49
Ketemanan te peg-ikagi i Jacob
1 Penga niyan, tinawal i Jacob se kedita te batà din meama, aw minikagi sikandin, “Pegpedapag kaw den diyà kanak, so meg-indan a den kenyo aw eden se domateng kenyo te modi aldaw.
2 Menge batà ko, pegpedapag kaw den diyà kanak. Penenalan kaw den kanak.
3 “Sikona Ruben se kakay diyà te kedita te batà ko. Magsen se lawa nikaw iling kanak kedengan. Diyà te kedita te menge batà ko, sikona se ontò melangkaw aw ontò egsegmanen.
4 Meneng iling ka te wayeg eglaneg, so kenà ka egpeketameng te ibeg te pedowan nikaw. Yan meabat se kelangkaw nikaw, so limayok ka te doma esawa ko, aw yan migyàyà ka kanak.
5 “Si Simeon aw si Levi, onawa se didowa dan, so egpenagnos dan te kekamang amon meg-inang dan te medaet.
6 Eked a penenalan te pelnao dan. Eked a ayon kandan, so pegkeopal dan, nemonò dan, aw pegkeluba dan, pigpantig dan se menge baka.
7 Ipelumun dan te Timanem tandà te keopal dan, so pelaban dan mebolot aw ontò melbala. Peg-ebong-ebongen se menge bowad-bowad dan aw mebilit dan doton te ogpeanan te menge doma bowad-bowad ko.
8 “Sikona Juda se iduyun te menge kedowa nikaw. Egpekedaeg ka te menge poon nikaw. Keilangan lomongken se menge kedowa no diyà kamno.
9 Juda, iling ka te menenanap iningedanan liyon egsagok te kànen din, aw eg-olì doton te salag din aw eg-ibat. Wedad otaw mekeotik kamno.
10 Si Juda se mengawid te bangkà te selotan, so gayed lomowan se menge bowad-bowad din lamig domateng se ontò selotan, sìyan toloen te kedita te otaw.
11 Iiket din se nati te asno diyà te belagen te paras doen ontò mèpiya pongo niyan. Mepakay din bugsakan se penenaktun din diyà te temek te paras ininang bino, so ontò dakel se paras din.
12 Labi pa melalag se mata din diyà te bino, aw labi pa mepotì se ngipen din diyà te gatas.
13 “Si Sabulon se meg-ogpà doton medapag te dagat. Ipegpondo se menge bapor doton te dedongan din. Tig-epoen din se tanà taman te Sidon.
14 “Si Isacar se iling te magsen asno gayed eg-ibat medapag te karga eg-ibingen din.
15 Meneng aw komità sikandin te mèpiya iyan ogpeanan aw mèpiya heman se tanà kidoen, meg-akot sikandin te mebegat, aw measeb sikandin megterbaho iling te allang.
16 “Mèpiya se pegpengibing i Dan te menge sakop din, iling te menge doma pongan te bowad-bowad i Israel.
17 Si Dan se iling te memokan doton te kilid te dalan menongkà te benis te kodà amon medagdag se otaw simakay aw mekelias.
18 “E Pengolo, egpelimanan ko se pegpelowà no kanak.
19 “Doen menge mengengayaw meglompak ki Gad, meneng etowan din dan, aw elawen din dan.
20 “Mèpiya se geniyen doton te menge pawà i Aser. Mèpiya se kànen ebaten kidoen kandin iling te mèpiya kànen te selotan.
21 “Si Neftali se iling te seladeng eked kedakep. Mèpiya heman se bawa te menge batà din.
22 “Si Jose se iling te kayo intanem medapag te selep. Dakel se pongo niyan, aw minapet se panga niyan te dibaloy te alad.
23 Doen otaw meglompak kandin aw memanà kandin,
24 meneng megkedaet se bosog dan, aw megkelomay se bebenayen dan tandà te inang te Timanem Metolos egseligan ko. Timanem se megbantay aw meg-ipat te menge bowad-bowad ko.
25 Se Timanem egseligan ko, yan se megtabang kenyo. Se Timanem eglowan diyà te kedita, yan se memegay kenyo te mèpiya. Sikandin se memegay kenyo te odan lekat te langit, aw selep egtebol lekat didalem te tanà. Sikandin se memegay kenyo te medita ayam-ayam aw batà.
26 Sikandin se memegay kenyo te dakel trigo aw kebokadan. Sikandin se memegay kenyo te mèpiya doton te pemebongan aw doton te bontod wedad temanan. Ibeg ko Jose, begayan ka te Timanem te kedita niyan, so pinemallì ka din diyà te kedita te menge kedowa nikaw.
27 “Si Benjamin se iling te mebolot menenanap te kebenesan iningedanan lobo gayed egpengimatay aw egpengaen lekat te iselem lamig te meapon.”
28 Yan se sempolò teg dowa pongan te menge bowad-bowad i Israel, aw yan se inikagi te amay dan diyà kandan. Neketepad se inikagi din diyà te tegsebad-sebad kandan te agpet sikandin matay.
Pegkematay i Jacob aw peglebeng kandin
29 Penga niyan, doen impunù i Jacob diyà te menge batà din, kagi din, “Agpet a den tomelokon te menge kemonaan ko nematay. Lebengi se lawa ko doton te linebengan te menge kemonaan ko doton te ilib kidoen te tanà tapay tinig-apò i Efron tege Heti
30 doton te Makpela lenged te eglibtakan te lonsod te Mamre doton te Canaan. Yan se ilib aw tanà bineyadan i Abraham ki Efron amon inangen din lebenganan.
31 Yan se linebengan ki Abraham aw esawa din si Sara. Yan heman se linebengan ki Isaac aw esawa din si Rebecca. Yan heman se linebengan ko ki Lea.
32 Yan se tanà aw ilib bineyadan lekat te menge tege Heti gebii.”
33 Penga te pegpunù i Jacob diyà te menge batà din, todà sikandin minibat, aw penga niyan nematay.