2
Peggemaw te menge otaw biyasa
1 Timebaw si Jesus doton te lonsod te Bitlihim sakop te probinsya te Judiya dalem te peglowan te selotan si Herod.
Nayan, doen menge otaw dimateng doton te Jerusalem lekat te mediyò ogpeanan doton te eglibtakan te aldaw. Sikandan se ontò biyasa tepad te pengilala te menge bitoen.
2 Mig-insà dan, “Kenan lay se deitek batà meinang Selotan te menge Judiyo? Kinità day se bitoen limibtak aw yan se pengilala te timebaw den sikandin. Dimini kay amon megsimba kay kandin.”
3 Pegdineg i Herod te doen meinang selotan somelilin kandin, ontò sikandin netetana sipat kedita te tege Jerusalem.
4 Penga niyan, impetipon din se kedita te pengolo te simbahan te Judiyo aw menenoladà te punù ingkeliwat i Moises. Mig-insà sikandin aw kenan tebaw se Misiyas.
5 Timaba dan, “Tomebaw sikandin doton te Bitlihim dini te probinsya te Judiya, so yan se tapay insolat te telekeliwat te kagi te Timanem, kagi din,
6 ‘Sikiyo menge tege Bitlihim, pengkey nedengeg se menge doma lonsod doton te probinsya niyo te Judiya, meneng labi pa medengeg se lonsod niyo, so lekat kenyo se Pengolo lomowan diyà te menge bowad-bowad i Israel pinemallì ko.’ ”
7 Penga niyan, impeangay i Herod se menge otaw biyasa te pengilala te bitoen. Netipon dan te wedad doma otaw netaga-taga, aw ontò mig-insà si Herod aw kano dan kitai se bitoen sìyan.
8 Penga niyan, insogò din dan, kagi din, “Doton kaw te Bitlihim, aw ontò niyo pemehai se batà sìyan. Aw kitaen niyo sikandin, likò kaw dini aw indani a niyo amon domoton a heman aw megsimba a kandin.”
9-10 Penga niyan, nesayo dan aw todà dan kinità se bitoen tapay dan kinità limibtak. Pegkità dan te bitoen, ontò neluba se pedowan dan, aw yan se tinekingan dan lamig simagked iyan diatas te balay inogpaan i Jesus.
11 Peg-awop dan kidoen te balay, kinità dan se batà aw inay din si Maria. Limongken dan aw migsimba dan te batà. Penga niyan, inokal dan se kekanà inibing dan, menge bolawan, aw metinadeg sonogen, aw bebolong te saka iningedanan mira. Tinigkan dan iyan imbowang diyà ki Jesus.
12 Nayan, migpunù se Timanem diyà kandan pineokit te tegeinep te eked kepakay aw lomikò dan doton ki Herod. Yan se doun te minokit dan te sebad dalan te peg-olì dan doton te kandan ogpeanan.
Pegkadas doton te Ehipto
13 Nayan, penga te pegkesayo dan, doen anghil insogò te Timanem migpekità diyà ki Jose pineokit te tegeinep, aw minikagi, “Enaw ka. Ibingi se batà aw inay din, aw kadas kaw doton te Ehipto. Peg-ogpà kaw doton lamig te ipeolì ko sikiyo, so doen sondalo isogò i Herod amon mengemahà te batà seini aw imetayan.”
14 Penga niyan, pengkey tengà te delem, minenaw si Jose aw inibing din se esawa din aw si Jesus, aw simamsam dan pesalo doton te Ehipto.
15 Mig-ogpà dan doton lamig nematay si Herod.
Yan se neinang amon metoman se inikagi te telekeliwat te kagi te Timanem, “Ipeolì ko se batà ko lekat te Ehipto.”
Peg-igelà te menge deitek batà meama
16 Nayan, pegketaga-taga i Herod te inekalan sikandin te menge otaw biyasa tepad te pengilala te bitoen, ontò sikandin neopal so wedà dan likò doton kandin. Yan insogò din se menge sondalo doton te lonsod te Bitlihim aw menge ogpeanan medapag kidoen amon imetayan dan se kedita te batà meama lekat te kaling timebaw lamig te didowa se omay, so yan se kenamay netegahan din lekat te in-indan te menge otaw biyasa tepad te pengilala te bitoen.
17 Pineokit kenyan, netoman se inikagi te telekeliwat te kagi te Timanem gebii si Jeremias,
18 “Doen dinegen niyo kidoen te lonsod te Rama. Megkelag aw megmatay se menge bowad-bowad i Rakel, so melano dan te mengisù dan. Megkelag dan, aw eked dan kesinelayi, so inimetayan se mengisù dan.”
Peglikò doton te Nasarit
19 Nayan, penga te pegkematay i Herod, doen anghil insogò te Timanem migpekità diyà ki Jose doton te Ehipto pineokit te tegeinep. Minikagi se anghil,
20 “Enaw ka. Ibingi se batà aw inay din, aw olì kaw doton te Israel, so nematay den se otaw mengimatay peden te batà.”
21 Penga niyan, minenaw si Jose aw inibing din se esawa din aw si Jesus, aw minolì dan doton te Israel.
22 Meneng wedà dan deleg doton te probinsya te Judiya, so nelemitan si Jose te pegdineg din te limowan den si Arkelao simelilin te amay din si Herod nematay. Yan insogò te Timanem si Jose pineokit te tegeinep, aw simoway dan doton te probinsya te Galiliya.
23 Mig-ogpà dan doton te lonsod te Nasarit. Yan netoman se inikagi te menge telekeliwat te kagi te Timanem te tewalen si Jesus tege Nasarit.