la-uh bwe, bada uru ndrasahan ari le buruwen. Idoh le, saba lakou Kindrei ndrasawei mari ndrase, ari ndramak sasaniy ja ai.”
7 Ya oro Parasi tiye tan i buku doh, “Ya buku sah handru Moses atehei sahou batanau eme tataha ya iy asehek anya ndramak winiyan atorou la-ukei ta amendren tasou ya iy atehei i mine badih ano iy winiyan aruwe badih iu?”
8 Eme Jises asumon i buku doh, “Batu ado boto-on labai, eme Moses aruwe ado ta atikah badih iu. Arile bwena handru kandriyen doh bwe.
9 Jo asehek ewek tado i buku doh. Buku none udu ari ndramak bamekes madasarah bwe, ya udun ruwani iy, ma iy i tasou i ta badih ari ja, iy le mesekei karei i tan.”
10 Oro lau ta Jises anuhun sahou doh, ya oro asehek i buku doh, “Buku none ndramak anya ki-in hamon ta kandriyen buku doh ya iy in hawe udun, sebwe mwasin mwan satasou, ndri-iy.”
11 Jises asehek i toro i buku doh, “Iri lau mari winiyan bakohok sahou dah bwe. Kindrei atehei boto-on i ta lau ra-on le.
12 Ado kanuhun. Iri lau rayah areu kede-eh iri ale batasou bwe. Lau ra-on bada iri andra-i kala tine iri tuwi iri. Lau ra-on asan iri, ma iri winiyan bamekes nah bwe, ya ra-on abudon ta amekes gok ta Kindrei, ya iri abeles iri ya iri batasou bwe. Arile, are lau winiyan akohok sahou dah, iy kakohok.”
Jises anya oro karuwe oro nah kame hawen
(Mak 10:13-16; Luk 18:15-17)
13 Kala doh iri lau atiye iri nah bwisik ame hawe Jises. Iri aso-ok anya Jises katehei minen ki la-u iri nah nane, ya iy kasolom. Arile oro lau ta Jises abolosen i tiri lau nane.
14 Arile Jises tiye toro lau tan i buku doh, “Ado karuwani iri nah kame hawek. Ado saturuk iri, ndri-iy. Tondrok ta Kindrei badeh, tiri lau buku iri nah nadu bwisik kede-eh.”
15 Eme iy atehei minen i la-u iri nah nane, ano iy ruwani kon nane ma iy iu.
Ndramak ari loweu tan lakou solo-an asehek sahou hawe Jises
(Mak 10:17-31; Luk 18:18-30)
16 Eme ndramak ari eme atou Jises ma iy anya, “Ndramak ta leheya, jo kamekes saba kandriyen mwasin handru ya jo kakohok kohan mwasin ta ereu le buku doh len mari?”
17 Jises tiye i tan i buku doh, “Tasah handru ya ou ndremenya jo ta kandriyen mwasin? Ndramak ari le Kindrei, iy mwasin labai. Arile, buku none ou anya akohok kohan mwasin ta ereu le buku doh, ou a-en hamon ta sahou batanau ta Kindrei.”
18 Eme ndramak nane ndremenya Jises ja i buku doh, “Ou asehek ta saba sahou batanau handru?”
Jises anya, “Iri sahou batanau ale anya,
‘Ou sadai ndramak samak, ou samekes karei ta badih tasou. Ou sabahana, ou sawasai, ma sadeu iri lau laleyah sala ta mada sahou, ndri-iy.
19 Ou a-en bahandra tamam uru tinem, ma ou anuhun sahou turu.’ Eksodus 20:12-16
Ya,
‘Ou aseken iri lau ari ari badu hawem, i le buku ou aso-ok ou le.’ ” Lebitikus 19:18
20 Eme ndramak loweu nane asehek ta Jises i buku doh, “Jo badeh, in hamon ta sahou batanau mari, ya saba lakou ja jo kamekes?”
21 Eme Jises asehek tan i buku doh, “Buku none ou anya asahan ndramak mwasin handru, mwasin, ou ala atehei iri lakou tam mari kili mada ba-en, ya luk ou akohok ta iri lakou tam nane ou adeu ki tiri lau tiri lakou bwe. Ou amekes i buku doh kameh ou tam lakou mwasin handru udu kandrah. Ano ou bara-en hamon tek.”
22 Ndramak loweu nane anuhun sahou doh, ya budon tan andra-i, ma iy iu ai, tasah tan lakou solo-an labai.
23 Eme Jises tiye toro lau tan i buku doh, “Jo tiye handru ewek tado, idah kameh, boto-on labai ta ndramak tan lakou solo-an, i buku none iy anya kili bolo tondrok ta Kindrei!
24 Jo asehek tado ja, masakan boto-on boto-on labai ta ndramak tan lakou solo-an ta iy ili bolo tondrok ta Kindrei, arile manamun labai ja ta kamel i buku iy i bolo manamunu nunu.”
25 Oro lau tan anuhun sahou doh mani oro atur labai, ma oro anya, “Buku none i buku baden eh, are lau handru kameh winiyan akohok kohan mwasin ta ereu le buku doh?”
26 Eme Jises anyolom amwenen i toro, ma iy anya, “Lau winiyan bwe. Arile Kindrei winiyan mesekei lakou mari.”
27 Ya Pita asumon bohon anya, “Ou atou, aso ndraruwani lakou mari, ya aso ndra-en hamon tam. Ya idah kameh aso kakohok sasah handru?”
28 Jises asehek i toro i buku doh, “Jo asehek handru ewek tado, na len lakou mari asahan ha-un, ya Nadu Ndramak Awas kameh akohok nyaran i tinan, ma iy kameh manyah udu koyeu ta kabin, koyeu doh tan amwenen. Na len doh ado lau ale an hamon tek, ado ale kameh manyah ado koyeu ma ronoh la-uh mwasin, ma ado kameh anuhun sahou toro boho kamen ma ronoh la-uh badu Isra-el.
29 Ya are mwan ma badih ale abudon nyarak, ma iy ruwani asiu tan ma nadu tinen mwan ma buru-un, ma taman uru tinen, nadun ma bilin tan, iy kameh akohok ndramas buku san rinek (100) ja i la-un, ma akohok kohan mwasin ta ereu le buku doh.
30 Arile lau solo-an na dah areu bwena, iri kameh ame hamon. Ya iri lau solo-an na dah areu hamon iri kameh ame bwena.”