12
Lamatuak Dulan, fee koasa neu ita, fo tao ues mata-matak
1 Tolanoo susue nggalei! Au nau fo ei bubuluk laꞌeneu koasa ndia, ma babaꞌek fo Lamatuak Dulan fee ita, fo suek ita paken.
2 Ei bubuluk so, mae, faik ei bei ta dadik Lamatuak hataholi nala, ei mambue masonggok bua hala taa kala. Ei tungga sala mboke-mboke.
3 Huu ndia de, au nau fo ei bubuluk, taa bisa hambu hataholi fo nanambaꞌak no Lamatuak Dula Dale Malalaon nae, “Yesus mate nduadaak leo!” Ma taa bisa hambu hataholi fo taa nanambaꞌak no Lamatuak Dula Dale Malalaon nae, “Yesus ndia na, au Lamatuang!”
4 Lamatuak Dulan, fee hataholi esa-esak tungga ndia babaꞌe-babatin, fo ala lakalalaꞌok esa-esak no ndia uen. Tehuu, basa babaꞌe-babati kala sila, leme Dulak esa mai.
5 Hataholi hambu babaꞌe-babati mata-matak, fo ono-lau hataholi, tehuu basa sala lamanene leme kada Lamatuak esa mai.
6 Hataholi mana hambu ues mata-matak, fo lakalalaꞌok Lamatuak uen, tehuu, kada Manetualain ndia, tulun sila, fo lakalalaꞌok basa ues sila.
7 Lamatuak natudu Ndia Dulan neu hataholi esa-esako sodan, no dala mana feꞌe kala, tehuu, no maksud fo suek basa sala laua-lanale noꞌu.
8 Ana fee Ndia Dulan koasan neu hataholi nala. Luma hambu babaꞌek fo ala bisa duduꞌa naluk, suek fee nanoli-nafadak no mandaan. Luma hambu babaꞌek fo lafada manggaledok, hata fo ala bubuluk.
9 Luma bali, hambu babaꞌek fo lamahele tea-tea leu Manetualain, huu sila nanambaꞌak neulalau lo Ndia Dulan. Luma bali, hambu babaꞌek fo tao lahai hataholi kamahedik.
10 Luma bali, hambu babaꞌek fo tao tanda heran mata-matak, fo latudu Manetualain anaselin. Luma bali, hambu babaꞌek fo lafada Lamatuak hehelun leu Ndia hataholi nala. Luma bali, hambu babaꞌek fo bisa bubuluk dulak bee ndia maokak nai Manetualain, ma bee ndia taa. Luma hambu babaꞌek fo bisa kokolak nenik dedeꞌak neme Lamatuak Dulan mai. Luma bali, hambu babaꞌek fo bisa kokolak langgaleledo dedeꞌa kala sila sosoa-ndandaan.
11 Tehuu, kada Dulak esak fo tao sila basa sala bisa tao ues sala sila. Ana fee hataholi esa-esak fo ala labeꞌi tao ues tungga Dulak hihii-nanaun.
Ao-inak esa, ma ndia babaꞌen mata-matak
12 Au sangga akasasama babaꞌe kala sila, lo hataholi aon. Aok esa, na, babaꞌen mata-matak. Tehuu, babaꞌe mata-mata kala sila, nanambaꞌak dadik leu kada aok esak.
Ndia, sama leo Karistus hataholi nala.
13 Ita basa nggata nanambaꞌak to Dulak esa. Huu ndia de, ledoeik ita hambu salanik, na, ita dadik sama leo hataholi nusak esa. Mae, ita hataholi Yahudi do, taa Yahudi, ata do, taa ata, huu Manetualain fee ita basa nggata kada Dulak esak. Ndia sama leo ita basa nggata tinu oe fo neni sodak neme kada oe matak esa mai.
14 Memak, ao-inak ndia, taa kada babaꞌek esak. Huu ndia ndia, dadik neme babaꞌek noꞌuk mai.
15 Leo o eim nae, “Au ia, taa limak. De, au taa dadik babaꞌek neme o ao-inam mai.” Mae ana kokolak leondiak boe oo, tehuu, ndia bei babaꞌek neme o ao-inam mai. Tetebes, hetu?
