18
Si Micas wey is Tribu ni Dan
1 Dutun he timpu wazà hadì diyà te Israel. Ne zutun daan he timpu, is tribu ni Dan nengahà te lugar he egkeubpaan dan he egkehimu he kandan en he keugelingen. Su ziyà te menge tribu te Israel, iyan is tribu ni Dan wazè pa mekekuwa te tanà he kandan he egkepengevilin.
2 Umbe, mibpilì is menge kevuwazan ni Dan te lelima he memevurut he menge maama ziyà te tribu zan he iyan ebpen-ahà te egkeubpaan dan. Heini is lelima he maama ebpuun diyà te inged he Zora wey Eshtaol.
Ne hein midhipanew zan en is ebpen-ahà te lugar, nekeuma zan diyà te valey ni Micas diyà te vuvungan te Efraim, ne zutun sikandan medlipezeng.
3 Ne hein dutun sikandan, netuusan dan diyà te kegkaǥi zuen te vetan-en he Levihanen he kenè sikandin meǥinged dutun. Umbe mid-insaan dan sikandin te, “Maan is kayi ka? Hentei is miduma kenikew kayi? Hengkey is baal nu kayi?”
4 Midtudtul zin diyà te kandan is mibeelan ni Micas kandin, ne migkaǥi sikandin te, “Iyan terebahu ku kayi is memumuhat a ni Micas, ne edsuhulan e zin.”
5 Ne migkeǥiyan dan sikandin, “Geina te memumuhat ke ves, ne insai nu is Megbevayà ke melempusen be heini is hipanew zey.”
6 Midtavak haazà is memumuhat te, “Kenà mesemuki is isip niw. Eduma keniyu is Nengazen kayi te hipanew niw.”
7 Midlaus medhipanew heini is lelima he maama ne nekeuma sikandan diyà te Laish. Neehè dan he dezeyaan is ked-ubpà te menge etew zutun iring te menge Sidunhanen. Melinew heini he lugar. Ne meupiya is kebpekesavuk dan su wazà midsamuk kandan etawa migezam medsakup kandan. Heini he lugar meziyù te menge Sidunhanen, ne wazè dan mebpekidsevaha te zuma.
8 Ne hein midlikù diyà te Zora wey Eshtaol haazà is lelima he maama, mid-insaan sikandan te menge zuma zan ke hengkey is neehè dan.
9 Migkaǥi zan te, “Nekeehè key te utew meupiya he lugar. Umbe kenè kiw en edlanganlangan. Edsurungen tew is menge meǥinged dutun su wey tew maangken haazà he tanà.
10 Meluag haazà he tanà wey selebpeten, ne zutun is langun he kinahanglan tew. Wey wazè dan isipa he zuen egkaid kandan. Imbeǥey en te Megbevayà kenitew haazà he lugar.”
11 Umbe, migenat puun te Zora wey Eshtaol is 600 he neǥumeenan he menge etew he sakup te tribu ni Dan su ebpekidtebek dan.
12 Migkampu sikandan diyà te avey te Kiriat Jearim he zapit te edsenlepan he sakup te Juda. (Umbe minsan guntaan egngezanan heeyan he lugar te Kampu ni Dan.)
13 Ne puun dutun, mibpedayun sikandan medhipanew taman te nekeuma sikandan diyà te valey ni Micas he ziyà te vuvungan te Efraim.
14 Ne sikan is lelima he maama he neniid diyà te Laish migkaǥi ziyà te menge zuma zan te, “Netuenan niw ve he is sevaha te menge valey kayi ne zuen duen ipud, duen daan ledawan he mid-epizan te pelata, wey zuma pa he menge ed-ezapen? Isip-isip kew ke hengkey is meupiya he ebeelan tew.”
