22
Sahou sokek ta nyamon tinan ta tasou
(Luk 14:16-24)
1 Jises amekes sahou sokek ili tiri lau ja i buku doh:
2 “Tondrok ta Kindrei i buku none ari kabin, nadun mwan anya ki tasou, ya kabin nane mesekei tine nyamon.
3 Ma mwena handru iy atehei sahou ili tiri lau kame ta nyamon ta tasou ta nadun. Ya, na len ta nyamon amwenen iy suni oro lohowan tan ala kaloh iri kame ta nyamon. Arile iri bwale iri.
4 “Ya iy suni oro lohowan tan ra-on ja, ma iy tiye toro i buku doh, ‘Ado kala katiye tiri lau nane jo ndraluhi iri, ma ado katiye toro buku doh, jo ndralowosani nyamon kabwe. Iri bulumakau mwan ma hawe iri bou apar jo ndradai kabwe, ma jo ndralowosani lakou mari kabwe. Aha kame le kaimon nyamon ta tasou.’
5 “Oro lohowan tan au ala tiye tiri lau nane, arile iri bwale iri anuhun, ma iri au ala amekes budon tiri amwenen. Ari iu ili bolo bilin tan, ari iu ili amekes gok ta akohok luk tan amwenen.
6 Iri rayah tawi oro lohowan ta kabin nane luhani oro, ma adai oro amak.
7 Eme ya kabin nane ibolosen, ma iy suni oro lau tan ta bahun ala adai iri lau nane, ma sulumwi kon tiri andrakak iu.
8 “Eme kabin nane anya, ‘Nyamon ta tasou ndralowosaniy kabwe, oro lau nane jo aloh oro ma bwena, ado kamani oro.
9 Ado kadek kala madasan mari, ya are lau ado ndruniy, ado kaluhi iri kame ta nyamon ta tasou.’
10 Iy tiye i buku doh, ya oro lohowan tan nane au ala kon mari, ma oro luhi iri lau mwasin ma ndra-in ale ame. Asiu ta tasou nane aso na lau.
11 “Iri lau mari nane manyah ado andri, ya kabin nane eme bolon atou iri. Madan ili, iy atou ndramak ari, iy batehei awin ta ame bolo nyamon ta tasou nane bwe.
12 Eme kabin nane ndremenyani iy, ‘Kawas tek, buku sah handru ou basini ari awin mwasin ta ame bolo nyamon ta tasou dah bwe?’ Iy ndramak nane basumon bwe.
13 “Kabin nane tiye toro lau ta ndrokei tan anya, ‘Ado kasawei katin ma minen ya ado kakahei iy ki-iu kili manan bolo lulik. Bolo lulik doh kameh iri lau aden andra-i labai ma lihi iri kameh asenyer andra-i labai.’
14 “Ado kanuhun. Kindrei aloh taha mari. Arile iy ndralebelei ndramak ari, ari ta ili bolon.”
Taha kadeu takis ki ta Sisa, deh, ndri-iy?
(Mak 12:13-17; Luk 20:20-26)
15 Eme iri Parasi au ala manan atilik sahou tiri i se, ta takaleh madasan ta bolowa Jises ya sahou tan kinyon ma iri katehei iy ki mada sahou.
16 Iri suni oro ra-on tiri hawe oro lau ra-on ta Herot, ala atou Jises, ma oro tiye tan i buku doh, “Ndramak ta leheya, aso tanan, ou lau ta asehek sahou handru. Ya, na sahou handru ou ale leheya iri lau mwan ma badih ta kandriyen ta Kindrei. Ou banoh ta ari ndramak bwe. Ya, ou asehek sahou ari le ili tiri lau mari, buku ndramak nyaran tinan, deh, ndramak iy nyaran bwe.
17 Eme ya, ou asehek kamwenen keme taso. Ou abudon buku sah? Mwasin ta taha kadeu takis ki ta Sisa, deh, ndri-iy?”
18 Arile Jises ndratanan budon toro ndra-in. Eme ya, iy asehek i buku doh, “Ado lau ta wasai, buku sah handru ado anya kanone jo?
19 Ado kaleheya keme tek ari luk nane ado asih takis tado na aliy.” Eme oro andrei luk bororoh ari ili minen.
20 Eme Jises ndremenyani oro i buku doh, “Malawi ndramak ma nyaran kede-eh are lau handru?”
21 Oro anya “Ta Sisa.”
Iy tiye toro, “Mwasin, saba lakou ta Sisa, ado kadeu ki ta Sisa. Ya saba lakou ta Kindrei, ado kadeu ki ta Kindrei.”
