3
Pegtoladà i Juan Memonyagay
3:1-12
Luc. 3:1-18; Juan 1:19-28
1 Nayan, dimateng se aldaw te pegdoton i Juan Memonyagay te kebigtilan kidoen te probinsya te Judiya. Migtoladà sikandin, kagi din,
2 “Pegselsel kaw den te menge salà ininang niyo, so agpet den lomowan se Timanem diyà kenitadon.”
3 Si Juan se tinedoan te inikagi te telekeliwat te kagi te Timanem gebii si Isaias,
“Dinegen niyo se otaw doton te kebigtilan aw dakel se kagi din, ‘Peketagad kaw te pegdateng te Pengolo. Peg-inang kaw te metòlid, so domateng sikandin.’ ”
4 Nayan, egpenaol si Juan te saol inabel lekat te bolbol te ayam-ayam kamilo aw egpengelen te kindal te ayam-ayam. Egpengànen din se menge dolon aw teneb eg-ebaten din doton te kebenesan.
5 Medita se otaw lekat te Jerusalem aw menge doma lonsod sakop te probinsya te Judiya aw medapag te wayeg te Jordan dimoton amon menenalan kandin.
6 Migselsel dan te menge salà ininang dan, aw binonyagan din dan doton te wayeg te Jordan.
7 Nayan, medita heman se egpengibing te simbahan te Judiyo dimoton ki Juan amon megpebonyag dan kandin. Sakop dan te menge Parisiyo aw Sadusiyo. Pegkità i Juan kandan, minikagi sikandin, “Tay law. Iling kaw te memokan egkadas te apoy. Eked kaw pekelowà lekat te pelumun te Timanem te modi aldaw singed aw megselsel kaw.
8 Aw migselsel kaw den, petega-tegahi niyo iyan pineokit te eg-inangen niyo.
9 Ikà niyo eg-aneng-aneng te eked kaw pelumuni so bowad-bowad kaw i Abraham. Eneng-enengi niyo se kagi ko seini. Pengkey se menge bato seini te lanto te tanà, mepakay iyan inangen te Timanem menge bowad-bowad i Abraham somelilin kenyo.
10 Iling kaw te kayo agpet pilayen. Aw kenà mèpiya se pongo te kayo, pilayen iyan aw sonogen.
11 Egpemonyag a pineokit te wayeg, so yan se pengilala te migselsel kaw den te salà ininang niyo. Meneng doen pa domateng labi pa melangkaw diyà kanak. Kenà botong se kelangkaw ko amon megtelaban a kandin pengkey mengibing a te sepatos din, so ontò sikandin melangkaw diyà kanak. Sikandin se memonyag kenyo pineokit te Espiritu Santo aw pineokit te apoy.
12 Iling sikandin te otaw egpepalid te trigo eggiyeken din, amon isawol din te buun aw ibingen din doton te balay. Meneng se ohot aw tipig, yan se sonogen din te apoy kenà egkepadeng.”
Pegbonyag ki Jesus
3:13-17
Mar. 1:9-11; Luc. 3:21-22
13 Nayan, dimateng si Jesus lekat te probinsya te Galiliya aw dimoton te wayeg te Jordan amon megpebonyag ki Juan.
14 Meneng wedà keibeg si Juan aw sikandin se megbonyag ki Jesus, so minikagi sikandin, “Eked kepakay aw siak se megbonyag kamno. Keilangan sikona se megbonyag kanak.”
15 Meneng minikagi si Jesus, “Tomani den se pegbonyag kanak, so keilangan tomoman ki den te kedita te ibeg te Timanem.”
Penga niyan, migbonyag si Juan ki Jesus.
16 Penga te pegbonyag din kandin, minanggin si Jesus lekat te wayeg. Pegketà, neowang se langit, aw kinità din se Espiritu Santo migpedanà diyà kandin iling te selepati, aw mig-ogpà diyà kandin.
17 Penga niyan, dinineg dan se kagi te Timanem lekat te langit, “Seini se Batà ko. Dakel se pedowan ko kandin, aw ontò a neluba kandin.”