9
Si Abimelec
1 Ne sevaha he andew, midhendiyà si Abimelec he anak ni Gideon te menge kezuzumahi te iney zin diyà te Shekem ne migkeǥiyan din sikandan te,
2 “Insai niw is langun he tig-Shekem ke hengkey is egkesuatan dan: egkesuat dan be ke ebpenguluwan sikandan duen te 70 he menge anak ni Gideon etawa iyan e zà is sevaha he anak ni Gideon is ebpengulu kandan? Tentenuzi niw he kezuzumahi a keniyu.”
3 Umbe, mibpekidlalag is menge kezumahan ni Abimelec te menge tig-Shekem. Ne nekeuyun sikandan he si Abimelec is ebpengulu kandan, su ǥeina te kezuzumahi zan sikandin.
4 Mibeǥayan dan si Abimelec te 70 he vuuk he pelata he ebpuun diyà te simbahan he zutun ed-ezapa si Baal Berit, ne migamit din haazà he selapì te kedsuhul te menge buguy para medsunud dan kandin.
5 Ne midhendiyà si Abimelec te valey te amey zin diyà te Ofra. Ne ziyà te zivavew te sevaha he vatu, mibpenhimetayan din sikan is 70 he menge suled din diyà te amey zin he si Gideon. Piru is tinengkezan he si Jotam wazà mulà mepatey su mid-eles sikandin.
6 Midhendiyà is menge tig-Shekem wey is menge tig-Bet Milo te lugar he zuen duen kayu he ulayan he ziyà te Shekem ne zutun dan himuwa si Abimelec he hadì.
7 Ne hein nezineg haazà ni Jotam, midtekezeg sikandin diyà te puntur te Buntud he Gerizim ne imbensag din diyà te kandan is menge lalag he edhenduen te, “Menge tig-Shekem, pemineg kew kedì emun egkesuat kew he ebpemineg keniyu is Megbevayà.
8 Edtetezeman ku sikiyu vahin te menge kayu he ebpen-ahà te edhadì kandan. Migkeǥiyan dan is kayu he ulibu te, ‘Iyan ka hadì kenami.’
9 Ne midtavak haazà is ulibu te, ‘Kenà egkehimu su lavew he meupiya is kebeǥey ku te lana he ǥelemiten te kebeǥey te zengeg te menge ed-ezapan wey te menge etew, kenà te kedhedii ku keniyu.’
10 “Ne iyan en maan migkeǥiyan dan is kayu he higus te, ‘Iyan ka hadì kenami.’
11 Midtavak haazà is higus te, ‘Kenà egkehimu su lavew he meupiya is kebeǥey ku te metaam he veǥas, kenà te kedhedii ku keniyu.’
12 “Ne iyan en maan migkeǥiyan dan is paras te, ‘Iyan ka hadì kenami.’
13 Ne midtavak haazà is paras te, ‘Kenà egkehimu su lavew he meupiya is kebeǥey ku te vinu he ebpekelipey te menge ed-ezapen wey menge etew.’
14 “Umbe iyan en migkeǥiyan dan te langun is duǥiyen he zeisey he kayu te, ‘Iyan ke en hadì kenami.’
15 Ne midtavak haazà is duǥiyen he deisey he kayu te, ‘Emun egkesuat kew he iyan a edhadì keniyu, kinahanglan he edhelung kew kayi te kedì. Iyan, emun kenè niw heeyan ebeelan, ebpeǥawas a te hapuy he ebpeketutung te menge kayu he sidru ziyà te Lebanon.’ ”
16 Ne migkaǥi si Jotam te, “Metazeng be wey hustu is kedhimuwa niw ki Abimelec he hadì? Meupiya ve is mibeelan niw ziyà te ki Gideon he amey ku wey te pemilya zin? Sungkad be is mid-ulaula niw te mid-ulaula te amey ku?
17 Tentenuzi niw he nekidtebek is amey ku te kedlibri keniyu te kedezaat te menge Midianhen. Impedserakan din is untung din para keniyu.
18 Iyan, guntaan migkuntada niw is pemilya te amey ku. Mibpenhimetayan niw is 70 he menge anak din diyà te zivavew te sevaha zà he vatu. Ne midhimu niw he hadì si Abimelec, he anak te amey ku ziyà te esawa zin he suluǥuen din tenged dà te kezuzumahi niw sikandin.
