10
Sempolò teg dowa sogounun i Cristo
Mat. 10:1-4; Mar. 3:13-19; Luc. 6:12-16
1 Nayan, tinawal i Jesus se sempolò teg dowa tinoledaan din, aw imbegay din diyà kandan se tolos amon megpelowà dan te bosaw lekat te otaw, aw amon megpegolì dan te kedita te otaw doen mesakit.
2 Seini se ngadan te sempolò teg dowa sogounun i Cristo, si Simon iningedanan din ki Pedro, aw kedowa din si Andres, aw didowa batà i Sebedeo si Santiago aw si Juan,
3 aw si Felipe, si Bartolome, si Tomas, si Mateo sìyan iskribinti, aw si Santiago batà i Alfeo, si Tadeo,
4 aw si Simon meyseg, aw si Judas Iscariote, sìyan migtolok ki Jesus.
Insogò se sempolò teg dowa tinoledaan i Jesus
Mat. 10:5-15; Mar. 6:7-13; Luc. 9:1-6
5 Yan se sempolò teg dowa tinoledaan insogò i Jesus, so doen impunù din diyà kandan, kagi din, “Ikà niyo egdoton te menge ogpeanan te menge otaw kenà Judiyo. Ikà niyo heman egdoton te menge lonsod te Samarya.
6 Meneng doton kaw te menge bowad-bowad i Israel. Keilangan tebangan niyo dan so iling dan te menge ayam-ayam karniro migketading.
7 Pengkey kenan kaw pesalo, pegtoladà kaw te agpet den lomowan se Timanem.
8 Pegolii niyo se otaw doen mesakit. Entayi niyo se otaw nematay. Pegolii niyo se otaw pigtompig. Pelowai niyo se bosaw lekat te otaw. Ikà niyo egpebayad te otaw tebangan niyo, so wedad imbayad niyo te tolos insalig ko diyà kenyo.
9 Ikà niyo egpengibing te kwarta pengkey bolawan, selapì aw kedakò.
10 Ikà niyo heman egpengibing te kelepì, aw saol, aw sepatos ekasan niyo, aw bangkà, so keilangan togpoan kaw te otaw tebangan niyo, iling te otaw egterbaho gayed egtogpoan te otaw egtebangan dan.
11 Aw domateng kaw doton te lonsod aw doma ogpeanan, peg-insà kaw aw sinu se mèpiya otaw ogpaan niyo. Penga niyan, peg-ogpà kaw kidoen te balay din lamig domeleg kaw doton te doma lonsod.
12 Aw domateng kaw doton te balay, onà kaw ikagi diyà te otaw eg-ogpà kidoen te begayan se kedita dan te kelinaw.
13 Aw mèpiya se pedowan te otaw eg-ogpà kidoen, metoman dan begayan te kelinaw pineokit te kagi niyo. Meneng aw wedad otaw kidoen mèpiya se pedowan din, lomikò diyà kenyo se inikagi niyo.
14 Aw doen otaw eked pegsagman kenyo aw eked penenalan te itoladà niyo, tektaki niyo se napò te tanà lekat te sepatos niyo te pegkesayo niyo lekat te balay dan aw lonsod dan. Yan metaga-taga se otaw kidoen te doen salà dan, so wedà dan penenalan te intoladà niyo.
15 Eneng-enengi niyo se kagi ko kenyo seini. Pengkey ipelumun te Timanem se tege Sodoma aw tege Gomora te modi aldaw tepad te salà dan ontò medaet, meneng labi pa ipelumun te Timanem se otaw eked pegsagman kenyo.”
Domateng se pegpemilang
Mat. 10:16-25; Mar. 13:9-13; Luc. 21:12-17
16 “Nayan, peg-ahà kaw amon eked kaw pemilangi te menge mededaet otaw, so iling kaw te ayam-ayam karniro binenganan te menenanap te kebenesan iningedanan lobo. Yan keilangan ontò kaw megpekebiyasa, aw keilangan wedad palos inangen niyo medaet.
17 Peg-ahà kaw te menge mededaet otaw, so ibingen kaw dan doton te howis, aw bedasen kaw dan kidoen te simbahan te Judiyo.
18 Dekepen kaw aw okomen kaw te menge gobirnador aw menge selotan tandà te pegpesakop niyo diyà kanak, amon meg-indan kaw te kebenalan tepad kanak diyà kandan aw diyà te menge doma otaw kenà Judiyo.
19 Aw ibingen kaw doton te otaw meg-okom kenyo, ikà niyo egketetana tepad te itaba niyo, aw eden se ikegiyen niyo kandan, so dalem te aldaw sìyan, begayan kaw te kebiyasa amon meketaba kaw kandan.
20 Kenà lekat te kenyo kebiyasa se ikegiyen niyo, meneng mikagi se Espiritu Santo isogò te Timanem Amay niyo pineokit kenyo.
21 “Doen otaw megtolok te kandan menge kedowa amon imetayan dan. Doen heman amay megtolok te kandan menge batà amon imetayan dan. Doen heman menge otaw eked pegsagman te kandan amay aw inay, aw ipeimatay dan.
22 Kebensihan kaw te keditaan te otaw tandà te pegpesakop niyo diyà kanak. Meneng aw tomayod kaw te kedita te kelimahan, ipelowà kaw.
