M̃aki Nalua Nap̃a Pol
Siria Pa Pan
TIMOTE
Visayuena Na Tusi Nene
Suniena plas na tusi nini
M̃aki na lua nene nap̃a Pol siri pan Timote, ana pulen visena wo lala na iilaen Timote nap̃a kiena erau viu nap̃a sum̃a miila naga. Sitomena keviu nap̃a sike e m̃aki nini, Pol pisa pan Timote sape sum̃alu m̃arera vena visawal lologena wo kiena Yesu Kristo. A pisa pania sape naga monar uarar vianiena lelaga na lologena wo, a na Tusi Marua. Naga pisa pan Timote sape monar kila luwe ga yum̃aena na vianen yaru lala, a vena kila yum̃aena na wereen yaru lala, pe suri korenaga visae yaru la avisakare naga pona avisakare yum̃aena na sum̃are nap̃a naga sum̃a kila ke ne.
Pol pisa pan Timote vena ve va sikol re naga e visena wowe lala a visena na veveyuena nap̃a tap̃atete kila suri wo tai, ana vena kila kareen ga yaru lala.
E m̃aki m̃enaga nini Pol pisa pan Timote sape taveve p̃alaga wo la sa nap̃a naga kila ke ne e kiena maliena. Nanene p̃elaga kiena Pol sa nap̃a mlelaga m̃arera, a kiena sitomiena piyavi, a sinen si yaru lala, a kiena p̃elaga nap̃a pa p̃arpoyo e pogos m̃arera lala nap̃a yaru la akila miloge piowa e tasnena, ana naga pe paruru re poli, sum̃a pisawal luwen ga lologena wo kiena Yesu Kristo.
Komp̃asnen tusi la na nini
Visena p̃esa 1:1-2
Pol mieluar Ntewa vanon Timote ana pian Timote 1:3—2:13
Pol mila visena na iilaen maliena kiena Timote 2:14—4:5
Pol pisayu naga amio kiena yum̃aena 4:6-18
Visena maro kiena Pol 4:19-22
1
Visena p̃esia
1 Naruu Timote, in Pol nap̃a nesiri m̃ak nini pim̃asu pan ko, nap̃a nasinenanena kiena ne Ntewa ga naga pisirlua inu nepim nepe nalogena kiena Kristo Yesu. Kristo Yesu naga pe purp̃es nen malena nap̃a Ntewa pisaar pan la nap̃a amlelaga pania.
2 Timote, kiau leniena nesape yoko Ntewa Arimata a kieta Sup̃e Yesu Kristo, lalua aligan pupia lemamiena, sineyeena, a sum̃arena su lue ga pun ko.
Visena na potena pa Ntewa
3 Sa nap̃a kau apua lala ataveve nanua rui pimi, in na nom̃areran lue ga kilaen yum̃aena kiena ne Ntewa, a in na nesum̃a nop̃ikeyon nap̃a nelotun naga amio losineu wetelu. Ana legiena a lemalo, e pogos na leniena lala, nesitom̃al ko m̃aga, nesum̃a nepisa lue ga potena pap̃isi pania vanon ko.
4 Nesum̃a nesitom̃al ke wamaram̃a lala nalogeen viowa, ana kila narui sineun manene pap̃isi nap̃a neim̃asu nem̃alivin ko sina. Visae nevisu sina ga maram̃a, yoko neloge wo na neloge wo!
5 Nesum̃a nesitom̃al m̃ena ga kiom̃a naviawaena lelaga, nap̃a nanua se kom̃a apua nap̃a sira marua Lois, siraunia se kom̃a m̃am̃a nap̃a Yunis, a sa nap̃a nepisu kilale rui, nagane sike e ko.
6 Naga ke narui nesum̃a nesitom̃al m̃ena ga nalaena nap̃a Ntewa mla pan ko, pogos nap̃a nopu p̃arum̃a nemlotuwo ko. Sineun nesape nevisa van ko sanini, ve otam̃an re kapi na nalaena nene vito tano, ana monar osum̃a okila lue ga vivaga ruru silaga.
7 Monar ositom̃al Ninuna nap̃a Ntewa mla pan ita, naga pe ninuna re nap̃a na maraunen yaru poli, ana naga pe Ninuna na m̃areraena, pe Ninuna na sitomena, a pe Ninuna nap̃a kila yaru kawe ruru kiena malena.
