24
Keteboan te kelimahan
Mat. 24:1-14; Mar. 13:1-13; Luc. 21:5-19
1 Nayan, limowà si Jesus lekat te dakel simbahan te Jerusalem. Pegkesayo din, migpedapag se menge tinoledaan din aw impekità dan diyà kandin se menge balay te simbahan, so mèpiya se bawa niyan.
2 Meneng minikagi si Jesus, “Pengkey induyun niyo se simbahan seini, meneng mikagi a kenyo te tigkan iyan kebàtan te modi aldaw, aw wedad palos bato ketenanan diyà te lanto te doma bato.”
3 Wedà kenamay, dimoton si Jesus te bontod te Olibo aw nenenoo kidoen. Dimoton se menge tinoledaan din kandin te wedad doma dan, aw mig-insà dan, kagi dan, “Indani kay. Kano lay ketoman se in-indan nikaw? Eden lay se pengilala kitaen day amon ketegahan day te agpet ka lomikò aw agpet heman se temanan te keneyonan?”
4 Minikagi si Jesus, “Peg-ahà kaw amon eked kaw keekali.
5 Doen kwani medita otaw megpelingo-lingo te insogò dan te Timanem. Mikagi dan te sikandan se Misiyas, aw medita se otaw keekalan dan aw tomaking kandan.
6 Aw domineg kaw te doen gira medapag kenyo aw mediyò heman, ikà niyo egkelemitan. Keilangan iyan meinang, meneng kenà pa niyan se temanan te keneyonan.
7 Medita se otaw meggira, so doen pongan megbolaw diyà te doma pongan, aw doen heman menge sakop te sebad selotan megbolaw diyà te menge sakop te doma selotan. Megelà se otaw te medita ogpeanan tandà te bayil aw linog domateng diyà kandan.
8 Pengkey medaet iyan, meneng yan olò se keteboan te kelimahan domateng dini te keneyonan, iling te keteboan te mesakit domateng te bayi agpet tebawan.
9 “Yan kebensihan kaw te keditaan te otaw tandà te pegpesakop niyo diyà kanak, aw dekepen kaw dan amon ipeeleg kaw aw imetayan kaw dan.
10 Aw metoman iyan, medita se otaw lomengà te pegsalig dan kanak. Megpetolokay dan, aw megpeopalay dan.
11 Medita heman se otaw megpelingo-lingo telekeliwat te kagi te Timanem, aw medita se keekalan dan aw tomaking kandan.
12 Ontò medaet se inangen te otaw, aw yan se doun te megpedeitekay se keditaan te otaw te pedowan.
13 Meneng aw tomayod se otaw te kedita te kelimahan, ipelowà sikandin.
14 Onà itoladà se Mèpiya Indan tepad te peglowan te Timanem doton te kebelad te keneyonan, amon domineg se kedita te otaw. Penga niyan, domateng se temanan te keneyonan.”
Kedaet te kelimahan
Mat. 24:15-28; Mar. 13:14-23; Luc. 21:20-24
15 “Na, minikagi se telekeliwat te kagi te Timanem gebii si Daniel te doen domateng meg-inang te medaet doton te dakel simbahan te Jerusalem aw ontò mekelamit te otaw. (Keilangan kelebetan iyan te kedita te otaw megbasa te kagi din sìyan insolat.) Aw kitaen niyo iyan doton te dakel simbahan,
16 keilangan komadas se kedita te otaw lekat te Judiya pesalo doton te bontod.
17 Keilangan eked awop diyà te balay din se otaw doton te lowà amon ebaten din se kedònan, meneng keilangan tenanan din se kedita.
18 Se otaw egterbaho doton te pawà, eked heman olì amon ebaten din se ekasan, meneng keilangan komadas.
19 Mekelelayò heman se menge bayi mebedes aw egsosowan te aldaw sìyan.
20 Pegtawal-tawal kaw diyà te Timanem te kenà pengodan aw kenà aldaw te peg-etod se pegkadas niyo.
21 Ontò medaet se kelimahan domateng diyà te keneyonan. Wedad palos kelimahan labi pa medaet diyà kenyan lekat te keteboan te keneyonan lamig seini, aw wedad palos heman kelimahan domateng labi pa medaet diyà kenyan.
22 Meneng pekebebaen te Timanem se kenamay te aldaw te kelimahan sìyan amon eked kegelà se kedita te otaw. Pekebebaen din iyan tandà te menge otaw pinemallì din.
23 “Aw domateng se aldaw sìyan, aw doen otaw mikagi, ‘Na, dini den se Misiyas,’ aw doen otaw mikagi, ‘Doton se Misiyas,’ ikà niyo egpemenal kandan.
24 Doen menge otaw domateng megpelingo-lingo te sikandan se Misiyas aw menge telekeliwat te kagi te Timanem. Meg-inang dan heman te menge kepelahan amon keekalan dan peden heman se menge otaw pinemallì te Timanem.