16 Ma mete ma o ndiꞌidoom nae, “Au ia, taa mata. De, au taa dadik babaꞌek neme o ao-inam mai.” Mae ana kokolak leondiak, tehuu ndia bei babaꞌek neme o ao-inam mai.
17 Duduꞌa dei! Mete ma o ao-inam basan dadik neu kada mata, na, talobee fo o bisa mamanene? Ma mete ma o ao-inam basan dadik neu kada ndiꞌidook, na, talobee fo bisa hae laꞌe book?
18 Tehuu ei bubuluk so, Manetualain tao nala ita dadik sama leo ao-inak esa, ma Ana heti ndia babaꞌen mata-matak, tungga Ndia mata-aon.
19 Mete ma ita ao-inan kada dadik neme babaꞌek matak esa, na, naden taa ‘ao-inak’ bali hetu?
20 Tehuu ndia teteben, na, ita ao-inan naena babaꞌe mata-matak. Ndia tao dadik ao-ina katemak esa.
21 Hataholi matan taa bisa tao nakadadaek hataholi liman, nae, “Au taa paluu o!” Ma hataholi langgan taa bisa nafada hataholi ndia ein, nae, “Au taa paluu o!”
22 Ndia teteben, na ndia hambu ao-inak babaꞌen fo ita taok taa balakaik, ma sosoan taa, tehuu, ita bei paluu sala.
23 Hambu babaꞌek fo ita taok sosoan kada fak, tehuu, ita bei takaboi neulalau sala. Ma, hambu babaꞌek fo ita mae tatudun boe ma ita mboti neulalau sala.
24 Tehuu, mete ma babaꞌek fo taa tao nakamamaek ita, na, ita taa tao hata-hata neu sala.
Tehuu, Manetualain nakabubua basa babaꞌe kala, fo tao sala dadik ao-inak esa. Boe ma, Ana heti fo babaꞌek taa kasosoak na, ita takaboi neulalau sala,
25 huu, Ana taa hii ita ao-inan nana babaꞌek. Ana nau fo basa babaꞌe kala, esa suli esa.
26 Huu, mete ma babaꞌek esa hambu totoꞌak, na, basan namedan boe. Ma mete ma, esa hambu hada-holomata, na, basan lamahoko tungga boe.
27 Leondiak boe neu ei. Huu, ei sama leo Karistus ao-ina kateman. Tungga-tungga hataholi kamahelek dadik sama leo babaꞌek esa neme Karistus ao-inan mai.
28 Huu, nai hataholi kamahelek lalada nala, Manetualain fee koasa fo tao ues mata-matak.
Kaesan, Ana nadenu hataholi luma leu lafada Ndia hehelun.
Kaduan, Ana pake hataholi luma dadik neu mana kokolan.
Katelun, Ana tao hataholi luma malelak fo lanoli hataholi feꞌek laꞌeneu Ndia.
Boe ma, Ana fee koasa neu hataholi luma fo tao tanda heran mata-matak, fo natudu Ndia ana selin.
Luma bali hambu koasa fo tao lahai hataholi kamahedik.
Luma bali hambu babaꞌek fo tulu-fali hataholi.
Luma bali hambu babaꞌek fo bisa lakaneni hataholi fo ala tao ues noꞌu lo malole.
Ma Ana fee koasa neu hataholi luma bali, fo bisa kokolak lenik dedeꞌak neme Lamatuak Dulan mai.
29 Ei duduꞌam leobeek? Manetualain nadenu basa hataholi la fo leu lafada Ndia hehelun do? Taa. Ana tao basa hataholi la dadik leu Ndia mana kokolan do? Taa. Ana tao basa hataholi la lanoli lalelak do? Taa. Ana fee koasa neu basa hataholi la fo bisa tao tanda heran do? Taa.
30 Ana fee koasa neu basa hataholi la fo tao lahai hataholi kamahedik do? Taa. Ana tao basa hataholi la bisa lakokola lenik dedeꞌak neme Lamatuak Dulan mai do? Taa. Ana tao basa hataholi la bisa lafada dedeꞌa kala sosoa-ndandaan do? Taa.
31 Ei musi mahehele fo simbok ma pake babaꞌek kasosoak ndia fee hataholi noꞌu kala.
Mae leondiak boe, tehuu au bei nau atudu ei dala malolen nalan seli.