8 Visae lelaga kemua nap̃a Ninuna ke nanene narui sike e kiom̃a malena, monar ve omawan re visawalen lologena wo kiena Sup̃e va yar lala, pona monar ve omawan re nap̃a ovisawal va yaru lala ovisave lelaga sane ko na ope kiau erau wo tai. A amliganin nesike e yum̃a naloge viowaena vanon kiena yum̃aena, ana pe pon re omawan inu vanon sur nene poli. Kiom̃a suria nap̃a yoko okila, monar okekaran ove p̃egas omio inu e naloge viowaena vanon Lologena Wo, vano tol nap̃a m̃areraena kiena ne Ntewa kila ko otorokin oyum̃aenia.
9 Ntewa ke narui, nap̃a naga tamalia ga ita luwoka rui, a pio ita ga luwoka teyaloro e mrapa na kiena malena wa, ana silaga kilia iila ita. Nanene pe vanon re ga nap̃a italua tekila kiena yum̃aena wo poli, pona italua tekila ya, ana naga kila ga molue kome kiena sitomena amio kiena lemamiena wo pan ita. Kiena lemamiena nena, naga kila ruruia, mligan ruruia sike amio Kristo Yesu nanua sumo rui, sumon nap̃a siar kieta pogos ita yeririna lala na yomarava.
10 Ana lemamiena nene sum̃a sanene pano-o tol nagane towe ga, nap̃a m̃alivi mare ga e yomarava nap̃a kate e marata kome kieta natamaliaena Kristo Yesu. Naga pitomi e yomarava, kila make nam̃areraena na marena pimi pe sur korena ga tai, a kiena nalologena wo kila nap̃a nagane tesike e yomarava nini wa, tekilia telual malena wo. Ana naga kila m̃ena nap̃a siraunia, yoko tekilia teva loyum̃a e malena nap̃a tap̃atete p̃isi pogos tai.
11 Lologena wo nena, naga ke narui nap̃a Ntewa pisirlua inunia nepe kana navisawalena nena, nepe kana nalologonena nena, nepe kana navianena m̃ena ga.
12 Kiau yum̃aena nena nane kila nepane ke pogos m̃arera lala loyum̃a e yum̃a naloge viowaena nini vanonia, ana pogaga nap̃a, pe pe sur re tai pan inu poli. Pe nemawa re poli, komin nekilia nesape yar nap̃a nemlelaga ea, naga pe lelaga, kiau nalelagaena ea m̃arera ruru po pap̃isi sane ya nap̃a nemligan e limana, yoko uarar ruru m̃arera sum̃a ga vano-o tol Legiena maro.
13 Sanini Timote, nesape nevisa van ko sanini, monar otaveve ruru mrapa na visena mesmesu lala nap̃a nemla pan ko, monar osum̃alu m̃arera e Yesu Kristo silaga, a monar oligan ruru kiena sinesiena sum̃a ule e kiom̃a malena.
14 Ninuna Wa sum̃a kokonia ruru losineta, ana ve oligan re navisa ruruena la nap̃a naga mligan ruru sike e kiom̃a malena rui, ana oloun ruruia.
Pol pisayu Onesiporas
15 Nekilia nesape omloge lologena viowa tai rui, nap̃a asape li na lelagaena lala nae pupia lepas nap̃a Esia, apilon m̃asila pan inu rui, a la nene amio m̃ena kieta erau lua nap̃a Paekelus amio Emosenisi.
16 Ana kieta wolai wo nap̃a Onesiporas, naga kila po pap̃isi. Pe sur korena ga nap̃a apiar inu e sen lala loyum̃a e yum̃a naloge viowaena nini, ana naga pe mawan re nap̃a imi katen inu poli, ana nemlen pa Sup̃e vena visa ruru naga ve keviu amio kiena namratava lala.
17 Naga pimi m̃aliv Rom nini, pe yam piavi re nenaga naga p̃iyon nap̃a sape lual inu, pano-o pimi tol inu e yo nene.
18 Naga sum̃a kila manene ke sina ga suri wo la pap̃isi pan inu e Rom nini, sa ke ga nap̃a miila ruru inu sumo rui pogos nap̃a nesike gar Episas nanua ne, sa nap̃a kam na akilia ruru rui. Naga po pan inu sanene, nemlelaga nesape yoko Ntewa sinen ye ruru nena naga e legiena maro.