8
Thikkoik ngKanang koKapik
1 Ittina, inenni thakkmako thella nakkwion ithaik okin oIeccuo oMiccie,
2 akka nti ilon loMiccie oIeccuo, lon lothonceꞌret lon cik loKanang kothikkoik lelikkorin nti ilon lothonceꞌret lon cik lolon ilokithak ana lothio.
3 Akka lon ila lon lothonceꞌret lon cik loMucca lokat lommat okkot, lokat lommat akka lon lonnon ilokithak ilaron thokwontat ngngin, anaruk Kapik kokkathe lon len nthothïot ukul wung ntan ngka kungkot kopul iponyi athoka papu pothokiot ngüccük cik nti ilon ilokithak. Ana oIeccuo popaꞌrekathe lon cik ilokithak nti ipul ipokithak.
4 Othakka itti alon ila lon lothonceꞌret lon cik longothe itti laka iaron aloka iaron oron ithaik thakannikkoik ammakka ka ikonyi ikokithak kongothe anaruk ammakka Kanang koKapik kongothe.
5 Okkwion ithaik thikkoik ammakka ka ikonyi kongothe, okin thaik thammakot lon ila ka ken kongothe lulluk ilokithak anaruk okkwion ithaik thikkoik ammakka Kanang koKapik kongothe okin thaik thammakot lon ila Kanang koKapik kongothe.
6 Ngatheꞌre ngopul polon ilokithak ngiot anaruk ngatheꞌre inga Kanang koKapik kaik nan ngaik ngkït thapat ana ngoporot,
7 ngatheꞌre ngolon ilokithak ngorro ilon loKapik. Ngakannoccïkot lon lothonceꞌret lon cik loKapik ana ngakannoreko llon len.
8 Okkwion ithaik thammakot lon ila ka ikonyi kongothe, thakannopirie Kapik noka.
9 Anaruk onon thaik thakannommokot lon ila ka ikonyi kongothe anaruk onon thaik thammakot Kanang koKapik amma kaik ianon. Ana okkwi ipella Kanang koMiccie kwakannoka poMiccie.
10 Anaruk amma oMiccie paik ianon, ka kon killet nti ilon ilokithak anaruk icci Kanang koKapik kaik ianon akka onon thoporot tokït koKapik.
11 Ana amma Kanang kokkwi ipurokiet oIeccuo nti ithio kaik ianon, okkwi ipurokiet oMiccie nti ithio pethet ka kon thikkoik ngKanang kokkwi ipaik ianon.
12 Ittina pangkingon oron thonu itti oron thakannikkoik thikkoik thoka ikokithak.
13 Akka amma onon thikkoik thikkoik thoka ikokithak ana onon thille anaruk amma onon ikkoik ngKanang koKapik onon thakkwot lon ilokithaki ilaik ika kon ana onon thakkoik.
14 Ana okkwion itha Kanang koKapik kaik nan, okin thanyukul nyoKapik.
15 Akka onon thakannocco Kanang ikathakkienon iak annipo nꞌre attang anaruk onon thoccot Kanang ikathikkienon nyukul. Ana ngKanang ken oron thakkaro itti, “Appa, ngappa ponnon.”
16 Kanang ikupupure koKapik ngkanang konnon thakene itti oron thanyukul nyoKapik.
17 Ana inakka oron thanyukul nyoKapik, oron ana Kanang thapakkot naꞌrupu woKapik ia kapponekkenthet ton cik ana oMiccie, amma oron akkaik thaccokot thiak oron oMiccie, othakka itti aron oka ithrïk oron aththut.
Thrïk ithanthan
18 Mpakatha itti thoccokot thiak thonnon enthi, thakannoka ammakka thrïk ithathittako ncik iaron.
19 Aꞌrupu wonocapu waik waꞌrïkot nyukul nyoKapik cannan itti wakenetta kin.
20 Akka aꞌrupu wonocapu appik wonat nꞌre ana nꞌre nen nokat nipiettat kin ngKapik ikokkothe capu aul ona thoꞌrïkot cik.
21 Othakka itti aꞌrupu ncik appik elikkako nti ithoccokiettat thiak tholon ilokithak akin onakatta ithrïk nuthuk thonyukul nyoKapik.
22 Oron thina itti aꞌrupu ncik appik wokat accokot thiak manna inenni ere thokꞌrellako thokkul amma akwonta akꞌrello pul ipakwono.
23 Okorronno oka menik tulluk, anaruk oron ngka konnon ithonu Kanang koKapik, thaik thaccokot thiak aron thaik thaꞌrikot thelikkako thoka konnon cannan ana thoka konyukul nyoKapik.
24 Akka ithoꞌrïkot cik enthi oron thoꞌrettathe. Anaruk thoꞌrïkot cik ithimmako thakannoka thoꞌrïkot cik. Oththa akkaꞌrïkot lon ila kwimmat ngkït?
25 Anaruk amma oron oꞌrïkot aꞌrupu iaron thella oron thaꞌrikot nthoccokot mïkït.
26 Menik, Kanang koKapik kittarot ton ithommaik thonnon. Oron thomma lon ilaron thaik thaꞌrane ngaꞌrama anaruk Kanang ikupupure akkaꞌraneron ngaꞌrama llon ilommakot.
27 Ana okkwi ipakwancot mïkït monnon pina ngatheꞌre ngoKanang ikupupure akka Kanang ikupupure akkakkinthet ul iupupure woKapik lon ila Kapik kongothe.
28 Ana oron thina itti ilon appik Kapik kaik karekine ul iongothok, okin ithakkarakothe llon ila kwakkarothekin.
29 Akka kinat ul ia kakkarot ana kakkarot kin akin oka ere ukul wung wonthon othakka itti aukul wung ina akka aka ukul wonothon ithoꞌrkït thopangon appik.
30 Ana okkwion itha kinat kakkarot ana okkwion itha kakkarot, kwothikkiet kin thung ana okkwion ithothakkat thung, kwothikkiet kin thrïk.
Thongat thoKapik
31 Oron thathïot lon elli tit taththa? Amma Kapik kaik naron oththa akkalkot ton?
32 Akka kakannꞌra nukul wung anaruk kwethet ton ngok ana kwakorronno ethet ton aꞌrupu appik okin opei nuthuki?
33 Oththa akkakkma ul ia Kapik kothikkiet woporot? Kapik kulluk akkakkma kin.
34 Oththa pen akkappakkma? OMiccie oIeccuo ipiot ana ipurokiettat nti ithio ana kwaik thokkun wothothari woKapik ana ook akkerene Kapik nti iaron.
35 Oththa akkapettoron nti ithongat thoMiccie? Thïrro mïkït nti ikaraki, thokinyai, thoccokot thiaki, tïï, thikkoik munthuri ana manna thokkuttat ngkꞌrittang ikukwiri?
36 Ammakka lokurrakot itti,
“Onïn thille nti ilon lang,
Onïn thikkoik ere lungkat ilathongutta.”
37 Aa, iaꞌrupu enni appik oron thonu puꞌran poIeccuo okkwi ipongotheron naꞌrupu ialkotheik.
38 Akka mponu noucce itti papu pella ipapettoron nti ilon loKapik, lakonnoka manna thio ana manna thikkoik ana manna uꞌrupa wothothïlettat woKapik ana manna uꞌrupa iokithak ana manna puꞌran pꞌrek.
39 Ana manna okonnoka papꞌrek iprïk ana pothothïrïn ana papꞌrek nti iaꞌrupu ia Kapik kokuꞌret ncik ana nothongat thoKapik ithaik iaMiccie oIeccuo Ili wonnon.