14
Nekidsukulà is menge Israilihanen
1 Dutun mismu he kezukileman nemenineǥew is menge Israilihanen.
2 Mibegulbul sikandan diyà te ki Moises wey ki Aaron. Ke sikandan te, “Deyzey pa ke nemematey kiw en diyà te Ehipto etawa kayi te sibsivayan.
3 Maan is ed-uwiten kiw pa te Nengazen dutun he tanà? Para zè be mebpematey kiw te tebek wey ebihaǥen is menge esawa tew wey menge anak tew? Deyzey pa vuwa ke edlikù kiw ziyà te Ehipto.”
4 Ne mibpelelelaǥè dan he ke sikandan te, “Deyzey pa ke ebpilì kiw te ebpekepengulu kenitew ne edlikù kiw ziyà te Ehipto.”
5 Ne si Moises wey si Aaron midluhud diyà te etuvangan te tivuuk he keet-etawan te Israel he netiǥum dutun.
6 Ne si Josue he anak ni Nun wey si Caleb he anak ni Jefune, mibindas dan is bisti zan tenged te kegkeseeng dan. Heini sikandan is dezuwa, miduma te kebpeniid duen te tanà.
7 Migkeǥiyan dan is menge Israilihanen te, “Utew meupiya sikan is tanà he mibeyaan dey.
8 Emun nekepenunuat kiw te Nengazen, egiyahan kiw zin te kedhendutun te tanà he meupiya wey selebpeten, ne ibeǥey zin kenitew.
9 Kenè niw zà supaka is Nengazen. Ne kenè kew mahandek te menge etew zutun su egkezaag tew sikandan. Wazà edtavang kandan, ne sikitew mulà, edtevangan kiw te Nengazen. Umbe kenè kew mahandek kandan.”
10 Ne zutun, ebpenulengen en pezem sikandan te vatu te menge zuma zan he Israilihanen, piru midtik-ew mebpaahà diyà te zivavew zuen te Tulda he Edtelevukaayan is mekeǥeǥehem he kebpekiduma te Nengazen.
11 Migkaǥi is Nengazen diyà te ki Moises te, “Keenu ves buwa ed-engked heini is menge etew te kedselikwey kedì? Keenu zan buwa ed-engkezi is kenè dan kedtuuwi kedì minsan neehè dan is egkengein-inuwan he mibeelan ku ziyà te kandan?
12 Ibpaaǥi ku ziyà te kandan is kezeetan, ne edezeetan ku sikandan, piru edhimuwen ku mulà sikew he sevaha he nasyun, he edhuna pa kandan he mekeǥeǥehem wey melig-en.”
13 Ne migkeǥiyan ni Moises is Nengazen te, “Hengkey is egkekaǥi te menge Ehiptohanen emun egketudtulan sikandan mehitenged kayi? Kenè be netuenan dan he pinaaǥi te ǥehem nu migkuwa nu is menge Israilihanen puun diyà te kandan?
14 Emun edèdeetan nu heini is menge etew nu, edtudtulen dan heini ziyà te menge meǥinged te Canaan. Ne heini is menge Canaanhen, nezineg dan en daan he iyan ka is Nengazen nekiduma te menge Israilihanen he mibpaahà pinaaǥi te ǥapun he egiya kandan. Edhuna ka kandan emun maandew pinaaǥi te ǥapun he henduen te tukud, ne emun mezukilem pinaaǥi te hapuy he henduen daan te tukud.
15 Ne emun egeraan nu heini he menge etew te kesevaha zà, is menge etew ziyà te menge nasyun he nekezineg te kegkevantug nu egkaǥi te,
16 ‘Wazà mekehimu is Nengazen he ed-uwit te menge Israilihanen diyà te tanà he insaad din kandan, umbe mibpenhimetayan din en sikandan diyà te sibsivayan.’ ”
17 “Umbe, ǥuntaan edhangyù a ziyà te kenikew, Nengazen, berakat he ipeehè nu is gehem nu sumalà te lalag nu he
18 veliǥeǥawen ka wey kenè ka melemu he egkepauk, wey mepineseyluwen ka te menge salà wey kedrapas te etew. Piru edsilutan nu is menge mekesesalà, taman te iketelu wey ikeepat he lapis te kevuwazan.
19 Tenged te zekelà he gaǥew nu, edhangyù a he peseyluwa nu is salà kayi te menge etew iring te kebpeseyluwa nu kandan puun pa te kegawas dan diyà te Ehipto.”
20 Midtavak is Nengazen te, “Ebpeseyluwen ku sikandan sumalà te midhangyù nu.
21 Piru ebpenangdù a, is uuyag he Nengazen, he mintras nekepenù te tivuuk he kelibutan is mekeǥeǥehem he kebpekiduma ku, tutuu zaan he
22-23 wazà minsan sevaha kandan he ebpekeseled diyà te tanà he insaad ku ziyà te menge kepuun dan. Su minsan neehè dan is mekeǥeǥehem he kebpekiduma ku kandan wey egkengein-inuwan he mibeelan ku ziyà te Ehipto wey ziyà te sibsivayan, layun e zan gihapun egezami wey wazè dan mebpezumazuma kedì. Umbe sikan is menge midselikwey kedì, ne kenà ebpekeseled keniyan he tanà.
