M̃aki Nap̃a Pa Ke Pan
LE YU LALA
Nap̃a Amlelaga
Visayuena Na Tusi Nene
Suniena plas na tusi nini
Yaru nap̃a siri m̃aki nini, naga siri pano pa p̃egas tai kiena li nalelagaena lala nap̃a asum̃a am̃al ke pog m̃arera lala e kiela maliena, komin yaru la nap̃a pe amlelaga re poli asum̃a akawela ke amio la. P̃elaga nap̃a yaru la akawela manene amio la sanene, kila sane am̃al m̃arera, a lavis aligan kiela lelagaena e Yesu Kristo. Ana yaru nene pisa panila sape monar asum̃alu m̃arera e kiela lelagaena lala. Naga pisa panila sape Yesu Kristo ga pe yaru wo nap̃a pisa meraravan Ntewa pan ita. Ana na visa meraravanen suri nene, naga pisayu suri telu.
Suri na sumo, naga pisayu sape Yesu naga pe narina Ntewa kemua lelaga nap̃a sum̃a vano vano tap̃atete p̃isi pogos tai. Pe lelaga nap̃a naga pe narina Ntewa rui, ana naga m̃ena sum̃a p̃ikeyon kinasinen p̃elaga nene na logearen Ntewa, e sur la nap̃a kila naga mloge piowa e tasnena. Ana komin nap̃a naga pe narina Ntewa, naga mon la metavan navisawalena lala, pona navisi lala, pona Mosis m̃enaga.
Suri na lua, Ntewa pisawal rui sape Yesu, naga pe p̃arin yaru wa nap̃a naga mon manene metava nap̃a sum̃a vano vano tap̃atete p̃isi pogos tai. Naga pe p̃arin yaru wa nap̃a taulu make p̃arin yaru wa na sumo lala.
A suri na telu, e yum̃aena kiena Yesu nap̃a naga pe p̃arin yaru wa na mon manene metava, naga maren natamaliaen yeririna makega, p̃arplan kiela milamulena viowa lala, kila la pe amarau re si poli, a mla malena nap̃a ve uro re panila. Na kup̃ap̃aena nasumo lala, la ape totou na kup̃ap̃aena ga nap̃a Yesu Kristo kila.
E marana na keviu lualima taaga pa taaga, yaru nap̃a siri m̃aki nini naga pisayu yaru lap̃asa e Tusi Marua nap̃a amlelaga m̃arera e Ntewa. A naga pisa pa la nap̃a naga siri m̃aki nini panila, sape popon ataveve malena kiena la nene, vena akilia asum̃alu m̃arera silaga, vano vano-o tol luwasnen kiela maliena. A silaga, monar akira avisu Yesu, vena akilia ava awarpoyo e pog m̃arera lala, nap̃a asum̃a atol ke e yaru la nap̃a asum̃a akila ke m̃arera panila pap̃isi. A na kilamakeen kiena visena, naga pis ruru pan kiena yaru lala, pisa panila sape monar avisuar ruru kiela maliena lala.
Komp̃asnen tusi la na nini
Visena p̃esa. Kristo kila meraravan Ntewa panita 1:1-3
Kristo naga mon laa metavan navisi lala 1:4—2:18
Kristo naga mon laa metavan Mosis amio Yosua 3:1—4:13
Kristo naga mo laa metavan p̃arin yaru wa lala 4:14—7:28
Naviranarena viu naga mon laa metavan naviranarena marua 8:1—9:28
Kup̃ap̃aena nap̃a Kristo kila naga mon laa metavan kup̃ap̃aena marua lala 10:1-31
P̃elaga na lelagaena naga po pap̃isi 11:1—12:29
Visena la nap̃a kila yaru la asum̃alu m̃arera, a visena maro 13:1-25
1
Yesu na mon la metavan li navisawalena lala
1 Kiau erau le Yu lala, nakonua konua la rui Ntewa pisawal kiena visena yam mokliu pa kieta yermarua lala, e mrapa la moki a e p̃elaga wo la nap̃a peve tap̃ena, pimi molue kome kiena navisawalena lala.
2 Ana nanagane, e legiena maro la nap̃a tesike e ne, naga pis mesmes nena pan ita pimi kome Narina Yesu. Narina ne nane nanua sumo, e nasiien yomarava, Ntewa miyum̃ae kome naga, lalua amliganar make pog a yo lala, a siraunia, Ntewa pisirlua Narina nena, mligan sur punu ga sike e limana, naga pe p̃arun la.
