17
Is menge Ed-ezapen ni Micas
1 Duen sevaha he etew he meǥinged diyà te vuvungan te Efraim he iyan ngazan din si Micas.
2-3 Sevaha he andew zutun, migkaǥi si Micas diyà te iney zin te, “Hein netazin is 1,100 he menge pelata nu, nezineg ku he midrewakan nu is migkuwa. Heini zed kes pelata. Iyan a midkuwa.” Migkaǥi is iney zin te, “Mama, berakat he tuvazi ka te Nengazen. Ne kenà med-uteng diyà te kenikew sikan is rawak.” In-ulì ni Micas haazà is 1,100 he menge pelata ziyà te iney zin. Migkaǥi is iney zin te, “Idhalad ku heini ziyà te Nengazen para te keupiyaanan nu te anak ku. Egemiten ku heini he apid te ledawan he kayu he ebpeveelan ku. Uya, idhalad ku heini su wey ka melibri te rawak.”
4 Ne migkuwa sikan is iney zin te 200 he pelata ne imbeǥey zin diyà te menenalsal te pelata. Ne migamit haazà he apid te menge ledawan he kayu. Ne hein nepasad en, diyà isavuk heini te valey ni Micas.
5 Duen keugelingen ni Micas he simbahan he para te menge ed-ezapen. Ne mibaal sikandin te ipud wey menge ledawan. Midhimu zin he memumuhat is sevaha te menge anak din he maama.
6 Dutun he timpu, wazà hadì diyà te Israel, umbe ebpegustu en is kada sevaha ke hengkey is egkesuatan din te ebaal.
7 Duen sevaha he vetan-en he maama he tig-Betlehem he sakup te Juda. Sevaha sikandin he Levihanen he midteǥaad med-ubpà duma te tribu ni Juda.
8 Ne sevaha he andew, midhipanew sikandin is ebpen-ahà te egkeubpaan din diyà te zuma he lugar. Dutun te kedhipanew zin, nekeuma sikandin diyà te valey ni Micas he ziyà te vuvungan te Efraim.
9 Mid-insaan sikandin ni Micas te, “Hendei ka ebpuun?” Midtavak sikandin te, “Tig-Betlehem a he sakup te Juda. Ne sevaha a te menge Levihanen. Ebpen-ahà a te egkeubpaan ku.”
10 Ne migkaǥi si Micas te, “Kayi ke en ubpà te kedì. Edhimuwen ku sikew he sumesambag ku wey memumuhat. Ne kada tuig ebeǥayan ku sikew te sepulù he vuuk he pelata, ne kenè en heeyan ragkes te visti wey keenen he ibeǥey ku kenikew.”
11 Ne mid-uyun haazà is Levihanen dutun te migkaǥi ni Micas ne mid-isip sikandin ni Micas he sevaha te menge anak din.
12 Midhimu sikandin ni Micas he memumuhat, ne ziyè din ipeubpà te valey zin.
13 Migkaǥi si Micas te, “Guntaan, siguradu he edtuvazan a te Nengazen su zuen ku en memumuhat he Levihanen.”