15
Is Kebelesi ni Samson te menge Filistihanen
1 Dutun te kedlavey te menge timpu, hein neuma en is tiraǥun, mibpenumbelayan ni Samson is esawa zin he zuen din uwiten he nati he kambing. Migkeǥiyan din is enuǥang din he maama te, “Egkesuat a he edseled diyà te ruǥu te esawa ku.” Piru kenà sikandin ibpeseled te enuǥang din he maama.
2 Migkaǥi is enuǥang din he maama te, “Kunaan ku ke egkeepesan nu en sikandin, umbe impeesawa ku en sikandin duen te avey nu. Guntaan emun egkesuat ka, heeyan ded is hazi zin he edhuna pa he mezagwey kandin. Iyan nu esewaa.”
3 Migkaǥi si Samson te, “Tenged kayi te mibeelan niw kenà a keniyu egkevasul ke hengkey is ebeelan ku ziyà te keniyu te menge Filistihanen.”
4 Ne migenat si Samson ne mid-apul sikandin te 300 he menge leew he asu. Ne impedtevezè din is menge ikug te kada zezuwa zutun ne mibpemikitan din haazà te menge sulù.
5 Mibpenemteman din haazà ne impaawè din haazà is menge leew he asu ziyà te menge trigu te menge Filistihanen. Nevinsulan is langun he trigu, kenà iyan dà is neeǥani en, kekenà, ragkes en is wazè pa meeǥani. Nevinsulan daan is menge pemuleey te paras wey menge ulibu.
6 Mid-insà is menge Filistihanen ke hentei is mibaal zutun, ne netuenan dan he iyan si Samson. Ne netuenan dan daan he iyan imbeeli zutun ni Samson su geina te impeesawa te enuǥang ni Samson he tig-Timnah is esawa ni Samson duen te avey ni Samson. Umbe mibpen-ehè dan sikan is bahi wey is amey zin ne mibinsulan dan.
7 Migkeǥiyan ni Samson is menge Filistihanen te, “Tenged kayi te mibeelan niw, ne kenà a ed-engked he ebpenhimatey taman te ebpekevales a keniyu.”
8 Midsurung din sikandan ne utew mahabet is nepatey zin. Ne liwas dutun mibpelaǥuy sikandin ne mid-eles diyà te surung diyà te pangpang he ziyà te Etam.
9 Dutun he timpu migkampu is menge Filistihanen diyà te Juda, ne midsurung dan is inged he Lehi he sakup te Juda.
10 Umbe, mid-insaan sikandan te menge tig-Juda te, “Maan is edsurungen key keniyu?” Ne midtavak dan te, “Wey zey mezekepi si Samson su ebelesan dey tenged te mibeelan din diyà te kenami.”
11 Umbe is 3,000 he menge maama ziyà te Juda midhendiyà te surung diyà te pangpang he ziyà te Etam, ne migkeǥiyan dan si Samson te, “Wazè nu ve metueni he sakup kiw te menge Filistihanen? Ne ǥuntaan neuwit-uwit key te mibeelan nu.” Midtavak si Samson te, “Mibales e zà te mibeelan dan kediey.”
12 Migkaǥi zan te, “Midhendini key te kedakep kenikew, su wey zey sikew ikeveǥey ziyà te menge Filistihanen.” Midtavak si Samson te, “Ebpezakep a keniyu basta ebpenangdù kew he kenà a keniyu edhimetayan.”
13 Migkaǥi zan te, “Uya, kenè dey sikew edhimetayan. Ebekusen dey zà sikew ne ibpalad dey sikew ziyà te kandan.” Umbe mibakus dan sikandin te zezuwa he veǥu he menge pisì ne mid-uwit dan diyà te ǥawas duen te surung.
14 Hein nekeuma zan diyà te Lehi, midsinuǥung sikandin te menge Filistihanen he ebpememensag. Midumala si Samson te Mulin-ulin te Nengazen su nengebidtew is imbakus kandin he iring dà te tanur he edtutungen ne nengeulug heini puun te menge velad din.
15 Ne nekaahà si Samson te tulan te bakà te asnu he veǥu pa he minatey. Migkuwa zin haazà ne migamit din te kedhimatey te 1,000 he menge Filistihanen.
16 Migkaǥi si Samson te,
“Pinaaǥi te tulan te vakà te asnu,
nepatey ku is 1,000 he menge etew.
Pinaaǥi te tulan te vakà te asnu,
ingketambù ku heini he menge etew.”
17 Ne hein nekepasad sikandin he egkaǥi, intimbag din sikan is tulan te vakà te asnu. Ne haazà he lugar migngezanan te Ramat Lehi.
18 Utew nemezahi si Samson. Umbe nengumew-umew sikandin te Nengazen. Ke sikandin te, “Midhimu nu he mekezaag a, piru ǥuntaan henduen be te ebpatey ad te kegkemezahi ku ne ebihaǥen a te menge Filistihanen he wazà mekekilala kenikew.”
19 Umbe, impetudà te Megbevayà is wahig he ebpuun te nevudsiyan he tanà diyà te Lehi. Mid-inum dutun si Samson ne midlikù is desen din. Heini he serebseb migngezanan te En Hakore. Ne taman en guntaan kemulu heini ziyà te Lehi.
20 Mibpenguluwan ni Samson is menge Israilihanen seled te 20 he tuig. Dutun he timpu kemulu pa sikandan sakup te menge Filistihanen.