13
Kedakel te pedowan
1 Aw mekeikagi a te doma kagi te otaw wedà ko peg-ilingi, aw pengkey mekeikagi a te kagi te menge anghil, meneng aw wedad kedakel te pedowan ko diyà te doma otaw, wedad ontong te peg-ikagi ko, so iling a te daging te agong selegsagen aw mekebebingel.
2 Pengkey biyasa a egkeliwat te kagi te Timanem, pengkey doen impetaga-taga te Timanem kanak wedà din petega-tegahi diyà te doma otaw, pengkey netegahan ko se kedita te kebenalan, pengkey ontò a egsalig diyà te Timanem aw yan egpekeinang a te kepelahan, meneng aw wedad kedakel te pedowan ko diyà te doma otaw, wedad ontong kanak.
3 Pengkey tigkan ko ibegay se kedakel te kedònan ko diyà te doma otaw, pengkey mepakay diyà kanak se pegsonog te lawa ko tandà te pegpemenal ko, meneng aw wedad kedakel te pedowan ko diyà te doma otaw, wedad ontong te peg-inang ko kenyan.
4 Seini se eg-inangen te otaw dakel se pedowan din. Melayat se pedowan din, aw mèpiya se eg-inangen din diyà te doma. Kenà eg-ingà. Kenà heman egduyun te pegkeotawun din.
5 Kenà egpelangkaw-langkaw. Doen but din. Wedad kedemet. Kenà mebabaw se pedowan din. Kenà egmalit.
6 Se otaw doen dakel pedowan, eked keluba aw mekesalà se doma, meneng meluba aw mèpiya se eg-inangen te doma.
7 Se otaw dakel se pedowan din, pengkey eden se inangen te doma kandin, eked pegbelisì. Meibeg heman sikandin memenal te mèpiya. Gayed din heman egpelimanan se mèpiya. Pengkey eden se kelimahan domateng kandin, eked sikandin lengà.
8 Wedad temanan te kedakel te pedowan din. Doen kwani aldaw domateng te wedad komeliwat te kagi te Timanem. Megkewedad heman se peg-ikagi te doma kagi eked kelebeti. Wedad heman meg-indan-indan te toladà diyà te doma otaw amon mekelabet.
9 Wedà pa kesikop se netegahan tadon, aw kenà pa botong se pegkeliwat tadon te kagi te Timanem.
10 Meneng aw domateng se modi aldaw, aw metoman se kedita te pakang te Timanem, wedad den kekemowan te netegahan tadon, aw ketenanan tadon iyan so wedà pa kesikop.
11 Yan se iling kanak, so pegkebatà ko kedengan, iling te batà se kagi ko, aw ibeg ko, aw aneng-aneng ko. Meneng pegkedakel ko, limengà a den te pegtengisù so wedà iyan kesikop.
12 Songkani, se pegketaga-taga tadon, yan se iling te bawa kitaen tadon diyà te ispiho eked ontò kebangal. Meneng doen kwani aldaw domateng, bawa i Cristo se ontò tadon kitaen. Pengkey wedà pa kesikop se netegahan ko, meneng domateng kwani se aldaw mesikop se netegahan ko iling te pegketaga-taga te Timanem kanak.
13 Yan doen telo eked palos pegkewedad. Yan se pegsalig tadon, aw pegpeliman tadon, aw pegkedakel te pedowan tadon. Meneng se ontò melangkaw diyà te telo sìyan, yan se pegkedakel te pedowan.