23 Aw pemilangen kaw kidoen te sebad lonsod, kadas kaw lekat kidoen aw doton kaw te doma lonsod. Penenalan kaw te kagi ko kenyo seini. Siak se Timanem Migpekeotaw, aw lomikò a te eked pa kepenga se pegtoladà niyo kidoen te kedita te lonsod eg-ogpaan te menge bowad-bowad i Israel.
24 “Wedad meiskwilahay labi pa melangkaw diyà te meistro migtoladà kandin. Wedad heman sineligan labi pa melangkaw diyà te amo din.
25 Keilangan meluba se meiskwilahay aw mapet se kelangkaw din diyà te kelangkaw te meistro migtoladà kandin. Keilangan meluba heman se sineligan aw mapet se kelangkaw din diyà te kelangkaw te amo din. Netegahan niyo den te tinawal a te doma otaw Belsebul, se doma ngadan i Satanas. Na, aw medaet se intawal dan te Pengolo niyo, labi pa medaet se itawal dan kenyo menge sakop ko.”
Kelemitanan
Mat. 10:26-31; Luc. 12:2-7
26 “Na, ikà niyo egkelemitan te doma otaw, so ipekità te modi aldaw se kedita te in-eles den seini. Ipetaga-taga heman se kedita wedà pa ketegahi te doma otaw.
27 Pengkey eden se inikagi ko diyà kenyo te olò sikitadon, yan se keilangan ikegiyen niyo diyà te menge doma otaw. Pengkey eden se intoladà ko te wedad doma dimineg, yan se keilangan itoladà niyo diyà te kedita te otaw te keneyonan.
28 Ikà niyo egkelemitan te otaw, so olò lawa niyo se mebatog dan imetayan, kenà pedowan niyo wedad temanan. Meneng sebad se keilangan kelemitanan niyo, aw yan se Timanem, so mebatog din pegbàtan se pedowan aw lawa te otaw doton te kilot.
29 “Meneng ontò heman egkeido se Timanem te otaw. Pengkey iling te wedad keelagà te dowa manok te kebenesan aw beyadan niyo, meneng wedad palos manok te kebenesan medagdag kidoen te tanà aw kenà ibeg te Amay niyo Timanem.
30-31 Yan ikà niyo egkelemitan. So eg-ipaten te Timanem se kedita te manok te kebenesan pengkey iling te wedad keelagà dan, labi kaw pa eg-ipaten te Timanem, so meelagà kaw pa diyà te medita manok te kebenesan. Pengkey logay niyo, netegahan te Timanem aw pila se kedita niyan.”
Peg-indan aw pegbolon ki Jesus
Mat. 10:32-33; Luc. 12:8-9
32 “Aw mikagi se otaw diyà te doma te ontò sikandin migpesakop diyà kanak, mikagi a heman diyà te Amay ko doton te langit te sakop ko se otaw sìyan.
33 Meneng aw mikagi se otaw te kenà sikandin sakop ko, eked a heman ikagi diyà te Amay ko te sakop ko sikandin.”
Kenà kelinaw meneng pegpedàtay
Mat. 10:34-39; Luc. 12:51-53; 14:26-27
34 “Ikà niyo eg-aneng-aneng te dimini a amon doen kelinaw te otaw dini lanto te tanà, meneng labi pa megpedàtay se otaw te pedowan tandà te pegdateng ko.
35 Eked pegsebad se telebatà tandà te pegdateng ko. Pengkey teleogangan, megpedàtay dan te pedowan tepad kanak.
36 Se ontò poon te otaw kwani, yan se menge sakop te kandin balay.
37 “Aw mikagi se otaw te dakel se pedowan din diyà kanak, meneng labi pa dakel se pedowan din diyà te amay aw inay din, eked kepakay megpesakop diyà kanak. Aw mikagi se otaw te dakel se pedowan din kanak, meneng labi pa dakel se pedowan din diyà te batà din, eked kepakay megpesakop diyà kanak.
38 Aw eked taking se otaw kanak so nelemitan te detengan sikandin te kelimahan aw kemetayun, eked kepakay megpesakop diyà kanak.
39 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak, begayan sikandin te kaling pedowan wedad temanan.”
Menge ontong ibegay te Timanem
Mat. 10:40-42; Mar. 9:41
40 “Aw megsagman se otaw kenyo, segmanen a din heman. Aw megsagman se otaw kanak, segmanen din heman se Amay ko simogò kanak.
41 Aw megsagman kaw te telekeliwat te kagi te Timanem tandà te pegkeliwat din te kagi te Timanem, doen ontong ibegay te Timanem diyà kenyo onawa te ontong ibegay din diyà te telekeliwat te kagi din. Aw megsagman kaw te otaw eg-inang te metòlid tandà te peg-inang din te metòlid, doen ontong ibegay te Timanem diyà kenyo onawa te ontong ibegay din diyà te otaw eg-inang te metòlid.
42 Eneng-enengi niyo se kagi ko kenyo seini. Aw melao se sebad otaw medanà egtaking kanak, aw memegay kaw te wayeg diyà kandin tandà te pegtaking din kanak, begayan kaw te Timanem te ontong.”