19 Umbe, emun metazeng wey hustu is ked-isipa niw te mibeelan niw ziyà te amey ku wey te pemilya zin, ne verakat he mekepenunuat keniyu si Abimelec wey mekepenunuat kew kandin.
20 Ne emun kenà, ne verakat he dèdeeti kew ni Abimelec he iring te egkeenen kew te hapuy. Ne sikiyu is menge tig-Shekem wey menge tig-Bet Milo, ne edèdeetan niw zaan si Abimelec he iring te egkeenen sikandin te hapuy.”
21 Ne hein nekaǥi en haazà ni Jotam, mibpelaǥuy sikandin pehendiyà te Beer ne zutun sikandin med-ubpà su nahandek sikandin duen te suled din he si Abimelec.
22 Ne hein midlavey en is tetelu he tuig te kedumala ni Abimelec te menge Israilihanen,
23 midsuǥù is Megbevayà te mulin-ulin he ebeǥey te kesamuk wey mekegkuntada si Abimelec wey is menge etew ziyà te Shekem, ne midsukulan dan si Abimelec.
24 Neulaula heini su ibpevayad si Abimelec wey is menge tig-Shekem he mid-uǥup kandin te kebpenhimatey zuen te 70 he menge anak ni Gideon he menge suled din.
25 Mibpeeyanan te menge tig-Shekem te menge etew si Abimelec diyà te menge vuvungan, ne edtulisen dan is langun he ebayà dutun. Ne netudtulan si Abimelec mehitenged kayi.
26 Dutun he timpu, si Gaal he anak ni Ebed midhendiyà te Shekem duma te menge suled din. Ne midsarig kandan is menge tig-Shekem.
27 Ne hein timpu te kedraǥun te paras, mibaal is menge etew te vinu he migkeres he paras. Midtukud dan te pista ziyà te simbahan he ed-ezapan te menge ed-ezapen dan. Ne zutun te kebpemengaan dan wey ked-iinum dan, edsudien dan si Abimelec.
28 Migkaǥi si Gaal te, “Hengkey kiw he kelasi te menge etew is kayi te Shekem? Maan is mibpesakup kiw ki Abimelec? Hentei man sikandin? Kenè be anak dà sikandan ni Gideon? Ne maan is mibpesakup kiw kandin wey te sineriǥan din he si Zebul. Diyè kew ereg he ebpesakup te kevuwazan te kepuun niw he si Hamor?
29 Emun iyan a keniyu ed-egelenen siguradu igkepaawè ku si Abimelec. Egkeǥiyan ku sikandin he umani zin is menge sundaru zin ne human mebpekidtebek kedì.”
30 Hein nezineg ni Zebul he pengulu te inged haazà is migkaǥi ni Gaal, nepauk sikandin.
31 Umbe, mibpesuǥuan din si Abimelec diyà te Aruma. Ne iyan heini impetudtul zin, “Si Gaal he anak ni Ebed wey is menge suled din midhengkayi te Shekem, ne ed-iniyaten dan is menge etew te kebpekigkuntada kenikew.
32 Umbe, kengkuwan te mezukilem, dumaha nu is menge etew nu, ne eles kew zep-a ziyà te menge pemuleey ziyà te ǥawas kayi te inged.
33 Ne keeselem te kedsilà te andew, tik-ew kew surung kayi te inged. Ne emun ebpekidtebek keniyu ensi Gaal, ne veeli nu ziyà te kandan ke hengkey is egkesuatan nu.”
34 Kegkezukilem dutun, migenat si Abimelec wey is menge etew zin. Midheepat dan he vahin is grupu zan ne nemen-ayan sikandan diyà te ǥawas te Shekem.
35 Ne hein nekeehè dan he midlawang si Gaal ne ziyà medhithitindeg te pultahan dutun te inged, migawas si Abimelec wey is menge etew zin diyà te mid-elesan dan su edsurung dan en.
36 Ne hein naahà sikandan ni Gaal, migkeǥiyan din si Zebul te, “Ahaa nu man! Duen menge etew he ebpemenupang puun te puntur te menge vuvungan.” Midtavak si Zebul te, “Alung dà heeyan te menge vuntud. Henduen dà te menge etew is ked-ahaa nu zuen.”
37 Migkaǥi si Gaal te, “Kela man ahaa nu! Duen menge etew he ebpuun diyà te mid-elangan keniyan te zezuwa he vuvungan, ne zuen pa ziyà te zalan he uvey te ulayan te menge meneglagnà!”
