3
Paulus naketun haitua Timotius neni kota Tesalonika neu
1-2 Sadi ei bubuluk, faik fo ai laꞌo ela ei, na, ai hihiin ta ndia. Basa ndia, na ai mahiik neti tilo ei, te ta bisa. Doo-doo boe ma ai ta makatataka mala dook so, huu ndia de ai maketu malan fo haitua Timotius neti. Te kada au ma Silas mahani nai kota Atena. Timotius ndia, na, ai tolanoon ma ai nonoo tao ues, fo ai eik esa sama-sama makalalaꞌok Yesus Karistus Hala Malolen. Ai madenun neti nanoli ei, ma tao natetea ei dale mala, suek ei namahehele mala boe tamba natea neu Manetualain.
3 No leondiak, na, mete ma hambu totoꞌak boe oo, ei ta matanggongga boe. Toꞌu mahele ei namahehele mala. Te ei bubuluk, mae, hataholi fo namahele neu Karistus, neu ko hambu totoꞌak leondiak.
4 Makahulun ai bei sama-sama mia ei, ai tao masanenedak ei so, mae, hataholi fo kamahelek neu Lamatuak Yesus, neu ko hambu totoꞌak mata–mata kala. Hatematak ia, basan dadi leondiak so hetu!?
5 Huu au dale hedi alan seli soaneu ei nanggatutuu–nambadedei mala, de au adenu Timotius neni Tesalonika neti, suek ai bisa bubuluk, ei bei mamahele makandoo neu Lamatuak, do, ta. Te au bii nafo nitu la malanggan, neti fufudi nala ei, boe ma ei heok masadea laꞌo ela Lamatuak. Mete ma ana dadi leondiak, na, ai mbuse titin nai fai makahulun, titi neu dae, no sosoan ta!
Timotius fali so, de neni halak neme salani kala malai kota Tesalonika
6 Hatematak ia, Timotius fali neme Tesalonika mai so, ma neni halak, fo tao nala ai mamahoko. Ana tui, nae, ei mamahele makandoo neu Karistus, ma ei masueao esa no esa makandondoo henin. Boe ma, ana tui nae, ei boe oo, dokodoe ai taa-taa, de mahiik matonggo mia ai, sama leo ai boe, fo mahiik matonggo mia ei.
7-8 Tolanoo nggalei! Leo mae ai nai ia, mameda belak, huu hambu totoꞌak ta baꞌianak sudi neme bee mai, tehuu Timotius tutuin ndia tao nala ai mamahoko malan seli. Huu hatematak ia, ai bubuluk so, mae ei namahehele mala matea neu Lamatuak nakandoo henin.
Paulus hule–haladoi fee salani kala malai kota Tesalonika
9 De, ai moke makasi noꞌun seli, neu Manetualain no dale namahokok, huu ei tungga mahelen.
10 Leledo–leꞌodaen, ai hule–haladoi taa-taa, fo mete ma bisa na, ai bei bisa matonggo mia ei bali. Ai nau manoli tao matetu ei laꞌeneu Manetualain dala sodan.
11 Ai mamahena neu Manetualain, ita Aman, ma Yesus Karistus, ita Lamatuan, fo soi dalak, losa ai bisa neti matonggo mia ei bali.
12 Ai hule neu Lamatuak, fo Ana tao ei esa sue esa lena-lenak bali. Ma ei boe oo, sue basa hataholi la, sama leo ai sue ei boe.
13 No leondiak, na Lamatuak natetea ei dale mala, fo masoda no ndoos ma dale malalaok, losa faik fo Lamatuak Yesus fali main no hataholi nala, na, ei mambadeik nai ita Aman Manetualain matan, ta lemba salak hata esa boe.