15 Umbe, midhendiyè dan te valey ni Micas ne mibpengemusta zan sikan is betan-en he Levihanen he zutun ed-ubpà.
16-17 Ne hein ebpemenhithitindeg diyà te pultahan dutun te inged sikan is memumuhat wey sikan is 600 he neǥumeenan he menge maama he tribu ni Dan, midseled sikan is lelima he meniniid diyà te valey ni Micas ne migkuwa zan sikan is ipud, menge ledawan he mid-epizan te pelata, wey zuma pa he menge ed-ezapen.
18 Ne hein naahà duen te memumuhat he midselezan duen te lelima he meniniid is baley ni Micas ne mibpenguwa zan haazà he menge azen, mid-insà sikandin te, “Maan is ebpenguwaan niw heeyan?”
19 Midtavak sikandan te, “Kenè ka gusà. Duma ka kenami su edhimuwen dey sikew he memumuhat wey sumesambag. Kenè be meupiya pa ke egkehimu ka he memumuhat te sevaha he tribu te Israel kenà te memumuhat ke zà te senge pemilya?”
20 Ingkesuat dutun te memumuhat haazà is migkaǥi zan kandin, umbe mid-uǥup en sikandin te kebpenguwa zuen te ipud, menge ledawan he mid-epizan te pelata, wey zuma pa he menge ed-ezapen, ne miduma sikandin kandan.
21 Ne zutun te kedhipanew zan, diyà ipelastar te egkehunaan is menge anak dan, sunud is menge uyaǥen dan, wey menge gelemiten dan.
22 Malù dan en meziyù diyà te valey ni Micas hein netuenan ni Micas is neulaula. Umbe midtiǥum din is menge zuma zin he meǥinged ne midal-as dan is menge kevuwazan ni Dan.
23 Egkulehien dan sikandan, ne miberiyung is menge kevuwazan ni Dan ne mid-insà diyà te ki Micas te, “Hengkey ves is nehitavù maan is edel-asen key keniyu?”
24 Midtavak si Micas te, “Maan is ed-insè kew? Migkuwa niw is menge ed-ezapen he impeveelan ku, ragkes en is memumuhat ku, ne wazè en nesamà kayi te kediey.”
25 Ke sikandan te, “Ereg kad, su kela ke mepauk is duma he menge zuma zey ne edhimetayan ke zan ragkes is pemilya nu.”
26 Ne midlaus sikandan medhipanew. Nesavut ni Micas he wazè din egkehimu ke edsukul sikandin, umbe nekepeuulì sikandin.
27 Midhendiyà is menge kevuwazan ni Dan te Laish he uwiten dan sikan is menge ed-ezapen ni Micas wey zuma zan sikan is memumuhat din. Melinew he lugar is Laish, ne midsarig is menge meǥinged dutun he wazà egkevut kandan. Midsurung te menge kevuwazan ni Dan is Laish, mibpenhimetayan dan is menge etew zutun, wey mibinsulan dan haazà is inged.
28 Wazà neketavang te menge tig-Laish su meziyù haazà te Sidon wey wazà sikandan mebpekidsevaha te ziyà te zuma he inged. Is inged he Laish ne ziyà te menge suǥud he uvey te Bet Rehob. Ne mid-uman haazà benguna te menge kevuwazan ni Dan ne mid-ubpè dan dutun.
29 Mid-ilisan dan is ngazan kayi te Dan he iyan ngazan te kepuun dan he sevaha zuen te menge anak ni Jacob.
30 Impehitindeg dan dutun sikan is ed-ezapen ni Micas ne mid-azap dan haazà. Si Jonatan he anak ni Gershom wey apù ni Moises is midhimu zan he memumuhat. Puun dutun, is menge kevuwazan ni Jonatan iyan nenilbi he menge memumuhat te tribu ni Dan taman te timpu te kebihaǥa te menge tig-Israel.
31 Ne zutun te ziyè pa sikan is Tulda te Megbevayà te Shilo, iyan en midtulungan ezapa ziyà te Dan sikan is ed-ezapen ni Micas.