Atham woPelemun
Atham ammakka oPoluc pokurrinet oPelemun
Pul pothothïlettat poIeccuo oPoluc pokat ikorrkkor nocaꞌri ica kwokurrinet opuruko oPelemun lon elli. OPelemun pokat papaꞌrthan. Ana man mung mokat kaꞌran na ul ioccokothe lon loKapik ocurttarot tothun. Pul iparekine oPelemun ipoccot kꞌran itti Oneccimoc pokat pollothe opït oPelemun. Anakka oPoluc pokat cik ikorrkkor, kwiathe Oneccimoc ipothakkakathe pul ipammakot oIeccuo.
OPoluc pothïathe Oneccimoc llon elli akwopakkinthet opït oPelemun akwiꞌrekat oPelemun itti akwoccïkot opït Oneccimoc akwipittothok akin opakkot ikuꞌri akin Oneccimoc akwokathakathok ammakka opang ilon loMiccie.
Lon ilaik iatham
1. Thomicco thaine oPelemun (1.1–3)
2. OPoluc papirane Kapik noka naPelemun (1.4–7)
3. OPoluc pipittot oPelemun akwopakket Oneccimoc tuan (1.8–22)
4. Thaꞌra ngaꞌrama ana thomicco ithacothot (1.23–25)
1
1 Oun oPoluc ipaik ikorrkkor nti ilon loIeccuo oMiccie ana oThimiththaoc opang ponnon, onïn thaik thakurrinung, Pelemun opuruko pïn iire,
2 ana ul ioccokothe lon loIeccuo iaik waꞌraꞌra ngaꞌrama tuan thanang ana Appia opang ponnon ipopari ana Arkkippic okkwi ipapuruku pïn ilon loIeccuo.
3 Athoporot ana thomicco thoKapik oNgappa ponnon ana thoIli oIeccuo oMiccie oka nanon.
Thopirane Kapik noka ana ngaꞌrama
4 Mpapirane Kapik kin noka amma anokwarttikothung iaꞌrama ngin appinappin,
5 akka mpaik paccïccïkot lon lothoccokot lon nocïkït loIli oIeccuo thang ana thongat ul appik iupupure woKapik.
6 Mpaꞌranung ngaꞌrama itti aka popoꞌrat than ntherene ul lon lothoccokot lon loKapik nomïkït then, othakka itti aul ina kicce lon iloporot ilaron thonu iaMiccie.
7 Thongarot thang thopirierin noka cannan ana thopoꞌrierin than akka onon thopiriet mïkït moul iupupure woKapik noka.
OPoluc perene oPelemun lon loNeccimoc
8 Antoka manna itti mponu ngili ikkun naMiccie itti mpiꞌrethung ila ngkwonu itti ngkwakkot
9 anaruk nti ilon lothongarot, mpipittothung, oun oPoluc ipukkwat ana cakuruk ipaik ikorrkkor nti ilon loMiccie oIeccuo
10 mpaik mpipittothung itti aittarot ukul win Oneccimoc ipothakkat ukul win ilon loKapik, ampaik ikorrkkor.
11 Cittokït kwokat pellat lon cik naung anaruk inenni kwothakkat poporot naung ana naun.
12 Mpaik pathïnthet non ngok, ook ipa cïkït cin caik nan itti kwainung.
13 Mpongothe itti kwikkoik cene ïnaththeꞌra, othakka itti akwittarothin ikorrkkor ika mpaik tit nti ilon iloporot loIeccuo akka ngkwella iccik kin.
14 Anaruk mpakannangkot itti mpakkot lon lꞌrek angkwakannothïot tit, mpongothe itti lon lung iloporot lanthan nocïkït cang ana okonnoka itti ngkwakkot mpuꞌran.
15 Lon ila kwappopettakinet nti iaung papotteik, othakka itti akwathokkaprttakinung ntan pꞌrïnpꞌrïn.
16 Okorronno oka itti kwaka piak puccuk anaruk kwaka opangkang. Ook opangkin anaruk ook opangkang cannan ammakka pul iponyi opang ponnon ilon loIli oIeccuo.
17 Amma onon thakathan itti oron thulukku, nikkiek cik ammakka onon thaikkierin cik.
18 Ana amma kwappokkinthung lon lꞌrek moloko ana manna onekothung aꞌrupu wꞌrek, ipittothin ana mpekkenung.
19 Oun oPoluc akkaik pakurrinung elli nnukun win, “Mpakkekung.” Anaruk kirrinni urenan itti mpokorronnorung accokot lon loIeccuo.
20 Pangkin, mpongothe itti mpiot lon iloporot naung ilon loIli ilapoꞌrie cïkït cin than ilon loIli oIeccuo oMiccie.
21 Mpaik pakurrinung ana mponu cïkït naung itti ngkwakkot loppot na ila mpipittothung itti ngkwakkot.
22 Mponu alꞌrek anappiꞌrethung, okkinthin kaꞌran papenang na nathikkoik, akka mpongothe itti ngaꞌrama ngon ngaccïkakot anokkaprttakinenon.
Lon ilacothot
23 Apapprac ipanïn thaik cene ïnaththeꞌra ikorrkkor nti ilon loMiccie oIeccuo paik pamiccong.
24 Ana cakuruk oMarkkoc ana Arcciththrikkoc ana oThimac ana oLukka, opuruko pingon ire ngoKapik thaik thamiccong.
25 Athoporot thoIli oIeccuo oMiccie oka nanon appik.