3
Is Nesamà he menge Etew ziyà te Canaan
1 Midsemaan te Nengazen te menge etew is Canaan su egezaman din is menge Israilihanen he wazà mekesaǥad te kebpekidtebek diyà te Canaan.
2 Mibeelan heini te Nengazen su wey mepenurù te kebpekidtebek is menge kevuwazan te menge Israilihanen, he wazà mekesaǥad kayi.
3 Iyan heini menge etew he midsamà te Nengazen: is menge meǥinged diyà te lelima he inged te menge Filistihanen, is langun he Canaanhen, menge Sidunhanen, wey menge Hivihanen he menge meǥinged diyà te menge vuvungan he Lebanon, he puun te Buntud he Baal Hermon taman te Lebo Hamat.
4 Midsamà heini sikandan su egezaman is menge Israilihanen ke edtumanen dan be is menge suǥù te Nengazen he imbeǥey zin diyà te menge kepuun dan pinaaǥi ki Moises.
5 Umbe, mid-ubpà is menge Israilihanen duma te menge Canaanhen, menge Hitihanen, menge Amorihanen, menge Pirisihanen, menge Hivihanen, wey menge Jebusihanen.
6 Midtuǥutan te menge Israilihanen is menge anak dan te kebpemengesawa wey kebpemeesawa kayi he menge etew, ne mid-azap dan is menge ed-ezapen kayi he menge etew.
Si Otniel
7 Mezaat is mibeelan te menge Israilihanen diyà te etuvangan te Nengazen, su midlipatan dan is Nengazen he Megbevayè dan, ne mid-azap dan is menge ledawan ni Baal wey ni Ashera.
8 Tenged kayi nepeukan sikandan te Nengazen, umbe mibey-anan din sikandan he mezaag ni Hadì Cushan Rishataim he hadì te Aram Naharaim. Nesakup din sikandan seled te walu he tuig.
9 Piru hein mibuyù te tavang is menge Israilihanen diyà te Nengazen, mibegayan din sikandan te sevaha he etew he ebpekelibri kandan. Iyan sikandin si Otniel he anak ni Kenaz te hazi ni Caleb.
10 Mid-ulinan sikandin te Mulin-ulin te Nengazen, ne mibpenguluwan din is Israel. Nekidtebek sikandin ki Hadì Cushan Rishataim he hadì te Aram, ne mibpengelinteuwan te Nengazen he mekezaag sikandin.
11 Umbe, duen kelinew ziyà te Israel seled te 40 he tuig. Ne minatey en si Otniel.
Si Ehud
12 Mid-uman en maan mebaal is menge Israilihanen te mezaat diyà te etuvangan te Nengazen. Ne tenged dutun midhimu te Nengazen he mesakup sikandan ni Hadì Eglon he hadì te Moab.
13 Pinaaǥi te tavang te menge Amunihanen wey menge Amalikanhen, midsurung ni Eglon is menge Israilihanen, ne mid-aǥew zin is inged he Jerico.
14 Midsakup ni Eglon is menge Israilihanen seled te 18 he tuig.
15 Piru, hein mibuyù en maan te tavang is menge Israilihanen diyà te Nengazen, ne mibeǥayan din sikandan te sevaha he etew he ebpekelibri kandan. Iyan sikandin kes givang he si Ehud he anak ni Gera he ebpuun diyà te tribu ni Benjamin. Impehendiyà sikandin te menge Israilihanen te Moab su wey zin ikeveǥey is buhis te Israel ziyà te ki Hadì Eglon.
16 Mibaal si Ehud te ubpit he zezuwa is gerangan din he tengà te mitrus is kelayat din ne human megenat. Ne imbagkes din haazà diyà te kewanan he vuvun din, ne netembunan haazà te visti zin.
17 Ne migenat sikandin wey zin ikeveǥey is buhis diyà te ki Hadì Eglon te utew melambù he etew.
18 Ne hein nezawat en ni Eglon haazà is buhis, impeulì ni Ehud is menge zuma zin he mid-uwit duen te vuhis.
19 Hein aney miduma sikandin kandan, iyan, hein nekeuma zan duen te midtiǥivan he menge vatu he uvey te Gilgal, midlikù si Ehud duen te hadì is migkaǥi te, “Mahal he Hadì, duen sikritu he egkeǥiyen ku ziyà te kenikew.” Umbe migkeǥiyan dutun te hadì is menge suluǥuen din te, “Ewai key zep-a keniyu.” Ne mid-awà dutun is langun he suluǥuen din.
20 Ne mid-uvey si Ehud duen te hadì he ebpimpinuu ziyà te meǥenew he ruǥu zin he ziyà te zivavew. Migkaǥi si Ehud te, “Duen egkeǥiyen ku kenikew he ibpekaǥi te Megbevayà.” Ne hein midhitindeg haazà is hadì,
21 midhulavut ni Ehud te ǥivang he velad din sikan is ubpit he ziyà te kewanan he vuvun din, ne midsundang din diyà te getek haazà is hadì.
22 Ne nelenep haazà is ubpit ragkes is suveng ne netembunan te tavà. Ne wazà heini vezuta ni Ehud.
23 Ne migawas si Ehud dutun te ruǥu ne migkendeduwan din is gemawan dutun.
24 Ne hein nekeǥenat en si Ehud, midlikù sikan is menge suluǥuen duen te hadì, ne neehè dan he siradu sikan is gemawan. Kunaan dan ke ziyè dà te indesà dutun te seled sikan is hadì.
25 Umbe, wazè dan en puwasi sikan is gemawan ne midtaǥad dà sikandan diyà te gawas. Ne hein kenè en ebpuwasan duen te hadì sikan is gemawan ne neipeng en sikandan. Umbe migkuwa zan te yawi ne mibpuwasan dan haazà, ne neehè dan sikan is hadì dan he nekesesavuk diyà te saag he minatey en.
26 Dutun te timpu te kedtaǥad duen te menge suluǥuen te kebpuwas duen te hadì, nekepekeziyù en si Ehud. Midsaǥad sikandin duen te midtiǥivan he menge vatu ne midlaus pehendiyà te Seira.
27 Kebpekeuma zin, mibpezaǥing sikandin te vudyung diyà te vuvungan te Efraim su ed-umawen din is menge Israilihanen su ebpekidtebek dan. Ne midtupang puun dutun te vuvungan is menge Israilihanen he ebpenguluwan ni Ehud.
28 Migkeǥiyan din sikandan te, “Sunud kew kediey su ebpengelinteuwan te Nengazen he mezaag niw is menge Moabitanhen he menge kuntada niw.” Umbe midsunud sikandan kandin ne mid-aǥew zan is lugar he repasan te menge Moabitanhen diyà te Wahig he Jordan. Ne wazà minsan sevaha he etew he impelayun dan dutun.
29 Dutun he andew nekepatey sikandan te menge 10,000 he menge Moabitanhen he pudu memezesen wey memevurut. Ne wazà minsan sevaha he nekepelaǥuy kandan.
30 Umbe, zutun he andew mid-aǥew te menge Israilihanen is Moab, ne puun dutun melinew is ked-ubpè dan seled te 80 he tuig.
Si Shamgar
31 Is nekesunud ki Ehud he pengulu iyan si Shamgar he anak ni Anat. Midlibri zin is Israel puun te menge Filistihanen. Menge 600 he menge Filistihanen is mibpenhimetayan din pinaaǥi te tuked he gelemiten te kedsegseg te vaka.