22 Oro anuhun sahou doh ma boho oro asak. Eme ma, oro ruwani iy ma oro au ai.
Oro sadusi ame ndremenya Jises ta lau ndramak ano amak ja
(Mak 12:18-27; Luk 20:27-40)
23 Na len le nane, oro Sadusi ame hawe Jises anya kanone iy. Oro anya, iri lau ale ndramak bwena mene, iri kameh winiyan bamak ja bwe. Eme oro ndremenyani Jises i buku doh,
24 “Ndramak ta leheya, Moses bwena mene anya,
‘Buku none ari ndramak imek, ya iy nadun bwe, nadu tinen kameh kandrei nyau tan ki udun, ya iy katehei nah ki tan, ma nah doh ki nyara nadu tinen, ya nyara nadu tinen sa-au, ndri-iy.’ Dutoronomi 25:5
25 “Ya, len ari bwena, oro lau ma ndro taloh nadu tine oro areu ndrokowa ahi dah. Eme kadok toro i tasou ta badih ari, ya iy nadun bwe ma iy imek. Ma iy ruwani udun i mine nadu tinen oro.
26 Bwaneh andrei iy, nadun bwe ale ma iy imek. Silih andrei iy buku aliy le, badih nane andromwei oro mari ano ili isos ta kalai.
27 Oro amak, ya hamon ta aliy badih nane imek ale.
28 Ya, ou tiye taso. Na len hamon ta iri lau mari amak ame loken ja, badih doh kameh ili udu are lau handru? Ou tanam, iy i tasou ili toro mari.”
29 Eme Jises asumon boho oro i buku doh, “Ado ndrandra-i labai, tasah ado tana ado tarou ereu bolo buk ndrabun ta Kindrei bwe. Ma ado tana ado boto-on ta Kindrei bwe ale. Eme ya ado asehek sahou laleyah.
30 Na len iri lau ndramak kameh amak ame awas ja, ya iri kameh winiyan bala batasou ja bwe. Iri kameh asahan buku iri angelo areu kandrah.
31 Handru labai. Iri lau ndramak bwena, hamon kameh iri amak ja. Sebwe ado batou bolo tarou ta Kindrei iy mene asehek ewek tado bwe nadeh? Iy asehek i buku doh,
32 ‘Jo Kindrei ta Abraham, ta Aisik, ma ta Jekop.’ Eksodus 3:6
Sahou doh leheya taha i buku doh: Kindrei atondrok koha oro ma taloh, ma oro ado awas ado hawen kahis le. Eme ma, Kindrei batiye anya iy mene Kindrei tiri lau ndramak, arile na dah, bwe. Bwe! Iy badeh, Kindrei tiri lau koha iri udu aliy kahis le.”
33 Iri lau mari anuhun sahou doh, mani iri atur ta sahou tan.
Batanau ta Kindrei udu bwele-en labai
(Mak 12:28-31; Luk 10:25-28)
34 Kala doh oro Parasi anuhun buku Jises ndrasokei san toro Sadusi. Eme oro Parasi tukumwi oro a se ma oro ame atou Jises.
35 Ereu ndrokowa oro, ndramak ari iy tanan labai ta sahou batanau. Iy anya kanone Jises na sahou ya iy ndremenyani iy i buku doh,
36 “Ndramak ta leheya, saba sahou batanau badeh, tinan handru ma sakalawi iri sahou batanau mari?”
37 Eme Jises asumon i buku doh,
“ ‘Ou aseken Laban tam Kindrei na ndrinem mari, ma na koham handru mari, ma hawe na budon tam mari.’ Dutoronomi 6:5
38 Sahou batanau dah tinan handru ma iy batanau udu bwele-en labai.
39 Ya sahou batanau ari ja i buku le aliy,
‘Ou aseken iri lau ari ari badu hawem, i le buku ou aso-ok ou le.’ Lebitikus 19:18
40 Sahou batanau ma la-uh doh kati iri sahou batanau malen mari hawe sahou tiri propet ale.”
Jises ndremenya oro Parasi ta Krais o Mesaya
(Mak 12:35-37; Luk 20:41-44)
41 Oro Parasi atukum kahis le, Jises ndremenyani oro buku doh,
42 “Ado abudon i buku sah handru ta ndramak taha aloh Krais o Mesaya? Iy nadu are handru?”
Eme oro tiye i tan i buku doh, “Iy nadu Debit.”
43 Jises ndremenya oro ja i buku doh, “Ya i buku sah handru ya Malawi Ndrabun atehei budon i ta Debit ya Debit aloh ndramak nane ‘Laban’? Debit asehek i buku doh,
44 ‘Laban Kindrei tiye i ta Laban tek i buku doh:
“Ou ame manyah ado loboho minek salin,
winiya jo le baratehei iri lau ta amekes budon ndra-in i tam barado bahandra katim.” ’ Wari 110:1
45 “Ado kanuhun. Debit amwenen aloh ndramak nane Laban tan. Ya ki buku sah handru kameh iy ndramak nane ja ki nadu Debit?”
46 Ari toro winiyan basumon boho Jises bwe. Kala le doh, iri anoh ta ndremenya Jises ta randra sahou ja.