25 Yan peg-ahà kaw, so mig-indan a den kenyan diyà kenyo te eked pa dateng.
26 “Aw doen otaw mikagi diyà kenyo, ‘Na, doton den se Misiyas te kebigtilan,’ ikà niyo egdoton. Aw doen doma otaw mikagi, ‘Na, mineles den sikandin doton didalem te balay,’ ikà niyo egpemenal kenyan,
27 so ontò metaen se peglikò ko iling te kilem ontò somiblat doton te kebelad te langit, aw kitaen te kedita te otaw. Iling kenyan se pegdateng ko Timanem Migpekeotaw.
28 “Pengkey kenan se lawa te nematay, yan se ketiponan te menge manok egpengaen te lawa te nematay.”
Peglikò te Timanem Migpekeotaw
Mat. 24:29-31; Mar. 13:24-27; Luc. 21:25-28
29 “Aw mepenga se kelimahan sìyan, megkengitngit se keneyonan so eked ebey senang se aldaw aw bolan. Medagdag heman se menge bitoen lekat te langit, so mebilit se kedita dan.
30 Penga niyan, ipekità ko se pengilala doton te langit te agpet a den lomikò Timanem Migpekeotaw. Megkelag se kedita te otaw te keneyonan tandà te lamit dan, so komità dan te pegdateng ko aw lomikò a Timanem Migpekeotaw tekingan te labon lekat te langit. Komità dan te metolos a aw ontò a melangkaw.
31 Ipeedop ko se bodyong, aw isogò ko se menge anghil, aw tiponen dan se kedita te otaw pinemallì ko lekat te kebelad te keneyonan, pengkey kenan dan peg-ogpà.”
Tegdeyanan tepad te kayo igira
Mat. 24:32-35; Mar. 13:28-31; Luc. 21:29-33
32 “Penenalan kaw den te tegdeyanan seini tepad te kayo igira. Aw tomobed iyan aw domawen, ketegahan niyo te agpet den domateng se pengaldaw.
33 Iling heman kenyan, aw kitaen niyo se pegketoman te kedita niyan inikagi ko diyà kenyo, ketegahan niyo te agpet a den lomikò.
34 Eneng-enengi niyo se kagi ko kenyo seini. Doen menge otaw komità te pengilala sìyan, eked dan kematay singed aw metoman se kedita niyan.
35 Doen temanan te langit aw tanà, meneng gayed metoman se kagi ko te wedad temanan.”
Wedad netaga-taga aw kano likò
Mat. 24:36-44; Mar. 13:32-37; Luc. 17:26-30,34-36
36 “Meneng eked ko indani aw eden eldawi aw orasi se peglikò ko. Wedad palos netaga-taga aw kano a likò, pengkey menge anghil doton te langit, so olò Amay ko se netaga-taga kenyan.
37 Aw lomikò a Timanem Migpekeotaw, medita se otaw eked peketagad te pegdateng ko, iling te otaw gebii wedà penenalan ki Noe.
38 Te wedà pa kelinep se tanà te wayeg, gayed dan egpengaen, aw eg-inem dan, aw egpepengognanay dan, lamig te aldaw te pegsakay i Noe aw pamilya din diyà te arka.
39 Meneng wedà ketaga-taga se menge doma otaw te agpet dan megelà lamig nesàban dan te pegkelinep te tanà te wayeg, aw nelemes se kedita dan. Iling heman kenyan se peglikò ko Timanem Migpekeotaw, so medita heman se otaw eked peketagad te pegdateng ko.
40 Aw domateng se aldaw sìyan, pengkey megterbaho se dowa otaw doton te pawà, meneng ipetaking se sebad, aw tenanan se sebad.
41 Pengkey meglegiling se dowa bayi, meneng ipetaking se sebad, aw tenanan se sebad.
42 Yan se doun te keilangan gayed kaw megpeketagad, so wedà niyo ketegahi aw eden eldawi se peglikò ko Pengolo niyo.
43 Meneng eneng-enengi niyo ini. Aw ketegahan te tig-apò te balay aw kano dateng se menenakaw, yan meketagad sikandin, aw eked ketekawi se balay din.
44 Keilangan gayed kaw heman megpeketagad, so domateng a Timanem Migpekeotaw te eked niyo ketegahi aw kano.”
Otaw keseligan aw otaw kenà keseligan
Mat. 24:45-51; Luc. 12:41-48
45 “Se otaw egkeseligan aw biyasa eg-inang te kedita, yan se inangen te amo din egpengibing te kedita te doma otaw doton te balay din, amon memegay diyà kandan te kànen te kelikit te aldaw.
46 Aw domateng se pengolo din, ontò meluba se sineligan gayed egtolò te impunù te amo din.
47 Eneng-enengi niyo se kagi ko kenyo seini. Aw yan se inangen din, meinang sikandin egpengibing te kedita doton te balay te amo din.
48 Meneng aw meg-aneng-aneng se medaet sineligan te menamay pa se pegdateng te amo din,
49 aw egbedasen din se doma sineligan, aw gayed sikandin egpengaen aw eg-inem aw egkelasing sipat menge doma otaw metilasing, medaet iyan,
50 so domateng se amo din te aldaw wedà din pelimani.
51 Metoman sikandin ipelumun te amo din, so ipelumun sikandin iling te menge otaw eden dan aw egpenimanem dan. Ontò megkelag se otaw doton, aw megyangget-yangget se ngipen dan tandà te kegemakan dan.”