38 Ne midtavak si Zebul te, “Hendei en be sikan is hambug nu? Kenè be migkaǥi ka te, ‘Hentei man si Abimelec is ebpesakup kiw kandin?’ Ne ǥuntaan nekeume en sikan is ed-un-undahan nu! Maan is kenè ka ebpekidtebek kandan?”
39 Umbe, mibpenguluwan ni Gaal is menge tig-Shekem ne mibpekidtebek dan engki Abimelec.
40 Midal-as sikandin ni Abimelec, piru mibpelaǥuy sikandin. Mezakel is nemematey te tebek; nemekesesavuk is menge lawa zan diyà te pultahan dutun te inged.
41 Midlikù med-ubpà si Abimelec diyà te Aruma. Ne midsegseg ni Zebul si Gaal wey is menge suled din puun te Shekem.
42 Kegkemeselem, neisip te menge tig-Shekem he edhendiyè dan te vevesukà ne netudtul haazà diyà te ki Abimelec.
43 Umbe, mibahin din te tetelu he grupu is menge etew zin. Ne midhendiyà sikandan te menge vevesukà ne zutun dan med-ayan su ebpekidtebek dan. Ne hein neehè dan he nenggawas en puun dutun te inged is menge tig-Shekem, mibpuun en sikandan med-etaki.
44 Is grupu he mibpenguluwan ni Abimelec migaan-gaan medhendiyà te pultahan te inged te ked-aǥew zuen, dutun te ebpenhimetayan en duen te zezuwa he grupu is menge tig-Shekem he ziyà te menge vevesukà.
45 Sengaandew is kebpekidtebek eni Abimelec. Ne nesakup dan haazà is inged, ne mibpenhimetayan dan is menge meǥinged dutun. Ne hein nepasad midèdeetan dan haazà is inged ne midsewezan dan te timus.
46 Ne hein netudtulan is ebpemen-ubpà diyà te Turi te Shekem, mid-eles sikandan diyà te elesà he zizalem te lugar he ed-ezapan ki El Berit.
47 Ne hein netuenan haazà ni Abimelec,
48 miduma zin is menge etew zin pehendiyà te Buntud he Zalmon. Ne hein dutun dan en, migkuwa si Abimelec te wasey ne nenamped sikandin te subpang te kayu ne midtiang din haazà. Ne migkeǥiyan din is menge etew zin te, “Gaanggaan kew ne veeli niw is mibeelan ku.”
49 Umbe, is kada sevaha kandan midtiang te kayu is edtinundug ki Abimelec. Ne inrapug dan haazà duen te zivavew te melig-en he vahin duen te simbahan he ed-ezapan ki El Berit, ne mibinsulan dan. Umbe neǥerà is menge etew he zutun ed-ubpà te Turi te Shekem. Menge 1,000 sikandan langun ragkes is menge vahi.
50 Ne kegkepasad dutun ne iyan en maan mibeyaan eni Abimelec is Tebez, ne midliǥuyan dan heini, ne midsakup dan.
51 Piru zuen melig-en he turi he zutun mebpelaǥuy is menge tig-Tebez. Midsireduwan dan haazà ne nemenahik sikandan diyà te atep dutun te turi.
52 Midsurung eni Abimelec haazà is turi. Ne hein ebinsulan en ni Abimelec haazà,
53 mid-uluǥan sikandin te vahi te ǥelingan he vatu, ne mibeka is tulan te ulu zin.
54 Migègaanan din umawa is tig-uwit te ǥumaan din, ne migkeǥiyan din te, “Hulevuta nu is ispada nu ne himetayi a su para kenà sikandan mekekaǥi te vahi zà is nekepatey kediey.” Umbe midsundang sikandin dutun te suluǥuen din ne minatey sikandin.
55 Ne hein naahà te menge Israilihanen he minatey en si Abimelec, nemen-ulì sikandan.
56 Pinaaǥi kayi te neulaula, impevayad te Megbevayà si Abimelec te mezaat he mibeelan din diyà te amey zin he iyan is kebpenhimetayi zin duen te 70 he menge suled din.
57 Impevayad daan te Megbevayà is menge tig-Shekem te langun he mezaat he mid-ulaula zan. Pinaaǥi kayi netuman is rawak ni Jotam te anak ni Gideon.