4
1 Yan keilangan meg-aneng-aneng kaw te sikami si Apolos se insogò i Cristo, aw insalig te Timanem kenami se kebenalan ipegtoladà day kenyo.
2 So sikami se otaw sineligan din kenyan, keilangan tomolò kay te simogò kenami.
3 Yan, pengkey eden se aneng-aneng niyo aw doma otaw tepad kanak, aw den iyan, so pengkey siak, eked a heman ikagi aw ontò mèpiya se pegtolò ko te Timanem.
4 Pengkey wedad netegahan ko medaet diyà te neinang ko, meneng wedà a keinang metòlid pineokit kenyan, so Pengolo olò se netaga-taga aw metòlid a.
5 Yan ikà niyo eg-okom te eg-inangen te doma otaw, so wedà pa dateng se aldaw te peg-okom. Aw lomikò se Pengolo, ipetaga-taga din se kedita, sìyan wedà tadon pa ketegahi. Ipetaga-taga din heman se kedita te aneng-aneng te otaw, aw penga niyan, iduyun te Timanem se teg sebad-sebad otaw doen ontong.
6 Menge kedowa ko, dini te intoladà ko seini, impolingun ko diyà kanak aw ki Apolos, so ibeg ko meg-iling kaw kenami te pegtolò day te kagi te Timanem insolat, amon wedad pedigselan niyo.
7 Kenà kaw melangkaw diyà te menge doma otaw, so se kedita te nekinawà niyo, yan se imbowang te Timanem kenyo. Aw lekat te Timanem se kedita, eked kepakay aw megpelangkaw-langkaw kaw, so kenà iyan lekat te kenyo pegkeotawun.
8 Ikà niyo eg-aneng-aneng te netegahan niyo den se kedita aw meyaman kaw den. Eden niyo aw limowan kaw den, pengkey wedà kay pa lowan. Mèpiya peden aw limowan kaw den, amon mekelowan kay heman doma kenyo.
9 Aneng-aneng ko, doen ibeg te Timanem te medanà se pegkeotawun day aw menge doma sogounun i Cristo, aw lindoan kay iling te otaw kineleboso aw agpet imetayan, so egkitaen kay te kedita dini te keneyonan, pengkey otaw aw menge anghil eleg heman egpengità kenami.
10 Pengkey wedad ekon inenengen day so egtaking kay ki Cristo, meneng aneng-aneng niyo doen inenengen niyo so egtaking kaw ki Cristo. Pengkey wedad ekon mebatog day inangen, meneng aneng-aneng niyo mebatog niyo inangen se kedita pengkey eden. Sikiyo se nedengeg, meneng sikami se eglindoan.
11 Lamig seini, egbellosen kay, aw egkelao kay, aw wedad nael penenaktun day, aw pineeleg kay, aw lomelegeb kay so wedad balay day.
12 Egterbaho kay amon doen mekaen day. Aw tollonan kay te doma otaw, egpemoyò kay diyà te Timanem te keidowan din dan. Pengkey egpemilangen kay, meneng kunù egpeketayod kay.
13 Aw bàtan-bàtan kay, egtaba kay te mèpiya. Lamig seini, se aneng-aneng te otaw dini te keneyonan, iling kay te sagbet iagbel so wedad ontong.
Peg-ilingan se eg-inangen i Pablo
14 Simolat a kani diyà kenyo kenà amon meyàyà kaw, meneng amon megtoladà a kenyo, so egkedekelan ko sikiyo te pedowan iling te ontò batà ko.
15 Pengkey pila gatos se doma otaw megtoladà kenyo tepad ki Cristo, meneng ikà niyo egkelibel te siaken olò se amay niyo, so nemenal kaw ki Cristo pineokit te pegtoladà ko kenyo te Mèpiya Indan.
16 Se punù ko kenyo, peg-ilingi niyo se eg-inangen ko.
17 Yan insogò ko si Timoteo doton kenyo. Iling sikandin te batà ko egkedekelan ko te pedowan, aw egkeseligan sikandin te pegtaking din te Pengolo tadon. Ipeaneng-aneng kaw din te eg-inangen ko te pegtaking ko ki Jesu Cristo, aw yan se ipegtoladà ko doton te kedita te simbahan pengkey kenan a pesalo.
18 Doen ekon doton kenyo migpelangkaw-langkaw, so eden dan aw eked a laoy kenyo.
19 Meneng aw meibeg se Pengolo, domoton a kenyo te eked kenamay, amon kitaen ko aw ontò benal egtaking te Timanem se otaw egpelangkaw-langkaw, aw olò taman te kagi dan.
20 Aw eglowan se Timanem kenitadon, ketegahan iyan kenà pineokit te kagi tadon meneng pineokit te inang tadon.
21 Yan sikiyo se memallì. Aw eked kaw taking te intoladà ko, ipelumun ko sikiyo aw domateng a doton kenyo. Meneng aw ibeg niyo tomolò kaw te intoladà ko kenyo, yan komità kaw te ontò dakel se pedowan ko kenyo.