3
Nasumonena na sum̃are lala
1 Visae yar tai, nap̃a sitomena tai teke e naga sinenan sape war kia nap̃a nasumonena, nanene na po pap̃isi ne, komin pe lelaga kemua, naga pe yum̃aena wo tai nap̃a naga sape yum̃aenia. Ana kieta nasumonena lala, yoko nevisawal van la sane lala monar ave yar la ne sanape.
2 Sur na sumo, nasumonena naga monar ve sur viowa tai to re e kiena malena.
Naga monar were sira ve taaga a ve lelaga wo van silaga.
Naga monar kawe ruru kiena p̃elaga lala,
monar ve manmarua,
yeririna la monar avatanonia,
monar kekaran na visuaren yeririna la e m̃ana um̃a,
a monar kilia ruru p̃elaga nakilapianena.
3 Amio sur la nene, naga monar ve ve yaru namun maneneen re wii va ve torog,
naga ve suru re,
kiena sitomena monar viavi
sinena monar malum ga.
Naga monar ve vilup re,
a ve sinenan manene re kilavaru.
4 Tai m̃ena ga sanini, monar ve sup̃en ruru m̃ana um̃a, nap̃a narina la vatanon ruru naga e sur la punu ga,
5 vanon sane visae yar ta ne sanene ve sumon ruru re m̃ana um̃a, ve sanape na kilia visuar ruru sum̃are kiena ne Ntewa?
6 Yar nene monar marua li m̃aga, sane mla Yesu e kiena malena yam piavi li m̃aga, visae pere na yoko p̃arina kilia imi ulen vilaveena, p̃isi na kila naga kila pal mrapa lor vito e p̃ilip̃ili m̃a nena nap̃a Yermare mlor pito e nanua sumo.
7 Na sumonena na sum̃are lala monar ave yar la nap̃a yeririna punu ga, vito tol la nap̃a pe amlelaga re poli, avisave lala ape yar mesmesu wo, vanon Yermare kilayon ke pap̃isi nap̃a kila kotalia la, sinenan sape kila vena yar la asitom asape sur tai piowa teke e la.
8 Na nene na sumonena lala, ana nagane neva e lepas kiena ne yaru na visuaren yum̃aena lala. Yar nap̃a p̃uarar yum̃aena na visuaren yum̃aena,
kiena sitomena monar su ga tano,
naga ve yar nap̃a visa visena la ve lelaga ga, a naga tap̃atete purmenena ve lua.
Naga ve mun re kuruta silaga,
monar ve sinenan manene re sur lala,
9 ana monar uarar ruru ga p̃elaga na lelagaena e kiena malena, taulu nap̃a yaru tap̃ena la atolia.
10 Yar nap̃a na uararen yum̃aena na visuaren sum̃are, monar avisusu ruru naga, akilali kone naga sumo wa, a visae yum̃ae wo, kiena p̃elaga mesmesun yum̃aena nene, akilia ala kiena kia, siar yum̃aena narui.
11 Wona yaru na visuaren yum̃aena, naga m̃ena kiena sitomena la monar varuruia, ve visamumun re yar tap̃ena lala, monar ve sira tai nap̃a kilia warar ruru kiena p̃elaga lala, a monar kila yum̃aena punu ga wo.
12 Yaru na visuaren yum̃aena la monar aure sira ve taaga ga,
monar ave yar la nap̃a akilia asumon ruru narila lala, akilia avisuar ruru m̃ala um̃a.
13 Yaru na visuaren yum̃aena la nap̃a yepela m̃aen ruru kiela yum̃aena, p̃isi na avisu sane yeririna la akekaran la vap̃isi, ana aloge nap̃a Kristo Yesu miila la ke vena ve amaraun re na sum̃alen m̃arera e kiela yum̃aena nena.
Pupia visawanena na kieta lelagaena
14 Timote, nesape neim̃asu nevisu ko ve ve viavi re navisaen visena la nene van ko, ana nepisu sane peraga, monar nesiriwal ko ne ga van ko sumo wa.
15 Pona sur la p̃as auarar inu e nini yo na wa, ana sineun nesape monar otol navianena la nene vilaga, vena okilia ruru p̃elaga la nap̃a mesmesu vena akila e mratava wa m̃ana Sup̃e. Namratava wa nene, na ne pe sum̃are kiena ne Ntewa mali, nap̃a monar tarar kiena visena na lelaga silaga, sane p̃eren yum̃a p̃uarar kana kemrap̃e lala.
16 Lelaga, p̃elaga na kieta lotuena sum̃al sike e nalelagaena tai nap̃a sane pe visawanena tai, nap̃a pito ruru tano, urmi ruru po. Tepisawal ke kieta nalelagaena nene sanene, tesape
Yesu, naga pe Ntewa nap̃a paeme e yomarava nini e tas nen yeririna,
m̃areraena kiena Ninuna miyum̃ae manene ea, a navisi la asike amio naga,
amlologon naga pa tol yolai tap̃ena lala, kila sane amlelaga e naga telivi e yomarava,
siraunia Ntewa pure naga pa si metava e kiena pupia naurarena ma e peni.