3 Narina nene, naurarena kiena ne Ntewa tego e kiena malena, sane kus nena marana ne Ntewa veraga, pe totou na p̃elaga kiena ne Ntewa. A nam̃areraena na kiena visena m̃arera pap̃isi, naga ga p̃uarar sur make ga na yomarava nini, a yo tap̃ena m̃ena lala su ruru sum̃a ga. A naga ke narui naga tam̃an naga pimi kilavan make kieta mlamulen viowa lala, a pogos nap̃a kila make ruru kiena yum̃aena nene e yomarava nini, p̃asup̃e si pa ma e peni, pa to metava e lepas nen Arimana na p̃amarua, P̃arin Sup̃e nae ma e peni.
Yesu na mon la metavan navisi lala
4 Yesu totano e nene sanene, naga mon manene la metavan navisi la nap̃a asike ne, komin kia nap̃a naga p̃aria vanon kiena yum̃aena, po manene la taulu kiela kia.
5 Visae tevisu e Siriena Wa lala, visena moki nap̃a sike ea nap̃a asape Ntewa kila Narina mon manene la metavan navisi lala. E visena la ta nene, Ntewa pis pa kiena Navisaarena nena, sape
“Ko na, nepisu sane p̃ane opim ope naruu nenaga, a nepim nepe Arimom̃a kemua lelaga.” Yauena 2:7
A ta sina pisa m̃ena sanini, sape
“Yoko in na neim neve Arimana, a yoko naga ve naruu.” Sam2 7:14
Visena lua nene, Ntewa pe pisa re nena pa kiena navisi la ta poli, sape pe Narina Wa, ana pisa ga pa Yesu.
6 A visen si tai, pisayu pogos nap̃a Ntewa sinenan sape ligan narina m̃earu nene imi e yomarava, ana pisape
“Popon navisi make ga alotunia.” Naw 32:43
7 E lepas kiena ne navisi lala, la akila yum̃aena wo la mokliu, ana Visena Wa pisayu la, sape
“Navisi kiena ne Ntewa lala ap̃ar kiena visena, asa ga lagi, amiyum̃ae kiena ne Ntewa, asa ga kapi.” Yauena 104:4
8 Ana pogos nap̃a Visena Wa pisayu Narina ne Ntewa, sape naga mon manene la metavan navisi lala, pisayuia sane naga maran taaga sa ke Ntewa, pio naga Ntewa. Pisayu naga, sape
“O Ntewa, kiom̃a lele wa na totanoena naga mon lue ga na m̃eke ne. Plaki na kiom̃a nasup̃enena, naga p̃elaga wo ke narui.
9 Ko okekaran manene la p̃elaga nap̃a po, ana yepmavin visuen p̃elaga viowa, ana kiom̃a Ntewa na mava naga mligan ko opa metava, opa manene la metava otaulu kiom̃a erau lala, kila ko okekara keviu sa nap̃a miyowauia ruru ko e ponotaninu wo tai.” Yauena 45:6-7
10 A e visen si tai, tepisu nap̃a Ntewa na mava pio Narina sape Sup̃e, a pisayu pupia sur kerkeviu la nap̃a naga sii la, sape
“Sup̃e, ko ke narui ko opisirlua purp̃es nen yomarava, lumom̃a ga miyum̃aen sinapane ma metava.
11 Ana sur la nene, yoko amenunu makea, akokovio, ana yoko ko na osike osike lue.
12 Sane takue marua tai, yoko osulowar la owar plan la nenaga, a sane mom̃a kulsota marua tai, yoko oyenlua nenaga, ana yoko ko na ove urviu maran ve taaga silaga, a kiom̃a kas la tap̃atete p̃isi pogos tai.” Yauena 102:25-27
13 A visen kiena ne Ntewa tap̃ena si sike ga wa, nap̃a pe pisali re pa navisi tai poli wa, ana pisa ga pa Narina naga taaga, sape
“Ototano e lepasneu na p̃amarua, otom̃a sanene, vano-o yoko neligan kiom̃a nasinekar lala aim ave takue na vilanvanen lam̃a ea.” Yauena 110:1
14 Nane visena maro e lepas nene narui, nap̃a pisayu sanape nap̃a navisi kiena ne Ntewa lala la na amiyum̃ae kiena ga, la ape ninuna na waren kiena visena, a ape naiila itaena vena tetol natamaliaena, ana yaru tai sike ga wa naga mon metavan la make ga, nane Narina Wa ne nane Yesu, nap̃a Ntewa pis maro pan ita ea.