7
1 “Is kebpekesavuk te etew kayi te kelibutan ne utew melised; iring kelised te andew-andew he terebahu te sevaha te terebahanti,
2 etawa iring te uripen he ngenaan din he mebmahapun en su wey mekehimeley en, wey iring te terebahanti he ebperateng te suwildu zin.
3 Ne iring keniyan is kediey he kebpekesavuk. Nepipire en he vulan is kebpekaantus ku te wazè ku zuen egkepupulus. Minsan mezukilem ne egkerasey a.
4 Emun edhizeǥà a ke mezukilem egkeisip ku is sengemenu pa vuwa is keluǥayad ne human egkepawà. Utew menaney is kedhipanew te menge uras. Ne ebpekevelvelehey a taman te egkeriwaswas.
5 Utew grabi is tagkey wey keǥang diyà te lawa ku. Midtezak is menge levag ku ne midturavid is nanà.”
Nengumew-umew si Job te Megbevayà
6 “Nenlavey is menge andew kayi te ked-ubpè ku he wazè ku egkeperateng. Nenlavey heini he edhuna pa he meǥaan te meǥaan he edwaleng he himan te mengengavel.
7 He Megbevayà, tentenuzi nu he iring dà te keramag is untung ku, ne kenè ad maan ebpekesaǥad te kelipey.
8 Egkaahà a ǥuntaan kenikew piru kenà heini ebpedayun. Emun ebpen-ahaan a kenikew ne kenà ad kenikew egkaahà.
9 Su iring a te egkahanew he kivel he kenè en egkaahà, is minatey en ne kenè en edlikù.
10 Kenè en sikandin ebpekeulì diyà te valey zin, ne egkelipatan en te nekekilala kandin.
11 “Umbe kenà egkehimu ke ebpereremek e zà; mezaat utew is kegezamgezam ku. Egkeǥiyen ku is kezaat te kegeǥehinawa ku.
12 He Megbevayà, maan is mibenteyanan a kenikew? Dragun e ve ziyà te zaǥat?
13 Emun edhizeǥà a pezem su wey a mekehimeley su para malù meterini is mesakit he egkeǥezam ku,
14 ebpelihendeken a kenikew pinaaǥi te menge teǥeinep.
15 Umbe, meupiya pa ke ebpekelen a wey a mebpatey kenà te uuyag a he iyan heini kedlelawa ku.
16 Egkeepesan ku heini is kebpekesavuk ku. Ne kenè ku egkesuatan he meuyag-uyag e pa. Bey-ani ad su wazè en pulus kayi te untung ku.
17 “Hengkey ves is etew he igkeipeng nu wey utew nu edsiǥipaa?
18 Su andew-andew is kedsusiya nu kandin, ne layun nu egezami.
19 Bey-ani ad kenikew minsan meǥaan dà.
20 Nekesalè e ve? Hengkey man he salà is neveelan ku ziyà te kenikew te perevantey te etew? Maan is edsuǥaten a kenikew? Iring e ve te meveǥat he bevaan nu?
21 Emun nekesalà a, ne maan is kenà a kenikew ebpeseyluwen? Kenè en egkeuǥet ne ebpatey ad, ne minsan ebpen-ahaan a kenikew, ne kenà ad kenikew egkaahà.”