24 Piru nekeviza mulà kandan is suluǥuen ku he si Caleb su mibpezumazuma mulà kedì te ebpuun diyà te gehinawa zin, umbe ibpeseled ku mulà duen te tanà he mibeeyaan din, ne ebpekeubpà daan is menge kevuwazan din dutun he tanà.
25 Ne ǥuntaan, kenè kew en laus su zuen menge Canaanhen wey menge Amalikanhen he ebpen-ubpà diyà te menge suǥud, kekenà, likù kew en nasì keeselem diyà te sibisivayan he ziyà te zalan pehendiyà te Zaǥat he Meriǥà.”
26 Migkaǥi is Nengazen diyà te ki Moises wey ki Aaron te,
27 “Keenu en buwa ed-engked he edriklamu kuntra kedì heini is lalung he menge etew? Nezineg ku is menge riklamu kayi te menge Israilihanen he menge riklemedur.
28 Umbe, keǥiya niw heini ziyà te kandan: ‘Siak is uuyag he Nengazen, ebpenangdù a he ebeelan ku ziyà te keniyu is migkaǥi niw.
29 Ebpematey kew kayi te sibsivayan. Su mibegulbulan a keniyu, wazà minsan sevaha keniyu he ebpenuiǥen te 20 pehendiyà te metikang,
30 he ebpekeseled duen te tanà he impenangdù ku he ibeǥey keniyu, gawas ki Caleb he anak ni Jefune wey ki Josue he anak ni Nun.
31 Ne sikan mulà is menge anak niw he egkeǥiyen niw he ebihaǥen, ne ed-uwiten ku sikandan duen te tanà he mid-engkezan niw ne egkaangken dan heini.
32 Piru sikiyu ebpematey kew kayi te sibsivayan.
33 Is menge anak niw, egkeiring te ed-elima te kerehidu he ebpekeriǥuriǥu kayi te sibsivayan seled te 40 he tuig. Ne tenged kayi egkerasey sikandan tenged te keniyu he kedluib kediey taman te ebpematey kew is langun.
34 Ne geina te 40 he andew is kebpeniizi te menge meniniid duen te tanà, ne ebpekaantus kew zaan te 40 he tuig tenged te menge salè niw, wey niw metueni ke hengkey is ebeelan ku ke egkepeukan ku is ebpekigkuntada kedì.
35 Iyan a is Nengazen migkaǥi kayi, ne kenà ebperis is kebeeli ku te nekaǥi ku he ebeelan ku kayi te mezaat he menge etew he nesevaha he egkuntada kedì. Ebpematey sikandan is langun kayi te sibsivayan.’ ”
36-37 Ne zutun, sikan is menge etew he midsuǥù ni Moises te kebpeniid he nenudtul te mezaat mehitenged duen te tanà he iyan nehimu he hinungdan te kebegulbul te menge Israilihanen, ne nematey te zaru ziyà te etuvangan te Nengazen.
38 Duen te 12 he menge meniniid ne iyan dà wazà mebpatey, si Josue he anak ni Nun wey si Caleb he anak ni Jefune.
Nezaag is menge Israilihanen hein Midsurung Dan diyà te Canaan
(Deuteronomio 1:41-46)
39 Ne hein midtudtul haazà ni Moises diyà te langun he menge Israilihanen, neseeng sikandan.
40 Ne hein sunud he andew midsayu sikandan med-enew su edtekezeg sikandan diyà te menge vuvungan te Canaan. Ke sikandan te, “Netuenan dey he nekesalè key, ne ǥuntaan andam key en he edhendiyà te lugar he insaad te Nengazen!”
41 Piru migkaǥi si Moises te, “Maan is edsupaken niw en maan guntaan is insuǥù te Nengazen he medlikù kew zèpa ziyà te sibsivayan? Kenè kew ebmezeeǥen!
42 Kenè kew ǥenat, su is Nengazen wazà mebpekiduma keniyu, ne egkezaag kew te menge kuntada niw.
43 Emun ebpekidtebek keniyu is menge Canaanhen wey menge Amalikanhen ne ebpemematey kew; kenà ebpekiduma is Nengazen keniyu su inselikwey niw sikandin.”
44 Piru midhendiyà gihapun sikandan te menge vuvungan te Canaan minsan kenè dan duma si Moises wey sikan is Kavan te Kebpekid-uyun te Nengazen kandan.
45 Ne midsurung kandan is menge Amalikanhen wey menge Canaanhen he meǥinged dutun te menge vuvungan, ne nezaag sikandan, ne midal-as sikandan taman te Horma.